ގުޅުންތައް ބަދަހިކޮށް ބާރުވެރި ކުރުމަކީ އާއިލާގެ ކޮންމެ ފަރުދަކުމެ އިސްވެ އަދާކުރަން ޖެހޭ ވާޖިބެއް
ގުޅުންތައް ބަދަހިކޮށް ބާރުވެރި ކުރުމަކީ އާއިލާގެ ކޮންމެ ފަރުދަކުމެ އިސްވެ އަދާކުރަން ޖެހޭ ވާޖިބެއް ކަމަށް މިއަދުގެ ހުކުރު ހުތުބާގައި ބުނެފި އެވެ.
އާއިލީ ގުޅުން ދެމެހެއްޓުމުގެ މައްޗަށް އަލިއަޅުވާލައި ހުތުބާގައި ބުނެފައި ވަނީ ތާރީހީ ގޮތުން ބަލާއިރު އިންސާނިއްޔަތު ދުށް ފުރަތަމަ ޖަމާއަތަކީ އާއިލާ ކަމަށެވެ. އެ އާއިލާގެ އުނގަކީ ތުއްތު ކުއްޖާއަށް އެންމެ ފުރަތަމަ އަމާންކަމާއި ހިމާޔަތާއި ލޯބި ދިން އުނގު ކަމަށާއި އިންސާނާގެ ޝަހުސިއްޔަތު ބިނާކޮށްދީ ތަހުޒީބު މުވާތިނަކަށް ހަދައިދޭ މަދަރުސާ ކަމަށެވެ. އެއީ ކުއްޖާ ބޮޑުވެ، ދިރިއުޅުމުގެ ހަމަތަކާއި އުސޫލުތަކާއި ސަގާފަތްތަކާއި އާދަކާދަތައް ލިބިގަންނަ މަރުކަޒު ކަމަށެވެ.
ހަރުދަނާ މުޖުތަމައެއްގެ އަސާސަކީ އާއިލާއަށްވާއިރު އެއީ މުޖުތަމައުގެ ބިންގާ ކަަމަށެވެ. މި ބިންގާ ވަރުގަދަ ކުރެވިގެން ނޫނީ މުޖުތަމައު ބާރުވެރި ނުކުރެވޭނެ ކަމަށެވެ. މިއަދު އިސްލާމީ އުންމަތް މި ވަނީ ބާރުވެރި، ގީރަތްތެރި މުޖުތަމައަކަށް ނުހަނު ބޭނުންވެފައި ކަމަށާއި މި މުހިންމު މަސައްކަތުގެ ހިއްސާދާރަކަށް ވުމަށް ކޮންމެ ފަރުދަކުމެ މަސައްކަތް ކުރަން ޖެހޭ ކަމަށެވެ.
ހުކުރު ހުތުބާގައި ބުނީ އާއިލާއެއް ފެށިގެން އަންނަނީ މަތިވެރި ގުޅުމަކުން ކަމަށެވެ. އެއީ ކާވެނީގެ ބަދަހި ގުޅުން ކަމަށެވެ. އާއިލީ ގުޅުންތަކުގެ ތެރޭގައި ހިމެނެނީ ދެމަފިރީންގެ ގުޅުމާއި މައިންބަފައިންނާއި ދަރިންނާ މެދު އޮންނަ ގުޅުމާއި އެއްބަނޑުއެއްބަފާ ނުވަތަ އެއްބަނޑު ނުވަތަ އެއްބަފާ އަހުންނާއި އުހުތުންގެ ގުޅުންތަކާއި މާމައިންނާއި ކާފައިންނާއި ބޮޑު ބޭބެއިންނާއި ބޮޑުދައިތައިންނާ އަދި އެ މީހުންގެ ދަރީންގެ މެދުގައި އަދާކުރަން ޖެހޭ ހައްގުތަކާއި ވާޖިބުތަކުގެ މައްޗަށް ކަަމަށެވެ. މި ގުޅުންތައް ބަދަހިކޮށް ބާރުވެރި ކުރުމަކީ އާއިލާގެ ކޮންމެ ފަރުދަކުމެ އިސްވެ އަދާކުރަން ޖެހޭ ވާޖިބެއް ކަމަށެވެ. އިންސާނީ ނަސްލު ބަލަހައްޓައި ނެގެހެއްޓޭނީ ފާރަވެރި، އޯގާތެރި، ކެތްތެރި އާއިލާއެއްގެ ހިޔާވަހިކަން ލިބިގެން ކަމަށެވެ.
އިސްލާމްދީނުގައި އިންސާނީ ނަސްލަށް ވަރަށް ބޮޑު އަހައްމިޔަތެއް ދީފައިވާ ކަން ފާހަގަކޮށް މިއަދުގެ ހުތުބާގައި ބުނި ގޮތުގައި އެހެން މަހްލޫގުންނަށް ނުދެއްވާ މަތިވެރި ދަރަޖަ އިންސާނުންނަށް މާތް ﷲ ދެއްވަވާފައި ވަނީ ވަރަށް ބޮޑު މަސްއޫލިއްޔަތެއް ހަވާލުކުރައްވާފައި ކަމުގަ އެވެ. އެއީ އެކަލާނގެއަށް އަޅުކަން ކުރުމާއި މި ދުނިޔެ އިމާރާތްކުރުމުގެ ބޮޑު މަސްއޫލިއްޔަތު ކަމުގަ އެވެ. އެހެންކަމުން ﷲ މަތިކުރައްވާފައިވާ މި މުހިންމު ވާޖިބު އަދާކުރުމުގެ ޒިންމާ ފުރިހަމައަށް އަދާކުރަން ޖެހޭ ކަމުގަ އެވެ. މިފަދަ ޝަހުސިއްޔަތެއް ވުޖޫދުކޮށް، ބިނާކުރުމުގެ ފުރިހަމަ ޒިންމާ އެޅިފައި ވަނީ އާއިލާގެ ކޮނޑުގައި ކަމުގަ އެވެ. އާއިލީ ޒިންމާގެ ތެރޭގައި މުޖުތަމައަށް ބޭނުންވާ ހުރިހާ ދާއިރާތަކަށް މީހުން ބިނާކުރުން ހިމެނޭ ކަމުގަ އެވެ.
މި މަސްއޫލިއްޔަތު ފުރިހަމައަށް އަދާކުރެވޭނީ އާއިލީ ގުޅުން ހަރުދަނާ ކުރެވިގެން ކަމަށާއި ތަނަވަސްކަން ލިބިގެންވާ މީހުން، ދަތި ހާލުގައި އުޅޭ މީހުންނަށް އެކިގޮތްގޮތުން އެހީތެރިވެދީގެން ކަމަށެވެ. އާއިލީ ގުޅުން ހަރުދަނާ ކުރުމަށް ޓަކައި އާއިލާގެ މެންބަރުންގެ މެދުގައި އެއްބާރުލުމާއި އެއްބައިވަންތަކަން ގާއިމުކުރަން ޖެހޭ ކަމަށެވެ. އާއިލާގެ ހުރިހާ މެންބަރުން ގުޅިގެން އާއިލާ ހަރުދަނާ ކުރަން މަސައްކަތް ކުރަން ޖެހޭ ކަަމަށެވެ. އާއިލާގެ ތެރޭގައި ތައުލީމާއި ނަފްސުގެ ކުރިއެރުމަށް ހިތްވަރުދީ، ހުނަރާއި އިލްމު ތަރައްގީ ކުރުމަށް ހޭދަ ކުރުމަކީ ދިރިއުޅުމުގައި ކާމިޔާބީއަށް ވާސިލުވާން އެހީތެރިވެދޭ ބާރެއްކަން އާއިލާގެ ކޮންމެ މެމްބަރަކަށް ޅަފަތުން ފެށިގެން ވިސްނައިދީ އެކަން ތަންފީޒު ކުރުމަށް މަސައްކަތް ކުރަން ޖެހޭ ކަަމަށެވެ.
ހުކުުރު ހުތުބާގައި ބުނެފައި ވަނީ އާއިލާގެ ފަރާތުން ރައްކާތެރިކަމާއި އަޅައިލުމާއި ލޯބި ނުލިބުމުގެ ސަބަބުން އާއިލީ ވެށްޓެއްގައި ދިރިއުޅުމުގެ ނަސީބުން މަހުރޫމްވެފައިވާ އެތައް އެތައް ކުޑަކުދީންނާއި ދޮށީ އުމުރުގެ މީހުން މި ދިވެހި ފަސްގަނޑުގައި ދިރިއުޅެމުންދާ ކަމަށެވެ. ސަރުކާރުގެ ބެލުމުގެ ދަށުން ހިންގަމުންދާ މަރުކަޒުތަކުގައި އެފަދަ މީހުން އެބަތިބި ކަމަށެވެ.
"މިއީ ދީނީ ގޮތުންނާއި އިޖުތިމާއީ ގޮތުން ބަލާއިރު، ކަންބޮޑުވާން ޖެހޭ ކަމެކެވެ. އާއިލީ ވެށްޓެއްގައި އުފާވެރިކަމާ އެކު ދިރިއުޅުމަކީ ކޮންމެ ފަރުދަކަށް ވެސް ލިބިގެންވާ ހައްގެކެވެ. އެ ހައްގުން އާއިލާގެ މެމްބަރަކު މަހްރޫމު ކުރުމަކީ އިންސާނީ ކުރިމަގަށް ނޭދެވޭ އެތައް އަސަރުތަކެއް ކުރާނެ ކަމެކެވެ."
މި ކަންކަމާ މެދު ފުންކޮށް ވިސްނައި، އާއިލީ ގުޅުން ވަރުގަދަކުރުމަށް ޓަކައި އާއިލާގެ މެމްބަރުންނަށް އާއިލީ ވެށްޓެއްގައި ދިރިއުޅުމުގެ ހައްގު ހޯދައިދިނުމަށް އާއިލާގެ ކޮންމެ ފަރުދަކު މަސައްކަތް ކުރަން ޖެހޭ ކަމަށެވެ. ހާއްސަކޮށް ﷲ ތަނަވަސްކަން ދެއްވާފައިވާ އާއިލީ ކޮންމެ މެމްބަރަކު މި ކަމަށް އިސްނަގަން ޖެހޭ ކަމަށެވެ.
އާއިލީ ގުޅުން ދެމެހެއްޓުމަށް ކަމާ ބެހޭ އެންމެހާ ފަރާތްތައް ގުޅިގެން ގައުމީ ފެންވަރުގައި ގިނަގުނަ މަސައްކަތްތަކެއް ކުރުމަކީ މިއަދު ކުރަން ޖެހިފައިވާ ދީނީ އަދި އިޖުތިމާއީ ބޮޑު މަސައްކަތެއްކަން ފާހަގަކޮށް މިއަދުގެ ހުތުބާގައި ވަނީ މި ކަމަށް ހިތްވަރު ލިބިގަނެ، އިސްނެގުމުގެ ކުޅަދާނަކަން ހޯދުމަށް މަސައްކަތް ކުރުމަށް އެންމެ ފަރާތްތަކަށް ނަސޭހަތްތެރިވެ ވަސިއްޔަތް ކޮށްފަ އެވެެ.
Ads by STO
