ކޮވިޑު-19: ފުރަބަންދު ކަރަންޓީނުގައި ތިބި 20 މީހަކު މިއަދު ފައްސި ވެއްޖެ
މާލެއިން އެކި ރަށްރަށަށް ގޮސް ފުރަބަންދު ކަރަންޓީނު ފުރިހަމަ ކުރާ މީހުންގެ ނެގިފައިވާ ރިލީޒް ސާމްޕަލް ތަކުގެ ތެރެއިން މިއަދު 20 މީހަކު ކޮވިޑު-19 އަށް ފައްސި ވެއްޖެއެވެ.
އެޗްއީއޯސީން އާންމު ކުރި މައުލޫމާތުން ފާހަގަވާ ގޮތުގައި، މިއަދު ކޮވިޑު-19 އަށް ފައްސި ވެފައި ވަނީ ދ.ކުޑަހުވަދޫއިން 3 އަހަރުގެ ފިރިހެން ކުއްޖަކާއި، އެއްމަހުގެ ފިރިހެން ކުއްޖެއްގެ އިތުރުން 24 އަހަރުގެ އަންހެނަކާއި އަދި 34 އަހަރުގެ ފިރިހެނެކެވެ.
ހަމަމިއާއިއެކު، ޅ.ނައިފަރުން 4 މީހަކު ކޮވިޑު-19 އަށް ފައްސި ވެފައިވާއިރު، އޭގެތެރޭގައި ހިމެނެނީ 57 އަހަރުގެ އަންހެނަކާއި، 27 އަހަރުގެ އަންހެނެއްގެ އިތުރުން 18 އަހަރުގެފިރިހެނަކާއި، 27 އަހަރުގެ ފިރިހެނެކެވެ.
ރ.އިނގުރައިދޫއިން ވެސް 4 މީހަކު މިބައްޔަށް ފައްސި ވެފައި ވާއިރު، އޭގެ ތެރޭގައި، 32 އަހަރުގެ ބަންގްލަދޭޝް ފިރިހެނަކާއި، 52 އަހަރުގެ އިންޑިއާ މީހެއްގެ އިތުރުން 26 އަހަރުގެ އަންހެނަކާއި އަދި އެއް އަހަރުގެ އަންހެން ކުއްޖެއް ހިމެނެއެވެ.
ރ.ރަސްމާދޫއިން 65 އަހަރުގެ ފިރިހެނަކު މި ބައްޔަށް ފައްސި ވެފައިވާއިރު، ގއ. ދާންދޫއިން 19 އަހަރުގެ ފިރިހެނަކާއި 59 އަހަރުގެ އަންހެނެއް، ކޮވިޑު-19 އަށް ވަނީ ފައްސިވެފައެވެ. އަދި ށ. ފީވަކުން 54 އަހަރުގެ ފިރިހެނަކު ވެސް މިބައްޔަށް ވަނީ ފައްސި ވެފައެވެ.
ރޭގެ 6 ޖެހުމާއި ހަމައަށްވެސް ރާއްޖޭގެ 31 ރަށަކުންނާއި، 15 ރިސޯޓަކުންވެސް މީހުން ކޮވިޑު-19 އަށް ފައްސި ވެފައި ވާއިރު، ރޭގެ 6 ޖެހުމާ ހަމައަށް ރާއްޖެއިން މި ބައްޔަށްފައްސި ވެފައިވާ މީހުންގެ އަދަދު ވަނީ ޖުމުލަ 7،804 އަށް އަރާފައެވެ. އަދި މިބަލިން ރަނގަޅު ވި މީހުންގެ އަދަދު ވަނީ ޖުމްލަ 5،155 އަށް އަރާފައެވެ.
މިވަގުތު ރާއްޖޭގައި އެކްޓިވެ ކޭސްތަކުގެ ގޮތުގައި ޖުމުލަ 2،615 ކޭސް ހިމެނޭއިރު، ހޮސްޕިޓަލުތަކުން މި ބައްޔަށް މިވަގުތު ފަރުވާ ހޯދަމުންދާ މީހުންގެ އަދަދަކީ ޖުމްލަ 172 އެވެ. އަދި މި ބަލީގައި ރާއްޖެއިން ޖުމްލަ 29 މީހަކު ވަނީ ނިޔާވެފައެވެ.
