ބަންދު އަމުރުގެ އިސްތިއުނާފް 7 ދުވަސް ތެރޭ ނިންމަންޖެހޭ ގޮތަށް ފާސް ކޮށްފި
ޝަރުއީ ކޯޓެއްގެ އަމުރެއް ނުވަތަ ހުކުމެއް ނުވަތަ ނިންމުމެއް، މަތީ މަރުހަލާގެ ކޯޓެއްގައި އިސްތިއުނާފު ކުރުމުން، އިސްތިއުނާފް ކުރާ ތާރީހުން ފެށިގެން ހަތް ދުވަހުގެ ތެރޭގައި އެމައްސަލައެއް ކޯޓުން ބަލާ ނިންމަން ޖެހޭ ގޮތަށް ޖިނާއީ އިޖުރާއަތުގެ ގާނޫނަށް އިސްލާހު ގެންނަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
ސަރުކާރުގެ ފަރާތުން ހުށަހަޅާފައިވާ މި ބިލަށް މަޖިލީހުގެ 59 މެންބަރުން ވަނީ ވޯޓު ދެއްވާފައެވެ. އަދި މި ބިލް ފާސް ކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވައެވެ.
އިސްތިއުފާނަށް ހުށަހެޅޭ މައްސަލަތައް މަތީ މަރުހަލާގެ ކޯޓުތަކުން ހަތް ދުވަސް ތެރޭގައި ނިންމަން ޖެހޭ ގޮތަށް މަޖިލީހުން މިއަދު ފާސްކުރިއިރު، މީގެ ކުރިން އިސްތިއުނާފަށް ހުށަހެޅޭ މައްސަލަތައް ނިންމުމުގައި ވަކި މުއްދަތެއް ނޯވެއެވެ.
މީގެ އިތުރުން މަތީ މަރުހަލާގެ ކޯޓަށް އިސްތިއުނާފުގެ މައްސަލަ ހުށަހަޅަން އޮންނަ މުއްދަތު އިތުރުކޮށްފައި ވެއެވެ. ކުރިން އޮތް މުއްދަތަކީ 30 ދުވަހެވެ. މަޖިލީހުން މިއަދު ފާސްކުރިބިލުގައިވާ ގޮތުން، ހުކުމެއް އިއްވާތާ 60 ދުވަސް ތެރޭގައި އިސްތިއުނާފް ކުރެވޭނެއެވެ.
