ރައީސް އިސްކުރެއްވީ ސަރުކާރަށް ލިބޭ ފައިދާއަށްވުރެ މަސްވެރިންގެ ކަންބޮޑުވުން: ޝިޔާމް
ލޭނު އަޅައިގެން މަސްވެރިކަން ކުރަން ހުޅުވައިލަން ނިންމެވި ނިންމެވުމަށް އަމަލު ނުކުރައްވާގޮތަށް މިއަދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވުމުން އެނގިގެން ދިޔައީ, ލޭނު މަސްވެރިކަމުން ސަރުކާރަށް ލިބެން އޮތް ނަފާއަށްވުރެ ބޮޑަށް، ރައީސް އިސްކުރެއްވީ އެ ސިނާޢަތުގައި ޙަރަކާތްތެރިވާ ބައެއް ފަރާތްތަކަށް ހުރި ދަތިތަކާއި ކަންބޮޑުވުންތައް ކަމަށް މަސްވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ލޭނު މަސްވެރިކަމަށް ހުއްދަ ދިނުމަށް ވަޒީރުންގެ މަޖިލީހުން ފާސްކޮށްފައިވަނީ މިދިޔަ ޖޫން 13 ގައެވެ. ރާއްޖޭގައި ލޭނު އަޅައިގެން މަސްވެރިކަން ކުރުމަށް ހުޅުވައިލުން އަނބުރާ ގެންގޮސް ލޭނު މަސްވެރިކަމަށް ހުއްދަ ނުދޭން މިއަދު ރައީސް ނިންމެވިއެވެ.
ރައީސް އޮފީހުން ބުނީ އެ ނިންމުން ބަދަލުކުރަން ރައީސް ނިންމފައިވަނީ އެކަމާ ގުޅިގެން ކަންބޮޑުވުން ފާޅުކޮށް، 'ބޮޑު ކަންނެލި މަސްވެރީންގެ ޔޫނިއަން'ގެ ހުށަހެޅި ކަންކަމަށް ބެލުމަށް ފަހު ކަމަށެވެ.
މިއަދު ރައީސުލްޖުމްހޫރިއްޔާ ޑރ. @MMuizzu އެ އިސްކުރެއްވީ ލޭނު މަސްވެރިކަމުން ސަރުކާރަށް ލިބެން އޮތް ނަފާއަށްވުރެ ބޮޑަށް، މި ސިނާޢަތުގައި ޙަރަކާތްތެރިވާ ބައެއް ފަރާތްތަކަށް ހުރި ދަތިތަކާއި ކަންބޮޑުވުންތައް. ސަރުކާރުން މަސްވެރިންގެ އަޑުއަހާ މަސްވެރިންނަށް ފައިދާހުރި ގޮތަކަށް މި… https://t.co/6jEQUuHRjk
— Ahmed Shiyam (@Shiyamaldives) August 29, 2024
އެ ޚަބަރު ޓްވީޓް ކުރައްވަމުން ޝިޔާމް ވިދާޅުވީ,ސަރުކާރުން މަސްވެރިންގެ އަޑުއަހާ، މަސްވެރިންނަށް ފައިދާހުރި ގޮތަކަށް މި ސިނާޢަތް ބައްޓަންކުރުމަށް އަބަދުވެސް މަސައްކަތް ކުރާނެކަމަށެވެ. އަދި މިސިނާޢަތް އިތުރު ހަރުފަތަކަށް ގެންގޮސް ރައްޔިތުންނަށާ ޚާއްޞަކޮށް މަސްވެރި ޢާއިލާތަކަށް ކުރިމަތިވެފައިވާ ދަތިކަމުން އަރައިގަނެވޭނެކަމަށެވެ.
