އެކްސިޑެންޓްވި މީހާގެ މައިބަދައިގައި ވަނީ ރެނދުލާފައި، ހާލު ސީރިއަސް
ހުޅުމާލޭގައި އިއްޔެ ހިނގި ނުރައްކާތެރި އެކްސިޑެންޓުގައި މަގުގެ އެއްފަރާތުގައި ސައިކަލެއްގައި މަޑުކޮށްގެން ހުއްޓާ ރޭސިން ކާރަކުން ޖެހި އަނިޔާވި މީހާގެ މައިބަދައިގައި ރެނދުލާފައިވާ ކަމަށާއި އެ މީހާގެ ހާލު ސީރިއަސް ކަމަށް ފުލުހުން ކޯޓުގައި މިއަދު ބުނެފި އެވެ.
އެކްސިޑެންޓުގެ ސީސީޓީވީ ފުޓޭޖުގެ ވީޑިއޯއިން ފެންނަ ގޮތުން ކޮންޓްރޯލުން ނައްޓާލާފައިވާ އެ ކާރުން ޖެހުމާ އެކު، އެ މީހާ ވިއްސައިގެންދެ އެވެ. އެކްސިޑެންޓުވި ކާރުގައި ތިބި ތިން މީހުން ހައްޔަރުކޮށް، ބަންދުގެ މުއްދަތު ޖަހަން ކްރިމިނަލް ކޯޓަށް ހާޒިރުކުރުމުން ހާދިސާ ހިނގާދިޔަ ގޮތް ފުލުހުން ކޯޓުގައި ކިޔައިދީފައިވެ އެވެ.
ފުލުހުން ކޯޓުގައި ބުނީ، ކާރުން ޖެހުމުން ވިއްސައިގެން ގޮސް ފުރަތަމަ ޖެހުނީ އެ މީހާގެ ކަނދުރާ ކަމަށެވެ. އަދި އެމީހާއަށް ވަރަށް ބޮޑެތި އަނިޔާތަކެއްވެފައިވާ ކަމަށެވެ.
"ކަނދުރާގައި ރެނދުލާފައި ހުރި ކަމަށާއި، ބޯ ފަޅައިގެން ގޮސްފައިވާ ކަމަށާއި، ބެކްބޯން ގައި ރެނދުލާފައި ކަމަށާއި، ހާލަތު ސީރިއަސް ކަމަށް އައިއޯ (ފުލުހުންގެ އިންވެސްޓިގޭޝަން އޮފިސަރު) ބުނެފައިވޭ" ކްރިމިނަލް ކޯޓުން މިއަދު ނެރުނު ކޯޓު އަމުރުގައި ބުންޏެވެ.
ހައްޔަރުކުރި މީހުން ކޯޓުގައި ބުނީ، އަނިޔާވި މީހާ ފެނުނުއިރު އެ މީހާގެ ބޮލުން ލޭ ފައިބަމުން ދިޔަކަމަށާއި، އަދި ނޭވާލާން އުދަނގޫވެގެން އުޅުނުކަން ފާހަގަކުރެވުނު ކަމަށެވެ.
"ތުހުމަތުކުރެވޭ ފަރާތުގެ މި ވާހަކަތަކުންވެސް އަނިޔާ ލިބުނު ފަރާތައް ބޮޑެތި އަނިޔާތަކެއް ލިބިފައިވާކަން އެނގޭ ކަމަށް" ކޯޓު އަމުރުގައިވެ އެވެ.
މައްސަލަގާއި ހައްޔަރުކުރި މީހުން ވަނީ އެ މީހުންގެ ބަންދަށް ލުޔެއް ދިނުމަށް އެދިފަ އެވެ. އަދި އެ މީހުންނަކީ ވަރަށް ޒިންމާދާރުކޮށް އުޅޭ ބައެއް ކަމަށްވެސް ބުންޏެވެ.
އެހެން ނަމަވެސް ކޯޓުން ވަނީ ކާރު ދުއްވަން އިން އިކްރާމުއްރަހްމާން އާއި އިބްރާހިމް އިކްރާމް ޝަރީއަތް ނިމެންދެން ބަންދުކޮށްފަ އެވެ. އަދި ނާޖިހު އިސްމާއިލްގެ ބަންދަށް 15 ދުވަސް ޖަހާފަ އެވެ.
Ads by STO
