ޔާމީނަކީ ވަރަށް ކަންނެތް، ޒާތީ ހަސަދައިން ފުރިފައި ހުރި މީހެއް: އަބްދުއްރަހީމް
ކުރީގެ ރައީސް އަބްދުﷲ ޔާމީނަކީ ވަރަށް ކަންނެތް އަދި ޒާތީ ހަސަދައިން ފުރިފައި ހުރި ބޭފުޅެއް ކަމަށް ރައްޔިތުންގެ މަޖިލިހުގެ ރައީސް އަދި ސަރުކާރު ހިންގާ މައި ޕާޓީ، ކޮންގްރެސް ޕާޓީގެ ޗެއާޕާސަން އަބްދުއްރަހީމް އަބްދުﷲ ރޭ ވިދާޅުވެއްޖެ އެވެ.
"ސަންގު ޓީވީ" އަށް ދެއްވި ބަސްދީގަތުމެއްގައި އަބްދުއްރަހީމް ވިދާޅުވީ ވެރިކަމަށް ވަޑައިގަތުމުގެ ކުރިންނާއި ވެރިކަމުގެ ދުވަސްވަރު ވެސް މަސައްކަތް ކުރެއްވީ ޔާމީނާ އެކުގައި ކަމުން ވަރަށް ރަނގަޅަށް އެމަނިކުފާނު ދެނެވަޑައިގަންނަވާ ކަމަށެވެ.
"ޔާމީނަކީ އަމިއްލައަށް ސިޔާސީ ޕްލެޓްފޯމެއް ކްރިއޭޓް ކުރެއްވި ބޭފުޅެއް ނޫނޭ. އަމިއްލަ މަސައްކަތުން ސިޔާސީ މަގާމެއް ހޯދި މީހެއް ނޫނޭ. ކަންނެތް މީހެއް އޭނާއަކީ. އަޅުގަނޑުމެންގެ މަސައްކަތުން ސިޔާސީ ޕްލެޓްފޯމެއް ހޯދައިދިނީ،" އަބްދުއްރަހީމް ވިދާޅުވި އެވެ.
ޔާމީން އިސްވެ ހުންނަވައި އުފެއްދެވި ޕީޕަލްސް އެލަޔަންސް (ޕީއޭ) އަށް 3،000 މެމްބަރުން ހަމަނުވެގެން މެމްބަރުންގެ އަދަދު ހަމަކުރުމުގެ މަސައްކަތް އެމަނިކުފާނާ އެކު މަސައްކަރް ކުރެއްވީ ރައްޔިތުންގެ މަޖިލިހުގެ ނައިބު ރައީސް، ދިއްގަރު ދާއިރާގެ މެމްބަރު އަހްމަދު ނާޒިމާއި ފޮރިން މިނިސްޓަރު މޫސާ ޒަމީރު ފަދަ ބޭފުޅުންކަން އަބްދުއްރަހީމް ފާހަގަކުރެއްވި އެވެ. އެހެންނަމަވެސް އެ ބޭފުޅުންނާ މެދު ވެސް ޔާމީން އަމަލު ކުރެއްވެވީ ވަރަށް އިހާނެތި ގޮތަކަށް ކަމަށް އަބްދުއްރަހީމް ވިދާޅުވި އެވެ.
އޭނާ ވިދާޅުވި ގޮތުގައި ޕީޕީއެމްއިން 2013 ވަނަ އަހަރު ބޭއްވި ރިޔާސީ ޕްރައިމަރީ ޔާމީނަށް ކާމިޔާބު ކުރެވުނީ އެމަނިކުފާނަށް އޮތް ތާއީދަކުން ނޫން ކަމަށެވެ. އެކަމަކު އެމަނިކުފާނުގެ ބޭބޭފުޅު، ކުރީގެ ރައީސް މައުމޫން އަބްދުލްގައްޔޫމް ކުރެއްވި މަސައްކަތްޕުޅުން ކަމުގަ އެވެ.
ޔާމީން ޖަލަށް ލާފައި ހުރި ދުވަސްވަރު ޕްރޮގްރެސިވް ކޮންގްރެސް ކޯލިޝަން ހިންގެވުމާ ހަވާލުވެ ހުންނެވި އަބްދުއްރަހީމް ވިދާޅުވީ އެމަނިކުފާނުގެ ހިތްޕުޅުގައި ޔާމީނަށް އޮތް ލޯބި ގެއްލިގެން ދިޔައީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމާ ގުޅިގެން ކަންތައް ކުރެއްވި ގޮތުން ކަމަށެވެ.
"އެދުވަހު އަޅުގަނޑަށް އެނގުނީ ރައީސް ޔާމީނަށް ގައުމެއް ވެސް މުހިންމު ނޫންކަން. ޕާޓީއެއް ވެސް މުހިންމެއް ނޫން ކަން. ރައްޔިތުންނެއް ވެސް މުހިންމު ނޫންކަން. ރައީސް ޔާމީނަށް މުހިންމީ ޔާމީންކަން،" އަބްދުއްރަހީމް ވިދާޅުވި އެވެ.
އެ ބޭފުޅުންނާއި ދެ ޕާޓީގެ އާންމު މެމްބަރުން ފަސް އަހަރުވީ ގުރުބާނީގެ އަގު އެގޮތަށް ކުރެއްވުމަކީ ގަބޫލު ކުރެއްވޭނެ ކަމެއް ނޫން ކަމަށް ވެސް ފާހަގަކުރެއްވި އެވެ.
