ބިދޭސީންގެ ފީ ނުދައްކައިފިނަމަ ސަސްޕެންޑް ކުރާނެކަމުގެ އިންޒާރު
ދިވެހިރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމާނަ ނުދައްކާނަމަ އެކްސްޕެޓް ސިސްޓަމުން ދެމުން ގެންދާ ހިދުމަތް މެދުކަނޑާލާނެ ކަމުގެ އިންޒާރު ހޯމްލޭންޑް ސެކިއުރިޓީ އެންޑް ޓެކޮނޮލޮޖީ މިނިސްޓްރީން ދީފި އެވެ.
އެ މިނިސްޓްރީން މިރޭ ސަރުކާރު ގެޒެޓުގައި ކުރި އިއުލާނެއްގައި ބުނީ ރާއްޖޭގައި ވަޒީފާ އަދާކުރާ ބިދޭސީންނާއި ގުޅިގެން ދޫކުރާ ހުއްދަތަކަށް ދައުލަތަށް ދައްކަންޖެހޭ ފީތަކާއި ޖޫރިމަނާ -/100,000 ރ (އެއްލައްކަ ރުފިޔާ) އަށްވުރެ އިތުރުވާ ވަޒީފާދޭ ފަރާތްތައް މި މަހުގެ 12 ވަނަ ދުވަހުގެ ކުރިން ފައިސާ ދައްކާ ހަލާސްކުރުމަށް އެންގިފައިވާނެ ކަމަށެވެ.
ފައިސާ ދައުލަތަށް ދެއްކުމުގެ އިތުރު ފުރުސަތެއް މިނިސްޓްރީން ވަނީ މި މަހުގެ 31 ނިޔަލަށް ދީފަ އެވެ. އެ ތާރިހުގެ ކުރިން، ވަޒީފާދޭ ފަރާތުން އެފައިސާ ދައުލަތަށް ދައްކާ ހަލާސް ކުރުމަށް ވަނީ އަންގާފަ އެވެ. އެ ތާރީހާ ހަމަޔަށް އަންނަ މަހުގެ 1 ވަނަ ދުވަހުގެ ކުރިން ފައިސާ ނުދައްކާ ފަރާތްތަކާ މެދު ބިދޭސީން ވަޒީފާ އަދާކުރުމާ ބެހޭ ގަވާއިދުގެ ދަށުން ފިޔަވަޅު އަޅާނެ ކަމަށް މިނިސްޓްރީން ބުންޏެވެ.
"..އެކްސްޕެޓް ސިސްޓަމް އިން ސަސްޕެންޑް ކުރެވި ސިސްޓަމް މެދުވެރިކޮށް ދެމުން ގެންދާ ހިދުމަތްތައް މެދުކަނޑާލެވޭނެ ކަމުގައި ވަޒީފާދޭ ފަރާތްތަކުގެ މަޢުލޫމާތަށްޓަކައި ދެންނެވީމެވެ" މިނިސްޓްރީގެ ބަޔާާނުގައި ބުންޏެވެ. ސިސްޓަމުން ސަސްޕެންޑް ކުރުމުން އެ ކުންފުންޏަކަށް ބިދޭސީންނާ ގުޅޭ އާ އެއްވެސް ހިދުމަތެއް ނުދެވޭނެ އެވެ.
ފީ އާއި ޖޫރިމަނާ ނުދައްކާ ކުންފުނިތައް ސިސްޓަމުން ސަސްޕެންޑުކުރާނެ ކަމަށް ހޯމް މިނިސްޓްރީން ބުނެފައިވާއިރު ބުދަ ދުވަހާ ހަމަޔަށް ފީގެ ގޮތުގައި ދައުލަތަށް ދައްކަން ޖެހޭ 182 މިލިއަން ރުފިޔާ ހޯދާފައިވާ ކަމަށް ހޯމް މިނިސްޓްރީން ވަނީ ބުނެފަ އެވެ.
ބިދޭސީ މުވައްޒަފުންގެ ވޯކް ޕާމިޓާއި ކޯޓާ ފީ ނުދައްކާ އަދި އޭގެ ޖޫރިމަނާ ވެސް ހިމެނޭ ގޮތަށް 100،000ރ. އަށް ވުރެ މަތިން ދައްކަން ޖެހޭ ކުންފުނިތަކުގެ ލިސްޓެއް ފުރަތަަމަ ފަހަރަށް މިދިޔަ މަހު 24 ގައި ސަރުކާރުން އާންމުކުރި އެވެ.
މިނިސްޓްރީން އާންމުކުރި ލިސްޓުގައި 1026 ކުންފުންޏެއް ހިމެނޭއިރު، އޭގެ ތެރެއިން ދައުލަތަށް މިލިއަނަކަށް ވުރެ ގިނަ ރުފިޔާ ދައްކަން ޖެހޭ ކުންފުނިތަކުގެ އަދަދު 100 އަށް ވުރެ ގިނަ އެވެ.
ރާއްޖެއަށް ގެންނަ ބިދޭސީ މަސައްކަތްތެރިންގެ ކޯޓާ ކަނޑައެޅުމުގެ ބާރު ވަޒީރުންގެ މަޖިލީހަށް ލިބޭ ގޮތަށް ވަޒީފާގެ ގާނޫނަށް ސަރުކާރުން ވަނީ އިސްލާހެއް ހުށަހަޅާފަ އެވެ.
ވަޒީފާގެ ގާނޫނު މިހާރު އޮތް ގޮތުން ރާއްޖޭގައި ބިދޭސީން ވަޒީފާ އަދާކުރުމަށް އެއް ގައުމަކުން އެންމެ ގިނައިން ގެނެވޭނީ 100،000 މީހުން ނެވެ. އޭގެ ބަދަލުގައި ބިލުގައި ހުށަހަޅާފައިވަނީ، ވަޒީފާ އަދާކުރުމަށް ބިދޭސީން ރާއްޖެ ގެނެވޭނެ އަދަދާ ދާއިރާތައް ކަނޑައަޅާނީ ގަވާއިދެއްގެ ދަށުން ކަމަށެވެ. އެ ގަވާއިދު އެކުލަވާލާނީ ލޭބާ މިނިސްޓްރީން ނެވެ.
