ކޮމިޓީގައި ޖަވާބުދާރީވުމަށް ގަވަރުނަރަށް ފުރުސަތު ދެނީ
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަލީ ހާޝިމް ޖަވާބުދާރީކުރުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރަން ނިންމައިފި އެވެ.
ގަވަރުނަރުގެ މަގާމުން އަލީ ހާޝިމް ވަކިކުރުމުގެ މައްސަލަ މާލިއްޔަތު ކޮމިޓީއަށް އިއްޔެ ހުށަހެޅުއްވީ، ދިއްގަރު ދާއިރާގެ މެމްބަރު އަހުމަދު ނާޒިމް އެވެ. އޭނާ މަގާމުން ވަކިކުރުމަށް ކޮމިޓީން ނިންމުމުން މިއަދުގެ މަޖިލީހުގެ ޖަލްސާގައި ރިޔާސަތުން ވަނީ އެ މައްސަލަ ތަޅުމުގައި އިއުލާނުކުރައްވައި ކޮމިޓީއަށް އެ މައްސަލަ ފޮނުއްވާފަ އެވެ.
މީގެ އިތުރުން ކޮމިޓީން ވަނީ ގަވަރުނަރުގެ ފަރާތުން ފިނޭންސް މިނިސްޓްރީއަށް އެއްބާރުލުން ލިބޭތޯ ބެލުމަށް އެ މިނިސްޓްރީއަށް ސިޓީއެއް ފޮނުވުމަށް ވެސް ފާސްކޮށްފަ އެވެ.
ގާނޫނުގައި ޖަވާބުދާރީވުމަށް ފަސް ދުވަހުގެ މުއްދަތު ދިނުމަށްފަހު ގަވަރުނަރު ހާޒިރުކުރާނީ މި މަހުގެ 15 ވަނަ ދުވަހު އެވެ.
މާލިއްޔަތު ކޮމިޓީން ގަވަރުނަރުގެ މަގާމުން ހާޝިމް ވަކިކުރުމަށް ނިންމި ސަބަބުތަކަކީ:
- ރާއްޖޭގައި ހިންގާ ބޭންކުތަކާއި ފައިނޭންޝަލް އިންސްޓިޓިއުޓްތަކުން އާއްމުންނަށް ލޯނު ދޫކުރާ މިންވަރު ނުސީދާކޮށް ހިފަހައްޓައި ބޭންކުތަކުގެ ރިޒާމް އެމްއެމްއޭގައި ބެހެއްޓުމަށް ގަވަރުނަރު ވަނީ ބާރުއަޅުއްވާފަ؛ އެގޮތަށް އަމަލުކުރުމުން އިގްތިސާދުގައި ދައުރުވާން ހުރި ފައިސާ މަދުވެ، އިގްތިސޯދީ މަސައްކަތްތައް ހުއްޓި، ގައުމުގެ އިގްތިސާދީ ދުވެލި މަޑުޖެހިފައިވާކަން
- ސަރުކާރުން ވެސް މިހާރު ފައިސާ ހޯދަނީ ޑޮމެސްޓިކް މާކެޓުން ކަމަށްވާތީ ޑޮމެސްޓިކް މާކެޓް ރަނގަޅަށް ރެގޮއުލޭޓްކުރުމުގެ މުހިއްމުކަން ބޮޑުވެފައިވާ ވަގުތެއްގައި އެކަން ކުރަމުންދާތައް ނުފެންނަކަން
- މިނިސްޓަރު ހޯމް އެފެއާޒްއާއި ފުލުހުންގެ ފަރާތުން މަޖިލީހުގެ ސަލާމަތީ ކަންކަމާ ބެހޭ ކޮމިޓީއާއި ހިއްސާކޮށްފައިވާާ މައުލޫމާތުތަކުގައި ކުށްކުރަން ހުއްޓުވުމަށް ހުރި ގޮންޖެހުންތަކުގެ ތެރޭގައި މޯލްޑިވްސް މަނިޓަރީ އޮތޯރިޓީ ގެ ގަވާއިދުތައް އަދާހަމަކޮށްފައިނުވާ މައްސަލަ ފާހަގަކޮށްފައިވޭ
- 17 ނޮވެމްބަރު 2023 އިން ފެށިގެން ވޭތުވެދިޔަ މުއްދަތުގެ ތެރޭގައި ސަރުކާރަށް ލަފާދިނުމާއި އަދި އެމްއެމްއޭގެ މަގްސަދުތައް ހާސިލުކުރުމަށް މަސައްކަތް ކޮށްފައިނުވާކަން
- އެމްއެމްއޭގެ އިސްވެރިޔާގެ ހައިސިއްޔަތުން ގަވަރުނަރުގެ މަސްއޫލިއްޔަތު ހާޝިމް އަދާނުކުރައްވާކަން
- މިވަގުތު އެ އޮތޯރިޓީއަަށް އާ ލީޑާޝިޕެއް ބޭނުންވޭ
