އިންޑިއާގެ މިލިޓަރީ ޑޮކްޓަރުންގެ ފަރާތުން ނުރައްކަލެއް ވެއްޖެ ނަމަ ފޮނުވާލާނަން: ސަރުކާރު
ރާއްޖޭގެ އަސްކަރީ ހޮސްޕިޓަލް، ސެނެހިޔާ ހޮސްޕިޓަލުގައި ތިބި އިންޑިއާ ޑޮކްޓަރުން އަދިވެސް ސެނެހިޔާގައި މަސައްކަތް ކުރަމުންދާކަމަށާއި، އެ ޑޮކްޓަރުންގެ ފަރާތުންވެސް ރާއްޖޭގެ މިނިވަންކަމާއި އިސްތިގުލާލަށް ގެއްލުންވާފަދަ ކަމެއް އޮތްނަމަ، އަނބުރާ ގައުމަށް ފޮނުވާލެވޭނެ ކަަމަށް ހާރިޖީ ވަޒީރު މޫސާ ޒަމީރް މިއަދު ވިދާޅުވެއްޖެއެވެ.
ޒަމީރު މިފަދައިން ވިދާޅުވީ، މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި، ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުންނެވެ. ޒަމީރު ވިދާޅުވީ، ސެނެހިޔާގައި ތިބި ޑޮކްޓަރުންނަކީ 10 ސެޕްޓެމްބަރު 2012 އިން ފެށިގެން ދިވެހި ސިފައިންގެ އެދުމުގެ މަތިން، ސިފައިންނަށް ހިދުމަތް ދިނުމަށް ގެނެސްފައި ތިބި ޑޮކްޓަރުން ކަމަށެވެ.
އިތުރަށް ވަޒީރު ވިދާޅުވީ، ރައީސް ޑރ. މުހައްމަދު މުއިއްޒުގެ ވިސްނުންފުޅަކީ އެ ޑޮކްޓަރުންގެ ފަރާތުން ވެސް ރާއްޖޭގެ މިނިވަންކަމާއި އިސްތިގުލާލަށް ގެއްލުންވާފަދަ ކަމެއް އޮތިއްޔާ، އެ ޑޮކްޓަރުން ވެސް ރާއްޖެއިން ފުރުވާލުން ކަމަށެވެ.
ރައީސް ވިސްނުންފުޅަކީ އެ މީހުންގެ ފަރާތުންވެސް ރާއްޖޭގެ މިނިވަންކަމާއި އިސްތިގުލާލަށް ގެއްލުންވާފަދަ ކަމެއް އޮތިއްޔާ، އަޅުގަނޑުމެންނަށް މިވަގުތު އެ މީހުން ބޭނުން ކުރަން ނުޖެހެންޏާ، އެ ބޭފުޅުން ގެންދިއުމުގެ ކަންތައް އިންޑިއާ ސަރުކާރުގައި ދަންނަވައިގެން ގެންދިއުމުގެ ކަންތައް ކުރަން. އެހެން ނަމަވެސް މިވަގުތަށް އެކަމުގެ ނީޑެއް އޮތް ކަމަކަށް ސަރުކާރަކަށް ނުފެނޭ،".
ދިފާއީ ވަޒީރު ޣައްސާން މައުމޫން ވިދާޅުވީ، އެ ޑޮކްޓަރުން ރާއްޖޭގައި މަސައްކަތް ކުރަނީ ވަރަށް ކުރު މުއްދަތަކަށް، ރޮޓޭޝަނަލް ބޭސިސްއެއްގައި ދައުލަތުން ދޫކުރާ ވިސާއެއްގައި ދަށުން ކަަމަށެވެ. އަދި އެ ޑޮކްޓަރުންގެ މަސައްކަތަކީ، ސިފައިންނަށާއި، ސެނެހިޔާއިން ހިދުމަތްހޯދާ ފަރާތްތަކަށް ސިއްހީ ހިދުމަތް ދިނުން ކަމަށެވެ. އެ ޑޮކްޓަރުންނަކީ އަސްކަރީ ރޯލެއް އޮންނަ ބައެއް ނޫން ކަމަށް ވެސް ޣައްސާން ވިދާޅުވިއެވެ.
"އެ މީހުންގެ މަސައްކަތް ހުންނާނީ ސެނެހިޔާގައި ސިއްހީ ގޮތުން އަޅުގަނޑުމެންގެ ސިފައިންނަށާއި ސެނެހިޔާއިން ހިދުމަތް ހޯދާ މީހުންނަށް، ހަމަ ޑޮކްޓަރުން ދޭ ހިދުމަތް ދިނުން، އަދި ރޮޓޭޓްވާއިރު އަންނަ މީހުންނަކީ ރިކުއާމެންޓް އޮތްގޮތަކުން މިކޮޅުން އެދިގެން އަންނަ މީހުން، އެއްވެސް ކަހަލަ އަސްކަރީ ރޯލެއް އޮންނަ ބައެއް ނޫން ސެނެހިޔާގައި ތިބޭ ޑޮކްޓަރުންނަކީ،". ޣައްސާން ވިދާޅުވިއެވެ.
ޣައްސާން ވެސް ވިދާޅުވީ، އެ ޑޮކްޓަރުންގެ ފަރާތުން ރާއްޖޭގެ މިނިވަންކަމާއި އިސްތިގުލާލަށް ބުރޫއަރާ ފަދަ ހާލަތެއް ފެނިއްޖެނަަ، އެކަން ދިވެހި ދައުލަތުން އިންޑިއާ ސަރުކާރުގައި ދަންނަވައިގެން، އެ މީހުން އަނބުރާ ގެންދެވޭނެ ކަމަށެވެ.
