Monday, 16 November 2026
Advertisement
HDC — Share-Below (leaderboard)
ސަރުކާރު

ރިސޯޓުތަކުގެ ބޮޑު މުސާރަ ލިބޭ ވަޒީފާތަކަށް ދިވެހިން ގެނައުމަކީ އަމާޒެއް: ފައިސަލް

ރިސޯޓުތަކުގެ ބޮޑު މުސާރަ ލިބޭ ވަޒީފާތަކަށް ދިވެހިން ގެނައުމަކީ އަމާޒެއް: ފައިސަލް
ފަތުރުވެރިކަމުގެ ސިނާއަތުގައި މަސައްކަތްކުރާ ދިވެހިން އަބަދު އާދައިގެ ވަޒީފާތަކުގައި މަސައްކަތް ކުރުމަކީ ގަބޫލުކުރެއްވޭ ކަމެއް ނޫން ކަމުގައި ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ. ރާއްޖެ ޕްރޮމޯޓްކުރާ މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން މިއަދު ބޭއްވި ނޫސްވެރިންގެ ބައްދަލުވުމުގައި ފައިސަލް ވިދާޅުވީ ރާއްޖޭގެ ބައެއް ލަގްޒަރީ ރިސޯޓުތަކުގައި 30،000 އާއި 35،000 ޑޮލަރުގެ މުސާރައެއްގައި ޝެފުން އެބަތިބި ކަމަށެވެ. މިއީ ދިވެހިންނަށް ވެސް ކުރެވޭނެ ކަމެއް ކަމަށާއި ދާއިރާގައި ހަރަކާތްތެރިވާ އިސް ފަރާތްތަކާ މަޝްވަރާކޮށް އެކަން ކުރުމަށް ޕްލޭނެއް އެކުލަވާލާނެ ކަމަށެވެ.
"އެގޮތަށް ޓްރެއިންކުރަން އެ ރިސޯޓުތަކުން މުއްދަތުގައި އިންޓްރަސްޓް ހުންނަ ކުދިންނަށް ފުރުސަތު އޭގައި ދިނުމަށް. ޖީއެމް، ސޭލްސް ޑައިރެކްޓާސް، އޮޕަރޭޝަން މެނޭޖަރުން އަދި ޝެފުން،" ފައިސަލް ވިދާޅުވި އެވެ.
މި ކަމަށް ޝައުގުވެރިކަން އިތުރު ކުރުމުގެ ގޮތުން "މާސްޓަ ޝެފް" ޝޯ ރާއްޖެއަށް ގެންނަން ދައުލަތުގެ މީޑިއާ އާއެކު މަޝްވަރާ ކުރައްވާނެ ކަމަށެވެ. ބައެއް އިންވެސްޓަރުންނާ އެކަމުގެ މަޝްވަރާތައް ކުރެވި، އެއްބާރުލުން ދޭނެ ކަމުގެ ޔަގީންކަން ދީފައިވާކަން ފާހަގަކުރެއްވި އެވެ. އަދި އެ ޕްރޮގްރާމް ކުރިއަށް ގެންދަން ބޭނުން ވަނީ ރިސޯޓެއްގައި ކަމަށް ވިދާޅުވި އެވެ.
"ކުރީގައި ބޭއްވި މޯލްޑިވިއަން އައިޑޮލް ކަހަލަ އެއްޗެހި. އެގޮތަށް މި ޕްރޮގްރާމް ރާއްޖެ ގެނެވި، އެ ވަރަށް ރައްޔިތުންގެ ތެރޭގައި، ޒުވާނުންގެ ތެރޭގައި މިއަށް ޝައުގުވެރިކަން އުފެދިއްޖެއްޔާ،" ފައިސަލް ވިދާޅުވި އެވެ.
ވިދާޅުވީ ރާއްޖޭގެ ރިސޯޓުތަކުގައި ގިނަ ދިވެހިން މަސައްކަތް ކުރަމުން އަންނަނީ އާދައިގެ ވަޒީފާތަކުގައި ކަމަށެވެ.
"700 ނުވަތަ 800 ޑޮލަރު ސާވިސް ޗާޖަށްލައިގެން 15،000 ނުވަތަ 16،000 ރުފިޔާ ލުމަށް ވުރެ، 3،000 ނުވަތަ 4،000 ޑޮލަރު ލިބޭވަރުގެ ވަޒީފާތަކަށް ދިވެހިން ރިޕްލޭސް ކުރުމަކީ ހާއްސަކޮށް އަޅުގަނޑު ވަރަށް ބޮޑަށް ކުރަން ބޭނުންވާ ކަމެއް،" ފައިސަލް ވިދާޅުވި އެވެ.
މި ކަން ކުރުމަށް ކަރުދާސް ތައްޔާރުކޮށް، "ފަންކްޝަނަލްކޮށް" ކަން ކުރެވޭނެ ގޮތަކީ ކޮބައިތޯ ބަލާނެކަން ފާހަގަކުރެއްވި އެވެ. ރާއްޖެއަކީ ބައިނަލްއަގުވާމީ ގޮތުން އެންމެ ފާހަގަކުރެވޭ އެއް މަންޒިލަށްވާއިރު "ހޮސްޕިޓާލިޓީ" ދަސްކުރަން ޔުނިވަސިޓީއަކަށް ދިއުމަށް ވުރެ، ރާއްޖޭގެ ރިސޯޓަކުން ތަމްރީން ކުރުން މާ "ޕްރެކްޓިކަލް" ކަމަށެވެ.
"ޝައުގުވެރިކަން ފާޅުކުރާ ކުދިންނަށް ފުރަތަމަ ކަމަކަށް ތިން މަސް ދުވަހުގެ ޑިސިޕްލިން ޕްރޮގްރާމެއް ނުވަތަ ހިންގާ ޕްރޮގްރާމެއް ހިންގާނެ،" ފައިސަލް ވިދާޅުވި އެވެ.
ފައިސަލް ވިދާޅުވި ގޮތުގައި އެކަން ކުރެވޭނެ ގޮތްތަކާ ގުޅޭގޮތުން މަޓީ އާއި މަޓާޓޯ އަދި ގެސްޓް ހައުސް އެސޯސިއޭޝަން ފަދަ ޖަމިއްޔާތަކާ މަޝްވަރާ ކުރައްވާނެ ކަމުގަ އެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.