ސައިކަލް އެކްސިޑެންޓެއްގައި 3 މީހަކަށް އަނިޔާވެ ފަރުވާ ދެނީ
ސިނަމާލެ ބްރިޖުގައި ލައިޓް ކައިރިން ރޭ ފަތިހު ދެ ސައިކަލެއް ޖެހި ހިނގި އެކްސިޑެންޓެއްގައި އަނިޔާވި ތިން މީހަކަށް ހޮސްޕިޓަލުގައި ފަރުވާދޭން ފަށައިފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އެ އެކްސިޑެންޓުގައި އަނިޔާވި މީހުންގެ ތެރެއިން ދެ މީހަކަށް ފަރުވާދެމުން އަންނަނީ އައިޖީއެމް ހޮސްޕިޓަލުގައި ކަމަށެވެ. ތިން ވަނަ މީހާއަށް ފަރުވާދެމުން އަންނަނީ އޭޑީކޭގަ އެވެ.
ފުލުހުން ބުނީ އަނިޔާވި މީހުންނަކީ އޭގެ ތެރެއިން އެއް ސައިކަލު ދުއްވަން އިން 21 އަހަރުގެ ފިރެހެނަކާއި އެ ސައިކަލު ފަހަތުގައި އިން 19 އަހަރުގެ އަންހެނެއް ކަމަށެވެ.
އޭޑީކޭގައި ފަރުވާދެމުން އަންނަނީ އަނެއް ސައިކަލު ދުއްވި 43 އަހަރުގެ ފިރެހެން މީހާ އަށެވެ.
ފުލުހުން ބުނީ އެކްސިޑެންޓުގެ ރިޕޯޓް ލިބުނީ ރޭ ފަތިހު 5:26 ހާއިރު ކަމަށެވެ.
މައްސަލަ ތަހުގީގު ކުރަމުންދާއިރު، އިތުރު ތަފުސީލެއް ފުލުހުން ހިއްސާއެއް ނުކުރެ އެވެ.
