ވެރިން ގިނަކޮށް ކުންފުނިތަކުން އާދައިގެ މުވައްޒަފުން ވަކި ކުރުމަކީ ބަލައިގަނެވޭނެ ކަމެއް ނޫން: އެމްޑީޕީ
ސަރުކާރު ހިއްސާވާ ކުންފުނިތަކުގައި ވެރިންގެ ގޮތުގައި އިތުރަށް މީހުން އައްޔަންކޮށް، އާދައިގެ މުވައްޒަފުން ވަޒީފާއިން ވަކި ކުރުމަކީ ބަލައިގަނެވޭނެ ކަމެއް ނޫން ކަމަށް އިދިކޮޅު އެންމެ ބޮޑު ޕާޓީ، މޯލްޑިވްސް ޑިމޮކްރެޓިކް ޕާޓީ (އެމްޑީޕީ) އިން ބުނެފި އެވެ.
އަދުގެ ސަރުކާރުން ނުހައްގުން މީހުން ވަޒީފާއިން ވަކިކުރަމުންދާ ކަމަށް ބުނެ މިފަހަކަށް އައިސް އެމްޑީޕީން ދަނީ ކަންބޮޑުވުން ފާޅުކުރަމުންނެވެ. އެގޮތުން ވަކިކުރަމުންދާ މީހުންނަށް އިންސާފު ހޯދައި ދިނުމަށް މަސައްކަތް ކުރުމަށާއި އެކަމުގައި ސީދާ ހަރަކާތަށް ނިކުންނަން ޖެހިއްޖެ ހާލަތެއްގައި އެކަން ކުރުމަށް އެ ޕާޓީން ބުދަ ދުވަހުގެ ރޭ ބޭއްވި ގައުމީ މަޖިލިހުގެ ޖަލްސާގައި ގަރާރެއް ފާސްކޮށްފައިވެ އެެވެ.
މައްސަލާގައި އެމްޑީޕީން ރޭ ވަނީ ނޫސް ބަޔާނެއް ވެސް ނެރެފަ އެވެ. އެ ބަޔާނުގައި ބުނީ ރައީސް ޑރ. މުހައްމަދު މުއިއްޒުގެ ސަރުކާރުން މިކަން ކުރަނީ ރިޔާސީ އިންތިހާބުގައި ތަކުރާރުކޮށް އެތައް ކެމްޕެއިން ޖަލްސާތަކެއްގައި އެކި ރަށްރަށުގެ ރައްޔިތުންނާ ބައްދަލުކޮށް އެކަން ނުކުރާނެ ކަމަށް ބުނުމަށްފަހު ކަމަށެވެ. އެގޮތުން ސަރުކާރު ހިއްސާވާ ކުންފުނިތަކުގައި ވަޒީފާ އަދާކުރަމުންދާ އެއްވެސް މުވައްޒަފަކު ވަޒީފާއިން ވަކި ނުކުރާނެ ކަމަށް ބުނެ އެ ޔަގީންކަން ރައްޔިތުންނަށް އޭރު ދިންކަން ވަނީ ފާހަގަކޮށްފަ އެވެ.
ބުނީ އިގުތިސޯދީ ގޮތުން ދަތި ދަނޑިވަޅެއްގައި އެތަކެއް އާއިލާތަކެއްގެ އާމްދަނީ ހުއްޓުވާލައި އެ އާއިލާތައް ހާލުގައި ޖެއްސުމަކީ ބަލައިގަނެވޭނެ ކަމެއް ނޫން ކަމަށެވެ.
"މި އަނިޔާވެރި ފިޔަވަޅު ގިނަ ރައްޔިތުންނަށް އަޅަމުންދާއިރު، ސަރުކާރުގެ މި ކުންފުނިތަކުގައި ކުރިން ނުތިބޭވަރަށް ޑެޕިއުޓީ މެނޭޖިން ޑިރެކްޓަރުންނާއި އިސްވެރިން ސަރުކާރުން ވަނީ އެ ކުންފުނިތަކަށް އައްޔަންކޮށްފަ އެވެ،"
ވަޒީފާތަކުން ވަކިކުރަމުންދާ ފަރާތްތަކުގެ ހައްގުގައި ވަޒީފާ އާ ބެހޭ ޓްރައިބިއުނަލަށް މައްސަލަ ހުށަހެޅުމުގައި އެ ޕާޓީން އެހީތެރިކަން ފޯރުކޮށްދޭން ތައްޔާރަށް އޮތް ކަމަށް ވެސް ބަޔާނުގައި ވަނީ ފާހަގަކޮށްފަ އެވެ.
އެމްޑީޕީން އިތުރަށް ބުނެފައި ވަނީ ސަރުކާރުގެ ސިޔާސީ މަގާމުތަކަށް އެތައް ބަޔަކު އަދިވެސް އައްޔަންކުރަމުންދާ ކަމަށެވެ. ސިޔާސީ މަގާމުތަކުގެ އަދަދު ސިއްރުކޮށްފައި ވީނަމަވެސް، އެ އަދަދު މިހާރު 2،000 އާ ގާތްކުރާނެ ކަމަށް ބެލެވޭ ކަމަށެވެ.
ރިޔާސީ ކެމްޕެއިންގައި ވީ ވައުދުތަކަކީ ރައްޔިތުންގެ ވޯޓު ހޯދުމަށް ހެދި ދޮގުތަކެއްކަން މިހާރު ދަނީ ސާބިތުވަމުން ކަމަށް ބުނެ ބައެއް ކަންކަން އެމްޑީޕީން ވަނީ ފާހަގަކޮށްފަ އެވެ. އެގޮތުން ބުނީ،
- މަހުގެ އަގު 20ރ ގައި ހިފެހެއްޓުން
- އަށް މަހުން ފުށިދިއްގަރުފަޅު ހިއްކުން
- އެކަނިވެރި މައިންނަށްދޭ އެލަވަންސް 12،000ރ އަށް ބޮޑުކުރުން
- ސިޔާސީ މަގާމުތަކުގެ އަދަދު 700 އަށް ވުރެ ގިނަ ނުކުރުން
- ކުރީ ސަރުކާރުން ފްލެޓު ދިން ފަރާތްތަކަށް ފްލެޓު ހަވާލުކުރުން
ކުންފުނިތަކުގައި ވަޒީފާ އަދާކުރާ ގިނަ ރައްޔިތުންތަކެއް ސަރުކާރުން އެއްފަހަރާ ކަނޑަމުން ދާތީ އެކަން ހަރުކަށި އިބާރާތުން ކުށްވެރިކޮށް އެމްޑީީޕީގެ ބަޔާނުގައި ވަނީ އެކަން މިހާރުން މިހާރަށް ހުއްޓާލުމަށް ގޮވާލާފަ އެވެ.
