އެކްސްޕެޓް ސިސްޓަމްގެ ބެކްލޮގް ބޮޑުވެ، ހިދުމަތް ނުލިބި 8،107 ފަރާތް
އެކްސްޕެޓް ސިސްޓަމްގެ ބެކްލޮގް ބޮޑުވެ، މިހާތަނަށް ހިދުމަތް ފޯރުކޮށްދޭން ޖެހޭ 8،107 ފަރާތް އެބަތިބި ކަމަށް ހޯމްލޭންޑް މިނިސްޓްރީގެ ސްޓޭޓް މިނިސްޓަރު އަބްދުލްމަޖީދު އިބްރާހިމް ވިދާޅުވެއްޖެ އެވެ.
ހޯމްލޭންޑް މިނިސްޓްރީން އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި ރެކްރޫޓްމަންޓް އަދި ވޯކްޕާމިޓް އިޝުއަރެންސް ކަންތަކުގައި ހޯމްލޭންޑް މިނިސްޓްރީން ކުރަމުން އަންނަ ކަންކަމާއި ރޭވިފައި ހުރި ކަންކަމާ ގުޅޭގޮތުން ވާހަކަ ދައްކަވަމުން މަޖީދު ވިދާޅުވީ ބިދޭސީ މަސައްކަތްތެރިންގެ މައްސަލައަށް ހައްލު ހޯދުމަކީ މި ސަރުކާރުގެ މުހިންމު ވައުދެއް ކަމަށެވެ. ސަރުކާރުން ހަވާލުވިއިރު ގަވާއިދާ ހިލާފަށް ރާއްޖޭގައި މަސައްކަތް ކުރާ ބިދޭސީންގެ އަދަދު އިތުރުވެފައިވާކަން މަޖީދު ފާހަގަކުރެއްވި އެވެ.
"އެވްރެޖްކޮށް އަޅުގަނޑުމެންނަށް ކޮންމެ ހަފުތާއަކު 12،500 ރިކުއެސްޓް ލިބޭ މި ދަންނަވާ ހިދުމަތްތަކުގެ ތެރެއިން. ދެން މި ވަގުތުގައި ޕެންޑިން، އަޅުގަނޑުމެންގެ ބެކްލޮގްގެ ގޮތުގައި މި ހުރީ 8،107. އަޅުގަނޑުމެން ހިދުމަތް ފޯރުކޮށްދޭން ޖެހޭ ނޫނީ ރިކުއެސްޓްގެ ގޮތުގައި އައިއްސަ ހުރި،" މަޖީދު ވިދާޅުވި އެވެ.
އެކްސްޕެޓް ސިސްޓަމްގެ ތެރެއިން ފޯރުކޮށްދޭ ހިދުމަތް ލަސްވުމަކީ ރައްޔިތުންގެ ޝަކުވާ އެކަމުގައި އޮތް ކަމެއްކަން ފާހަގަކުރައްވާ މަޖީދު ވިދާޅުވެފައި ވަނީ ހިދުމަތް ލަސްވުމުގައި ސަބަބުތަކެއް އެބަހުރި ކަމަށެވެ. ހޯމްލޭންޑް މިނިސްޓްރީގެ ދަށަށް އެ ހިދުމަތް ދިނުން އައިއިރު، އެކްސްޕެޓް ސިސްޓަމްގެ ތެރެއިން ހުރި ބައެއް ހިދުމަތްތަކަކީ އެހެނިހެން މިނިސްޓްރީގެ ދަށުގައި ހުރި ކަންކަން ކަމަށް އޭނާ ވިދާޅުވި އެވެ. މަޖީދު ވިދާޅުވި ގޮތުގައި އެގޮތުން ސައިޓް އިންސްޕެކްޓް ކުރުމަށް ސައިޓް އިންސްޕެކްޓަރުންގެ ގޮތުގައި ތިއްބެވި ބޭފުޅުންނަކީ އިކޮނޮމިކް މިނިސްޓްރީގެ ބެލުމުގެ ދަށުގައި ތިއްބެވި ބޭފުޅުން ކަމުގަ އެވެ.
ވޯކްޕާމިޓް އިޝޫ ކުރުމާ ގުޅޭގޮތުން ދެމުން އަންނަ ހިދުމަތަކީ ހޯމްލޭންޑް މިނިސްޓްރީގެ ދަށުން މަސައްކަތް ނުކުރެވޭ ގޮތަށް އައުޓްސޯސްކޮށްފައިވާ ހިދުމަތެއް ކަމަށް މަޖީދު ވިދާޅުވި އެވެ. ހިދުމަތް ފޯރުކޮށްދިނުމުގައި ލަސްތަކެއް ހުރިކަން ގަބޫލުކުރައްވާކަން ފާހަގަކުރައްވާ އޭނާ ވިދާޅުވެފައި ވަނީ މިނިސްޓްރީގެ އަމާޒަކީ މި ހިދުމަތްތައް އެއްފުރާޅެއްގެ ދަށަށް ގެނެސް ހޯމްލޭންޑް މިނިސްޓްރީގެ ދަށުން މުޅި ސިސްޓަމް މެނޭޖްކުރެވޭނެ ގޮތްތަކެއް ހޯދުން ކަމަށެވެ.
އެކްސްޕެޓް ސިސްޓަމްގެ ތެރެއިން ފޯރުކޮށްދެމުން އަންނަ ހިދުމަތްތައް:
- ސައިޓް ރަޖިސްޓްރޭޝަންގެ ހިދުމަތް
- ކޯޓާ އާ ގުޅޭ ހިދުމަތް
- ވޯކްޕާމިޓާ ގުޅޭ ހިދުމަތް
- ޑިޕޮސިޓް ފައިސާ އާ ގުޅޭ ހިދުމަތް
- ކަމާ ގުޅުންހުރި އިތުރު ހިދުމަތްތައް
