ކޮވިޑް-19: ތިނަދޫ އާއްމު ޙާލަތަށް ގެނެސްފި
ގދ. ތިނަދޫ އާއްމު ޙާލަތަށް ގެނެސްފިއެވެ.
މޮނީޓަރިންގެ ޙާލަތުން ތިނަދޫ ނަގާ، އާއްމު ޙާލަތައް އެރަށް ގެނެސްފައިވަނީ މިއަދު ހެނދުނު އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިކަމާއި ގުޅިގެން ނެރުނު ބަޔާނެއްގައި ބުނެފައިވަނީ ތިނަދޫ މޮނީޓަރިންގެ ހާލަތުން އާންމު ހާލަތަށް ގެނައީ އާންމު ސިއްހަތު ރައްކާތެރިކުރުމުގެ ގާނޫނުގެ 12 ވަނަ މާއްދާގެ ދަށުން ކޮވިޑް 19 އިން ރައްކާތެރިވުމަށް ބަލަން ކަނޑައެޅި ކަންކަމަށް ބެލުމުން، އެރަށް މޮނީޓަރިންގެ ހާލަތުގައި ބާއްވާނެ އިތުރު ސަބަބެއް މިވަގުތު ނެތުމުން ކަމަށެވެ.
"ދެން" އަށް މައުލޫމާތު ދެއްވަމުން ތިނަދޫ ކައުންސިލުގެ ކުރީގެ ރައީސް އިބްރާހިމް އަސްޢަދު ވިދާޅުވީ، ޢާއްމު ޙާލަތަށް ގެނެވިފައިވާއިރު ތިނަދޫއިން ފައްސި ވީ ދެމީހުން ކަމަށާއި އެއީ އެރަށުގެ މީހަކާއި އެރަށާއި މާލެއާއި ދެމެދު ދަތުރުކުރާ ބޯޓެއްގައި މަސައްކަތްކުރާ ބިދޭސީއެއް ކަމަށެވެ.
"ބިދޭސީ މީހާ ކުރިން ކަރަންޓީނުވެ ހުރީ އެބޯޓުގައި. ނަމަވެސް މިހާރު ހުރީ ތިނަދޫގައި ގެސްޓްހައުސެއްގައި ކަރަންޓީނުވެ. އެއީ ސަރުކާރުން ހިފާދީފަ ހުރި ތަނެއް" އަސްޢަދު ވިދާޅުވިއެވެ
ތިނަދޫ އިން އެންމެ ފުރަތަމަ ފައްސިވީ އުމުރުން 68 އަހަރުގެ ފިރިހެނެކެވެ. އޭނާ ގއ. ވިލިނގިލީގައި ހުންނަ ކޮވިޑް ފެސިލިޓީއަށް ގެންދަން އުޅުމުން އެރަށުގެ ބަޔަކުވަނީ އެކަމާއި މުޒާހަރާކޮށް، އެމީހާ ވިލިނގިއްޔަށް އެރުވުން ހުއްޓުވާފައެވެ. އެހެންކަމުން އޭނާ މިދިޔަ ހޯމަ ދުވަހު ވަނީ ފަރުވާއަށް މާލެ ގެނެސްފައެވެ.
ދެވަނައަށް އެރަށުން ފައްސި ވެފައިވަނީ، ފުރަތަމަ ފައްސިވީ މީހާ ކޮންޓެކްޓްވީ މީހުންގެ ތެރެއިން މީހެކެވެ.
ރާއްޖޭގައި ކޮވިޑަށް ފައްސިވީ މީހުންގެ ޖުމްލަ އަދަދު މިހާރުވަނީ 8،003 އަށް އަރާފައެވެ. އޭގެތެރެއިން މިހާތަނަށް 5،265 މީހުން ބަލިން ފަސޭހަ ވެފައިވާއިރު 29 މީހުން ވަނީ މިބަލީގައި ނިޔާވެފައެވެ.
