ހަތް މެންބަރުން ތިބޭ ގޮތަށް މިސްކިތްތަކުގެ ގައުމީ މަޖިލީހުގެ އާ ގަވާއިދު އާންމުކޮށްފި
ހަތް މެންބަރުން ތިބެން ޖެހޭ ގޮތަށް މިސްކިތްތަކާ ބެހޭ ގައުމީ މަޖިލީހުގެ އާ ގަވާއިދު އާންމުކޮށްފި އެވެ.
އިސްލާމިކް މިނިސްޓްރީއިން މިދިޔަ ބުރާސްފަތި ދުވަހު އާންމުކުރި އާ ގަވާއިދުގައި ބުނެފައިވާ ގޮތުގައި, އޭގެ މައި މަގުސަދަކީ މިސްކިތްތަކުގެ ދައުރު ފުޅާކުރުމަށް އިމާމުންނާއި މުދިމުންނަށް މަތިކޮށްފައިވާ ޒިންމާތަކަށް ރައްކާތެރިވުމަށާއި އެކަމަށް ހުރުމަތްތެރިކޮށް ހިތުމަށް ބާރު އެޅުމެވެ.
އަދި މިސްކިތްތަކާއި އިމާމުންނާއި މުދިމުންގެ ކަންކަމުގައި މިނިސްޓަރަށް ބޭނުންވާ އިސްތިޝާރީ ލަފާ ދިނުމަކީ ވެސް އާ ގަވާއިދުގެ މަގުސަދެއް ކަމަށް ބުނެފައިވެ އެވެ. މިސްކިތްތަކާއި އަޅުކަމާ ގުޅުން ހުރި ކަންކަމުގައި ދީނީ ގޮތުން އެއް މިންގަނޑެއް ހިފެހެއްޓުމަށް ބާރުއެޅުމާއި މިސްކިތްތަކުގެ ހާލަތު މެދުނުކެނޑި ދެނެގަނެވޭނެ ނިޒާމެއް ގާއިމުކުރުމަކީ ވެސް މަގުސަދެއް ކަމަށް ލިޔެފައިވެ އެވެ.
ހަތް މެންބަރުގެ މައްޗަށް އެކުލަވާލާފައިވާ އެ މަޖިލީހުގެ ތިއްބަވަނީ:
- މަސްޖިދުއްސުލްތާން މުހައްމަދު ތަކުރުފާނުލް އައުޡަމްއިން އައްޔަންކުރާ އިސް އިމާމެއް.
- މިނިސްޓްރީގެ މޮސްކް މެނޭޖްމަންޓް ސެކްޝަންގެ އިސްވެރިޔާ.
- ޤުރުއާނާ ބެހޭ ގައުމީ މަރުކަޒުގެ އިސްވެރިއެއް.
- ލޯކަލް ގަވަމަންޓް މިނިސްޓްރީއިން ކަނޑައަޅާ ފަރާތެއް.
- މާލެ ސިޓީ ކައުންސިލުން ކަނޑައަޅާ ފަރާތެއް.
- ހެރިޓޭޖް މިނިސްޓްރީއިން ކަނޑައަޅާ ފަރާތެއް.
- އާންމު ރައްޔިތުންގެ ތެރެއިން މިނިސްޓަރު އައްޔަން ކުރާ ފަރާތެއް.
އެ މަޖިލީހުގެ ރައީސްއަކީ މަސްޖިދުއްސުލްޡާން މުހައްމަދު ތަކުރުފާނުލް އައުޡަމަށް ރައީސް އައްޔަނުކޮށްފައި ހުންނަ އިސް އިމާމެވެ. ނައިބު ރައީސް އަކީ މިނިސްޓްރީގެ މޮސްކް މެނޭޖްމަންޓް ސެކްޝަންގެ އިސްވެރިޔާ އެވެ.
އެ މަޖިލީހަށް އައްޔަންކުރާ މެންބަރުންގެ ދައުރަކީ ފަސް އަހަރު ދުވަހެވެ. އަދި އިސްތިއުފާ ދިނުމާއި މެންބަރުގެ ދައުރު ހަމަވުމާއި ވަކިކުރުން ފަދަ ހާލަތެއް މެދުވެރިވެއްޖެނަމަ 30 ދުވަހުގެ ތެރޭގައި އެ މަގާމަށް މީހަކު އައްޔަންކުރަން ޖެހޭނެ ކަމަށް ގަވާއިދުގައި ބުނެފައިވެ އެވެ.
އެ މަޖިލީހުގެ މެންބަރުގެ ޝަރުތުތަކަކީ ދިވެހި ރައްޔިތެއް ކަމުގައިވުމާއި ޖިނާއީ ކުށެއް ކުރިކަން ޝަރީއަތަށް ސާބިތުވެފައިވާ ފަރާތަކަށް ނުވުމެވެ.
އޭގެ އިތުރުން ލޯކަލް ގަވަމެންޓް މިނިސްޓްރީއާއި ހެރިޓޭޖް މިނިސްޓްރީ އަދި ސިޓީ ކައުންސިލުން އައްޔަންކުރާ ފަރާތްތަކަކީ މަޖިލީހުގެ މަސްއޫލިއްޔަތުތަކާއި ޒިންމާތައް އަދާކުރެވޭ ފަދަ އިލްމީ ގާބިލުކަން ހުރި އަދި ހިންގުމުގެ ތަޖުރިބާއާއި މަސައްކަތުގެ އަހްލާގު ހުރި ފަރާތްތަކެއް ކަމުގައި ވާން ޖެހޭނެ ކަމަށެވެ.
އެ މަޖިލީހަށް އާންމު ރައްޔިތުންގެ ތެރެއިން މިނިސްޓަރު އައްޔަންކުރާ ފަރާތަކީ މަޖިލީހުގެ މަސްއޫލިއްޔަތުތަކާއި ޒިންމާތައް އަދާކުރެވޭ ފަދަ އިލްމީ ގާބިލުކަން ހުރި ފަރާތަކަށް ވާން ޖެހެ އެވެ.
އެ މަޖިލީހުގެ ރައީސްގެ ޒިންމާއަކީ އެންމެހާ މަސައްކަތްތައް ރާވައި ހިންގުމާއި މަޖިލީހުގެ ބައްދަލުވުންތަކުގެ އެޖެންޑާ ކަނޑައެޅުމާއި ރިޔާސަތު ބެލެހެއްޓުމާއި ބައްދަލުވުންތަކުގެ އުސޫލުތައް ހިފެހެއްޓުމެވެ. އަދި މަޖިލީހަށް ހުށަހެޅޭ މައްސަލަތަކުގައި މަޖިލީހުން ނިންމާ ނިންމުތައް މިނިސްޓަރަށް ހުށަހެޅުމެވެ.
ނައިބު ރައީސްގެ ޒިންމާއަކީ މަޖިލީހުގެ ރައީސް ނެތް ހާލަތެއްގައި ވަގުތީ ގޮތުން އެ މަސްއޫލިއްޔަތުތަކާ ހަވާލުވުމާއި މަޖިލީހުގެ ރައީސް ހަވާލުކުރާ މަސައްކަތްތައް ކުރުމެވެ. އަދި ރައީސްގެ މަސްއޫލިއްޔަތުތައް އަދާކުރުމަށް އެހީތެރިވުމުވެ.
އެ މަޖިލީހުގެ މެންބަރުންގެ ޒިންމާއަކީ މަޖިލީހުގެ ބައްދަލުވުންތަކަށް ހާޒިރުވުމުގެ އިތުރުން ރައީސް ހަވާލުކުރާ މަސްއޫލިއްޔަތުތައް އަދާކުރުމާއި މަޖިލީހުގެ މަސައްކަތްތަކަށް ރިއާޔަތްކޮށް މަޖިލީހުގެ މަސްލަހަތު ކުރިއަރުވަން މަސައްކަތް ކުރުމެވެ.
