މިދިޔަ ދެ ދުވަހު ލައިސަންސް ނެތި ދުއްވި 17 އުޅަނދެއް ހުއްޓުވި
މިދިޔަ ދެ ދުވަހު ލައިސަންސް ނެތި ދުއްވި 17 އުޅަނދެއް ހުއްޓުވި ކަމަށް ފުލުހުން ބުނެފި އެވެ.
ފުލުހުން އެހެން ބުނީ މިއަދު ހެނދުނު "އެކްސް" ގައި ކުރި ޕޯސްޓެއްގަ އެވެ.
ފުލުހުން ވަނީ މިދިޔަ އަންގާރަ ދުވަހުގެ ހެނދުނު 9 އިން ފެށިގެން އިއްޔެ ހެނދުނު 9 ޖެހުމުގެ ނިޔަލަށް މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ކުރަމުންދާ މަސައްކަތުގެ ތަފާސް ހިސާބުތައް ހިއްސާކޮށްފަ އެވެ.
10 ކާރަކާއި 22 ސައިކަލެއް ހުއްޓުވަ ބަލާ ފާސްކުރިއިރު އޭގެ ތެރޭގައި ނުރައްކާތެރިކޮށް ދުއްވި 1 ކާރަކާއި 3 ސައިކަލު ހިމެނޭ ކަމަށް ފުލުހުން ބުންޏެވެ.
އެ މުއްދަތުގެ ތެރޭގައި:
- 3 ކާރަކާއި 19 ސައިކަލަކަށް ފިޔަވަޅު އަޅާފައިވޭ.
- 2 ކާރަކާއި 15 ސައިކަލެއް ދުއްވާފައިވަނީ ލައިސަންސް ނެތި.
- 3 ކާރަކާއި 19 ސައިކަލެއް ޓޯ ކުރެވުނު.
- 7 ކާރަކާއި 3 ސައިކަލު ދުއްވި ޑްރައިވަރުންނަށް ނަސޭހަތް ދީފައިވޭ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ހާއްސަ އިސްކަމެއް ދީގެން މަސައްކަތް ފަށާފައިވަނީ މިދިޔަ ހަފްތާގެ ތެރޭގައި ނުރައްކާތެރި ގިނަ އެކްސިޑެންޓްތަކެއް ހިނގާފައި ވަނިކޮށެވެ.
އެގޮތުން މިދިޔަ ބުދަ ދުވަހުގެ ރޭ މާލޭގައި ހިނގި އެކްސިޑެންޓެއްގައި އަނިޔާވި 21 އަހަރުގެ މުހައްމަދު ލީވާނަށް ފަރުވާދެނިކޮށް އާދިއްތަ ދުވަހު އޭނާ ވަނީ މަރުވެފަ އެވެ. އަދި ބުރާސްފަތި ދުވަހުގެ ދަންވަރު ސްޕޯޓްސް ކާރަކުން ޖެހި ހުޅުމާލޭގައި ހިނގި އެކްސިޑެންޓެއްގައި 23 އަހަރުގެ ހަސަން ސަމާހު ނަމަކަށް ކިޔާ ޒުވާނަކު ވަނީ މަރުވެފަ އެވެ.
މީގެ އިތުރުން މިދިޔަ ހޮނިހިރު ދުވަހުގެ ހެނދުނު ހުޅުމާލޭގައި ކާރަކާއި ސައިކަލެއްގައި ޖެހި ހިނގި އެކްސިޑެންޓުގައި އަނިޔާވި 20 އަހަރުގެ ފިރިހެން މީހާއަށް އައިޖީއެމްއެޗްގެ އައިސީޔޫގައި ދަނީ ފަރުވާދެމުންނެވެ.
އެރޭ އިތުރު އެކްސިޑެންޓެއް ހިނގާފައިވާއިރު، އެ އެކްސިޑެންޓުގައި އަނިޔާވި ފިރިހެނެކާއި އަންހެނެކަށް ވަނީ ފަރުވާދީފަ އެވެ. އަދި މިދިޔަ އާދިއްތަ ދުވަހުގެ ރޭ މާފަންނު ބަސް ޓާމިނަލް ކައިރީ ދެ ސައިކަލު ޖެހި ހިންގި އެކްސިޑެންޓުގައި، އަނިޔާވެގެން ބިދޭސީ ދެ ފިރިހެނުންނާއި ދިވެހި ފިރިހެނަކަށް ފަރުވާ ދީފައިވާއިރު، އެތަނުން 31 އަހަރުގެ ބިދޭސީ މީހާއަށް އަދިވެސް ދަނީ ފަރުވާދެމުންނެވެ.
ސަމާހު މަރުވި މައްސަލާއާ ގުޅިގެން ބާރު ސްޕީޑުގައި ވެހިކަލް ދުއްވާ ފަރާތްތަކާ މެދު ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނެސް، އެކަންކަން ތަންފީޒު ކުރަން ފަށަން ސަރުކާރުގެ ކަމާ ގުޅުންހުރި އިދާރާތަކަށް ރައީސް ޑރ. މުހައްމަދު މުއިއްޒު ވަނީ މިދިޔަ ހުކުރު ދުވަހުގައި އަންގާފަ އެވެ.
