Tuesday, 17 November 2026
Advertisement
STO — McCoy (leaderboard)
ސިޔާސީ

ޝަހީމަކީ ދީނީ އަދި ސިޔާސީ ލީޑަރެއް، އިލްޒާމްތަކަށް ގުޑާވަރަށް ވުރެ އަޒުމް ވަރުގަދަވާނެ: ކޮންގްރެސް ކޯލިޝަން

ޝަހީމަކީ ދީނީ އަދި ސިޔާސީ ލީޑަރެއް، އިލްޒާމްތަކަށް ގުޑާވަރަށް ވުރެ އަޒުމް ވަރުގަދަވާނެ: ކޮންގްރެސް ކޯލިޝަން
އަދުގެ ސަރުކާރުގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަކީ ދީނީ އަދި ސިޔާސީ ވަރުގަދަ ލީޑަރެއް ކަމަށާއި ދޮގު އިލްޒާމްތަކަށް ގުޑާވަރަށް ވުރެ އަޒުމް ވަރުގަދަ ބޭފުޅެއް ކަމަށް ޕްރޮގްރެސިވް ކޮންގްރެސް ކޯލިޝަނުން ބުނެފި އެވެ. އަންހެނަކާ އެކު ޝަހީމް ބަދު އަހުލާގީ އަމަލު ހިންގާ ކަމަށް ބުނެ ސޯޝަލް މީޑިއާގައި ވީޑިއޯއެއް ދައުރު ކުރުވަން ފެށީ "އެކްސް" ގައި ސަރުކާރުގެ އެތެރޭގެ މައުލޫމާތު ލީކުކުރަމުންދާ ހަސަން ކުރުސީގެ އެކައުންޓުންނެވެ. އެއީ އާޓިފިޝަލް އިންޓެލިޖެންސް (އޭއައި) އިން ހަދާފައިވާ ވީޑިއޯއެއްކަން ވަނީ އެނގިފަ އެވެ. އަދި އެއީ އެޑިޓެއް ކަމަށް ކުރުސީ ވެސް އެއްބަސްވެފައިވެ އެވެ. އެ ވީޑިއޯ އާ ގުޅިގެން ރައްޔިތުންގެ މަޖިލިހަށް ނިސްބަތްވާ ސަރުކާރު މެމްބަރުންނާއި ސަރުކާރަށް ތާއިދުކުރާ ފަރާތްތަކުގެ އިތުުރުން އިދިކޮޅުގެ އިސް ފަރާތްތަކުން ވެސް ވަނީ އެކަން ކުށްވެރިކޮށްފަ އެވެ. ކޮންގްރެސް ކޯލިޝަނުން ރޭ ނެރުނު ނޫސް ބަޔާނެއްގައި ބުނީ ޝަހީމަކީ މުޅި އިސްލާމީ ދުނިޔޭގައި ވެސް ނަން ހިނގާ މަޝްހޫރު އަދި އިސްލާމީ ދައުލަތްތަކުން އެމަނިކުފާނުގެ ހިދުމަތުގެ އަގުވަޒަން ކުރަމުން ގެންދާ ހުލްގުހެޔޮ ދީނީ ލީޑަރެއް ކަމަށެވެ. އެމަނިކުފާނު އިސްލާމިކް މިނިސްޓަރުގެ މަގާމުގައި ހުންނަވައިގެން ރައީސް ޑރ. މުހައްމަދު މުއިއްޒުގެ ދީނީ ސިޔާސަތުތައް ކުރިއެރުވުމުގައި ސާބިތުކަމާ އެކު ކުރައްވަމުން ގެންދަވާ މަސައްކަތަށް އެ ކޯލިޝަނަށް ފަހުރުވެރިވާ ކަމަށެވެ. ރައީސްގެ މެނިފެސްޓޯގައި އިސްލާމިކް މިނިސްޓްރީ އާ ގުޅުންހުރި އެންމެހާ ކަންކަން ކުރެއްވުމުގައި ޝަހީމް ގެންދަވަނީ ކާމިޔާބު ހޯއްދަވަމުން ކަމަށް ވެސް ބަޔާނުގައި ފާހަގަކޮށްފައިވެ އެވެ.
"ކީރިތި ގުރްއާން ހިތުދަސް ދީނީ ލީޑަރު ޑރ. މުހައްމަދު ޝަހީމް އަލީ ސައީދަކީ ފުރަައްސާރަކޮށް ހަގީގަތާއި ހިލާފު ދޮގު އިލްޒާމުތަކުން ފަސްޖެހިވަޑައިގަންނަވާނެ ބޭފުޅެއް ނޫނެވެ. އެއީ ދީނީ އިލްމު ދެނެވަޑައިގެން ހުންނެވި އަޒުމް ވަރުގަދަ ސިޔާސީ ލީޑަރެކެވެ،"
ކޮންގްރެސް ކޯލިޝަނުން ވަނީ ޝަހީމުގެ އަބުރު ކަތިލުމުގެ ބޭނުމުގައި ބަޔަކު ކުރަމުންދާ ހަޑިމުޑުދާރު ނާތަހުޒީބު ކަންކަން މިހާރުން މިހާރަށް ހުއްޓާލުމަށް ގޮވާލާފަ އެވެ. ބަޔާނުގައި ވަނީ ޝަހީމުގެ އަބުރު ނަގާލުމުގެ ބޭނުމުގައި ސޯޝަލް މީޑިއާގެ އިތުުރުން ބައެއް މީޑިއާތަކުން ހަގީގަތާއި ހިލާފު ދޮގު ވާހަކަތައް ދައްކަމުން ގެންދާތީ އެކަން ހަރުކަށި އިބާރާތުން ކުށްވެރި ކޮށްފަ އެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.