ޖައިޝަންކަރު ރާއްޖެ ވަޑައިގަންނަވަނީ
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ އެސް ޖައިޝަންކަރު އަންނަ މަހު ރާއްޖެ ވަޑައިގަންނަވާ ގޮތަށް ހަަމަޖެހިއްޖެ އެވެ.
އިންޑިއާގެ "ވިއޯން" ނޫހުން ރިޕޯޓްކޮށްފައިވާ ގޮތުން ޖައިިޝަންކަރު ރާއްޖެ ވަޑައިގަންނަވާނެ ކަމަށް ބެލެވެނީ އޮގަސްޓު މަހުގެ 9 ގެ ފަހުންނެވެ. ސީދާ ތާރީހެއް ދީފައެއް ނުވެ އެވެ. ތިން ދުވަހަށް ކުރާ މި ދަތުރުގައި ޖައިޝަންކަރު ފޮރިން މިނިސްޓަރު މޫސާ ޒަމީރު އާއި ރައީސް ޑރ މުހައްމަދު މުއިއްޒުއާ ރަސްމީ ވާހަކަތައް ބާއްވާނެ އެވެ.
ޖައިޝަންކަރު ރާއްޖެ ވަޑައިގަންނަވަން ހަމަޖެހިފައިވާއިރު، ފޮރިން މިނިސްޓަރު ޒަމީރު މޭ މަހު އިންޑިއާއަށް ރަސްމީ ދަތުރެއްގައި ވަޑައިގަތެވެ. އޭގެ ފަހުން އިންޑިއާގެ ބޮޑުވަޒީރު ނަރެންދުރަ މޯދީ ތިންވަނަ ދައުރުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް ރައީސް މުއިއްޒުވެސް އެ ގައުމަށް ވަޑައިގެންނެވި އެވެ.
އިންޑިއާއިން ރާއްޖެ އަންނަ ފަތުރުވެރިން ގިނަ ކުުރުމަށް ޓޫރިޒަމް މިނިސްޓަރު އިބްރާހިމް ފައިސަލް ހުންނެވީ އިންޑިއާގަ އެވެ. ފައިސަލް ވަނީ އިންޑިއާގެ ޓޫރިޒަމް މިނިސްޓަރު ގަޖަންދުރަ ސިންގް އާއި ސިވިލް އޭވިއޭޝަން މިނިސްޓަރު ކިންޖަރާޕޫ ރާމްމޯހަން ނައިޑޫއާ ބައްދަލުކޮށްފަ އެވެ.
