ފީއަލީ ބިން ހިއްކުމުގެ މަޝްރޫޢު ނިންމަވާ ދެއްވާނެ ކަމަށް ރައީސް ވިދާޅުވެއްޖެ
ފ. ފީއަލީ ބިން ހިއްކުމުގެ މަޝްރޫޢު ނިންމަވާ ދެއްވާނެ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ "ރައީސްގެ ޖަވާބު" ގައި ފ. ފީއަލީ، ހަނދުވަރީ މަންޒިލް، އިބްރާހީމް ޝަނޫން، އެ ރަށު ބިން ހިއްކުމާއި ބަނދަރު ހެދުމާއި މަގު ހެދުމުގެ މަޝްރޫޢުގެ ކަންކަން ކުރިއަށްދާގޮތް އޮޅުންފިލުވުމަށް ދެންނެވި ސުވާލަށް، ޖަވާބު ދެއްވަމުންނެވެ.
އެގޮތުން ރައީސް ވިދާޅުވީ، ފީއަލީ ބިން ހިއްކުމުގެ މަޝްރޫޢުގެ ތެރެއިން، އެރަށުގެ ހިއްކާފައި އޮތް ސަރަހައްދުގައި ރިވެޓްމެންޓް ޖެހުމަށް ބޮޑުހިލަ ގެންދިއުމުގެ މަސައްކަތް އެމްޓީސީސީން ކުރަމުން އަންނަ ކަމަށެވެ.
ހަމަ އެހެންމެ އެ މަސައްކަތް އަވަސްކޮށްދިނުމަށް ދަންނަވާފައި ވާނެ ކަމަށްވެސް ރައީސް ވިދާޅުވިއެވެ.
ރައީސް ވަނީ ފީއަލީގެ ތަރައްޤީގެ މަސައްކަތްތަކަށް ރަނގަޅު ހައްލެއް ގެނެސްދެއްވާނެ ކަމަށް ވިދާޅުވެފައެވެ.
އެގޮތުން އުއްމީދު ކުރަނީ މާލަސްތަކެއް ނުވެ ބަނދަރަށް ބޭނުންވާ ބޮޑު ހިލަ ގެންދެވި، ރިވެޓްމެންޓް ޖަހާ ގިރައިގެން ގޮސްފައި އޮތް ސަރަހައްދާއި އެކީގައި ރަނގަޅަށް ނުހިކި އޮތް ސަރަހައްދާއި އެއްކޮށް ނިންމާނެ ކަމަށް ރައީސް ވިދާޅުވިއެވެ.
މީގެ އިތުރުން ފިއަލީގެ ބަނދަރު ބޮޑު ކުރުންވެސް ކުރިއަށް ގެންދާނެ ކަމަށްވެސް ރައީސް ވަނީ ވިދާޅުވެފައެވެ.
ފީއަލީގެ މައި މަގުތައް ރަނގަޅު ފެންވަރަކަށް ހަދައި ދިނުމަކީ އެ މަނިކުފާނު ވެފައިވާ ވަޢުދެއްކަން ފާހަގަކުރައްވާ ރައީސް ވިދާޅުވީ ތާރު އަޅައިގެން ރަނގަޅު ފެންވަރަކަށް، ފީއަލީގެ މަގުތައްވެސް ހަދައިދޭނެ ކަމަށެވެ.
ތާވަލު ކުރެވިގެން ބަޖެޓް ހަމަޖެހޭ މިންވަރަކުން މި މަޝްރޫޢުތައް ކުރިއަށްގެންދާނެ ކަމަށްވެސް ރައީސް ވިދާޅުވިއެވެ.
Ads by STO
