މި ފެންނަނީ ސަރުކާރުގެ އެތެރޭން ބަގާވާތެއް ކުރާތަން: ފައްޔާޒު
ރައީސް ޑރ. މުހައްމަދު މުއިއްޒުގެ ސަރުކާރުގެ ތެރެއިން އެމަނިކުފާނާ ދެކޮޅަށް ބަގާވާތެއް ކޮށްފާނެ ކަމުގެ މަންޒަރު ފެންނަމުންދާ ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް މިއަދު ތުހުމަތު ކުރައްވައިފި އެވެ.
ފައްޔާޒު އެ ތުހުމަތުތައް ކުރެއްވީ ބޭންކް އޮފް މޯލްޑިވްސް (ބީއެމްއެލް) މެދުވެރިކޮށް އިދިކޮޅު ފަރާތްތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ފުލުހުން ތަހުގީގުކުރަން ފަށާފައި ވަނިކޮށް މިއަދު އެމްޑީޕީގެ ލީޑާޝިޕުން ބޭއްވި ޕްރެސް ބްރީފިންގަ އެވެ.
މިދިޔަ ސަރުކާރުގެ އިކޮނޮމިކް މިނިސްޓަރުގެ މަގާމު ފުރުއްވި ފައްޔާޒު ސިފަކުރެއްވި ގޮތުގައި އިއްޔެއަކީ ރާއްޖެއަށް ވަރަށް ވެސް ލަދުވެތި ދުވަހެއްގެ ގޮތުގަ އެވެ. ސަބަބެއް ކަމަށް ވިދާޅުވީ ރައީސް މުއިއްޒަކީ ނާާގާބިލު ވެރިއަކަށްވުން ކަމަށެވެ.
މާލީ ބަގާވާތެއް ގެންނަން އެމްޑީޕީން މަސައްކަތްކުރި ކަމަށް ރޭ ކޮންގްރެސް ޕާޓީގެ ހަރުގެ ޖަލްސާގައި ރައީސް ދެެއްކެވި ވާހަކަތަކަށް އިޝާރާތް ކުރައްވާ ފައްޔާޒު ވިދާޅުވީ އެ ވާހަކަތަކުން ދޭހަވީ ނާގާބިލުކަން އެކަނި ނޫން ކަމަށާއި ދިވެހިން ކަންބޮޑުވާން ޖެހޭކަން ކަމަށެވެ. އެއަށް ފަހު ރައީސަށް ގައުމު ހިންގިދާނެ ކަމާއި މެދު ވެސް ފައްޔާޒު ތަކުރާރުކޮށް ސުވާލު އުފެއްދެވި އެވެ.
"އެ ބޭފުޅުންގެ އެތެރޭގައި ގޯސްތަކެއް އުޅޭކަން، އަމިއްލައަށް ކުރިއަށް އޮތް ދުވަސްތަކުގެ ތެރޭގައި ބަގާވާތެއްކުރާތަން އަޅުގަނޑުމެންނަށް ފެންނަނީ،" ފައްޔާޒު ވިދާޅުވި އެވެ.
އޭނާ ވިދާޅުވީ އިއްޔެގައި ކުރީ ރާއްޖޭގެ މާލީ ނިޒާމު އެއްކޮށް ފުނޑުފުނޑުކޮށްލާވަރުގެ ކަމެއް ކަމަށެވެ. ބީއެމްއެލްއަށް 2013 ވަނަ އަހަރާއި 2018 ވަނަ އަހަރާ ދެމެދު ކުރިމަތިވި މަނީލޯންޑަރިން ތުހުމަތުތަކާ ގުޅިގެން ވަރަށް ގިނަ ކްލިއަރިން ބޭންކްތަކުން އެ ބޭންކް ދޫކޮށްލާފައިވާ ކަމަށް ފައްޔާޒު ވިދާޅުވި އެވެ. ކްލިއަރިން ބޭންކް ނެތް ކަމަށްވާ ނަމަ ރާއްޖޭގައި އެ ބޭންކް މެދުވެރިކޮށް ފޮނުވޭނެ ލިބޭނެ ލާރިއެއް ނޯންނާނެ ކަމަށް ފައްޔާޒު ފާހަގަ ކުރެއްވި އެވެ.
"މިއަދު ދައުލަތުގެ އިސްވެރިޔާ ނިކުންނަވާ އެ ބޭފުޅާގެ ކޮންޓްރޯލް އޮތް ބޭންކަކުން، އެ ބޭފުޅާގެ ވެރިކަން ބަދަލުކުރަން އޮޕޮޒިޝަން އާއެކު މަސައްކަތް ކުރީއޭ ބުނީމާ އަނެއްކާވެސް ބޭންކް އޮފް މޯލްޑިވްސްގެ ބޮލުގައި ވަރަށް ބޮޑު ބަދުނާމެއް ދުނިޔޭގެ މާލީ ނިޒާމުގެ ތެރޭގައި އެ އައީ،" ފައްޔާޒު ވިދާޅުވި އެވެ.
އޭނާ ވަނީ މި ކަމާ ގުޅިގެން ބައިނަލްއަގުވާމީ މާލީ ނިޒާމުގެ ތެރެއިން ބީއެމްއެލްއަށް މިހާރު ކްލިއަރިން ދެމުން އަންނަ ހަމައެކަނި ބޭންކް ގެއްލިދާނެކަމުގެ ކަންބޮޑުވުން ފާޅުކުރައްވާފަ އެވެ.
ބޭންކް މެދުވެރިކޮށް ސަރުކާރު ވައްޓާލަން އުޅުނު ކަމަށް ބުނާ މައްސަލައިގެ ތަހުގީގު ފުލުހުން ފަށާފައިވާއިރު، މައްސަލަ އާ ގުޅިގެން މިހާތަނަށް މީހަކު ހައްޔަރުކޮށްފައެއް ނުވެ އެވެ.
