ސަރުކާރުގެ ހަރަދުގައި ނިކަމެތިން ހައްޖަށް ފޮނުވުމަކީ މައްސަލައެއް ނޫން: ޒައިދު
ސަރުކާރުގެ ހަރަދުގައި ސަރުކާރުން ކަނޑައަޅާ އުސޫލެއްގެދަށުން ނިކަމެތިންގެ ބަޔަކު ހައްޖަށް ފޮނުވުމަކީ މައްސަލައެއް ނޫން ކަމަށް ޝެއިހް އަލީ ޒައިދު ވިދާޅުވެއްޖެ އެވެ.
މިއަދު އެކްްސްގައި ކުރެއްވި ޕޯސްޓެއްގައި ޒައިދު ވިދާޅުވީ، ރާޖިހު މަސްލަހަތަކަށް ރިއާޔަތްކޮށް އެބާރު ވަލިއްޔުލް އަމްރަށް އޮންނާނެ ކަމަށް ގަބޫލުކުރެވޭ ކަމަށެވެ.
"އަމިއްލަ ތަނަވަސްކަން ނެތުމުން ހައްޖު ވާޖިބު ނުވުމަކީ އެބަޔަކު ދައުލަތުގެ ހަރަދުގައި ހައްޖަށް ފޮނުވުމުގައި އޮތް ހުރަހެއް ނޫން،" ޒައިދު ވިދާޅުވި އެވެ.
ޒައިދު މިފަދައިން ވިދާޅުވެފައިވަނީ، ހައްޖުގެ އަޅުކަން ކުރަން ޖެހޭނީ އެކަމަށް ކުޅަދާނަކަން ލިބިގެންވާ މީހާ ކަމަށާއި، އެކަމަށް ކުޅަދާނަކަން ލިބިގެންނުވާ މީހުން ހައްޖަށް ފޮނުވަން ބައިތުލްމާލުން ހަރަދު ކޮށްގެން ނުވާނެ ކަމަށް ރާއްޖޭގެ މަޝްހޫރު ދީނީ އިލްމުވެރިޔާ ޑރ. މުހައްމަދު އިޔާޒް އަބްދުއްލަތީފް ވިދާޅުވެފައިވަނިކޮށެެވެ.
އިޔާޒް ވިދާޅުވީ، ހައްޖުގެ އަޅުކަމަކީ އެކަމަށް ކުޅަދާނަކަން ލިބިގެންވާމީހާ ކުރަންޖެހޭ އަޅުކަމެއް ކަމަށެވެ. އެހެންކަމުން ނިކަމެތިން ހައްޖަށް ފޮނުވުމަށް ބައިތުލް މާލުން ނުވަތަ ޒަކާތު ފައިސާ އިން ހަރަދު ކޮށްގެން ނުވާނެ ކަމަށް ވިދާޅުވި އެވެ.
ސަރުކާރުން ވަނީ ސަރުކާރުން ވެފައިވާ ވައުދާއި އެއްގޮތަށް ފުރަތަމަ 50 ފަގީރުން ހިލޭ ހައްޖަށް ފޮނުވަން ނިންމާފަ އެވެ.
ހިލޭ 1،000 ފަގީރުން ހައްޖަށް ފޮނުވުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދު ފުއްދުމުގެ ގޮތުން އެންމެ ފުރަތަމަ ހައްޖަށް ފޮނުވުމަށް ހަމަޖެހިފައިވަނީ 50 މީހުންނެވެ. އަދި އެކި އަހަރުތަކުގައި މި އަދަދު އިތުރުވެގެންދާނެ ކަމަށް ސަރުކާރުން ބުނެފައިވެ އެވެ.
ސަރުކާރުގެ ހަރަދުގައި 50 މީހުން ހައްޖަށް ފޮނުވާއިރު ބަލާނީ ފަގީރުންގެ ދަފްތަރަށެވެ. ފަގީރުންގެ ދަފުތަރުގައި އުމުރުން 50 އަހަރާއި 69 އަހަރާ ދެމެދުގެ 982 މީހުން ތިބި ނަމަވެސް ގުރުއަތުލުން މިއަދު ބާއްވާފައިވަނީ އޭގެތެރެއިން ޝަރުތު ހަމަވި 667 މީހުންގެ މެދުގަ އެވެ.
