ދަރިވަރުންނަށް ހާއްސަ ދެ އެވޯޑަކަށް ކުރިމަތިލުމުގެ ފުރުސަތު އެޗްއާރުސީއެމް އިން ހުޅުވާލައިފި
ދަރިވަރުންނަށް ހާއްސަކޮށްގެން ދޭ ދެ އެވޯޑަކަށް ކުރިމަތިލުމުގެ ފުރުސަތު ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ހުޅުވާލައިފި އެވެ.
ސްކޫލްތަކުގެ ހިއުމަން ރައިޓްސް ކްލަބްތަކުންނާއި އެ ކްލަބްތަކުގެ ދަރިވަރުން ކުރާ މަސައްކަތުގެ އަގުވަޒަން ކުރުމުގެ ގޮތުން އެޗްއާރުސީއެމް އިން ވަނީ "ބެސްޓް ހިއުމަން ރައިޓްސް ކްލަބް 2023-2024" އެވޯޑް އަދި "ޔަންގް ހިއުމަން ރައިޓްސް އެޑްވޮކޭޓް 2023-2024" އެވޯޑަށް ކުރިމަތިލުމުގެ ފުރުސަތު މިއަދުން ފެށިގެން އަންނަ ޖުލައި މަހުގެ 11 ގެ ނިޔަލަށް ހުޅުވާލާފަ އެވެ،
މި ދެ އެވޯޑް ދެވޭނީ އެޗްއާރުސީއެމް އިން ބުނިގޮތުގައި ކޮންމެ ދިރާސީ އަހަރެއްގެ އެވޯޑަށް ކުރިމަތިލާ ފަރާތްތަކުގެ ތެރެއިން އެންމެ މަތިން ޕޮއިންޓް ހާސިލުކޮށްފައިވާ އެންމެ ހަރަކާތްތެރި ހިއުމަން ރައިޓްސް ކްލަބަކަށާއި ހިއުމަން ރައިޓްސް ކްލަބްގެ ދަރިވަރަކަށެވެ.
އިންސާނީ ހައްގުތަކަށް ސްކޫލްތަކުގެ ދަރިވަރުން އަހުލުވެރިކުރުވައި، މުސްތަގުބަލްގައި ހިއުމަން ރައިޓްސް ޑިފެންޑަރުންގެ ގޮތުގައި މަސައްކަތްކުރާނެ ދަރިވަރުންތަކެއް އުފެއްދުމަށް ބާރުއެޅުމުގެ ގޮތުން ދޭ މި ދެ މި އެވޯޑަށް ކުރިމަތިލުމަށް ހުށަހަޅަންޖެހޭ އެޕްލިކޭޝަން ފޯމް، އެވޯޑަށް ހޮވުމުގައި ބަލާނެ މިންގަނޑު، އަދި އިތުރު މައުލޫމާތު އެ ކޮމިޝަނުގެ ވެބްސައިޓުން ލިބޭނެ އެވެ. އެވޯޑަށް ކުރިމަތިލުމަށް އެޕްލިކޭޝަން ހުށަހެޅުމަށް [email protected] އަށް ފޯމާއެކު ހުށަހަޅަންޖެހޭ އިތުރު ލިޔުންތައް އީމެއިލް ކުރަން ޖެހެ އެވެ.
