ޓެންޑަ ބޯޑުގެ ހުއްދަ ނުހޯދާ އައްޑޫ ކައުންސިލުން 27 މިލިއަނާ ހަމައަށް ފަސް ޕްރޮޖެކްޓް ހަވާލުކުރި: އޮޑިޓް

ދައުލަތުގެ މާލިއްޔަތުގެ ގަވާއިދާ އެއްގޮތަށް ޓެންޑަ ބޯޑުގެ ހުއްދަ ހޯދުމުގެ ބަދަލުގައި 6.5 މިލިއަން ރުފިޔާއިން ފެށިގެން 27.7 މިލިއަން ރުފިޔާ އާ ދެމެދުގެ ފަސް ޕްރޮޖެކްޓެއް އައްޑޫ ސިޓީ ކައުންސިލްގެ އިދާރާގެ ބިޑު ކޮމިޓީން އެވޯޑުކޮށްފައިވާ ކަމަށް އެ އިދާރާގެ އޮޑިޓް ރިޕޯޓުން ދައްކައިފި އެވެ.
އޮޑިޓަ ޖެނެރަލް ގެ އޮފީހުން އެކުލަވާލައި މިދިޔަ މަހުގެ 25 ވަނަ ދުވަހު އާންމުކުރި އައްޑޫ ސިޓީ ކައުންސިލްގެ އިދާރާ 2020 އަދި 2021 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައި ވަނީ އައްޑޫ ސިޓީގެ ތިން އަވަށެއްގައި ގާއިމުކުރެވޭ "ގޭދޮށު މަސް ޕްލާންޓް" ތަކުގެ ކޮންސަލްޓެންސީ ފީ ދޫކުރުމުގެ ކުރިން ނިންމަން ޖެހޭ މަސައްކަތްތަކުގެ ތަފުސީލު އެއްބަސްވުމުގައި ހިމަނާފައިނުވާ ކަމަށެވެ. ދެހާސް ވިހި ވަނަ އަހަރުގެ ޖުލައި މަހުން ފެށިގެން ނުވަ މަސް ދުވަހުގެ ކޮންސަލްޓެންސީ ފީ ގެ ގޮތުގައި 553،820 ރުފިޔާ ކައުންސިލްގެ އިދާރާއިން ހަރަދުކޮށްފައިވާ ކަމަށެވެ. މާޗް 2021 ވަނަ އަހަރުގެ 31 ވަނަ ދުވަހުގެ ނިޔަލަށް އެއްވެސް މަސް ޕްލާންޓެއްގެ އަމަލީ މަސައްކަތް ފެށިފައި ނުވާ ކަމަށެވެ.
ހިތަދޫ އަވަށުގައި ގާއިމުކުރާ "ގޭދޮށު މަސްޕްލާންޓް" ގާއިމުކުރުމުގެ މަސައްކަތް 9،201،855 ރުފިޔާއަށް 280 ދުވަހުގެ ތެރޭގައި މަސައްކަތް ނިންމާ ގޮތަށް 2020 ވަނަ އަހަރުގެ މެއި މަހުގެ 28 ވަނަ ދުވަހު ކުންފުންޏަކާ ހަވާލުކުރި ކަމަށެވެ. އެހެންނަމަވެސް މަސައްކަތް ހަވާލުކުރި ކުންފުންޏަކީ މައުލޫމާތު ކަރުދާހުގައި ހިމަނާފައިވާ ގޮތަށް ކޮންޓްރެކްޓަރުގެ މާލީ ހާލަތު އަދި މަސައްކަތުގެ ތަޖުރިބާ ބަލަން ކަނޑައަޅާފައިވާ ބައެއް ކްރައިޓީރިއާތައް ހަމަނުވާ ފަރާތެއް ކަމަށެވެ.
"ހިތަދޫ މަސްޕްލާންޓްގެ މަސައްކަތް ކުރިއަށް ނުދާތީވެ، އެއްބަސްވުން އުވާލާފައިވީ ނަމަވެސް، އެޑްވާންސްގެ ގޮތުގައި ދޫކޮށްފައިވާ 900،000 ރުފިޔާ އަނބުރާ ކައުންސިލްގެ އިދާރާއަށް ލިބިފައި ނުވުމާއި މަސައްކަތުގެ އަގު 5،000،000 ރުފިޔާއަށް ވުރެން ބޮޑު ނަމަވެސް، ޓެންޑަ ބޯޑަށް ހުށަހަޅައި އެ ބޯޑުގެ ލަފާ ނުހޯދާ ކައުންސިލްގެ އިދާރާގެ ބިޑް ކޮމިޓީން މަސައްކަތް އެވޯޑްކުރަން ނިންމާފައިވުމާއި 25 ފެބްރުއަރީ 2024 ގެ ނިޔަލަށް އެއްވެސް މަސް ޕްލާންޓެއްގެ މަސައްކަތް އެއްކޮށް ނިމިފައި ނުވުން،" އޮޑިޓް ރިޕޯޓުގައިވެ އެވެ.އޮޑިޓް އޮފީހުން ބުނި ގޮތުގައި ދައުލަތުގެ މާލިއްޔަތުގެ ގަވާއިދާ އެއްގޮތަށް ޓެންޑަ ބޯޑުގެ ހުއްދަ ހޯދުމުގެ ބަދަލުގައި 6.5 މިލިއަން ރުފިޔާއިން ފެށިގެން 27.7 މިލިއަން ރުފިޔާ އާ ދެމެދުގެ ފަސް ޕްރޮޖެކްޓެއް އައްޑޫ ސިޓީ ކައުންސިލްގެ އިދާރާގެ ބިޑު ކޮމިޓީން އެވޯޑުކޮށްފައިވާ ކަމުގަ އެވެ.
ޓެންޑަ ބޯޑުގެ ހުއްދަ ނުހޯދައި ހަވާލުކޮށްފައިވާ ޕްރޮޖެކްޓްތައް:
- ހިތަދޫ އަވަށުގައި ގޭދޮށު މަސް ޕްލާންޓް ގާއިމުކުރުން - 9،201،855 ރުފިޔާ
- މަރަދޫ އަވަށުގައި ގޭދޮށު މަސް ޕްލާންޓް ގާއިމުކުރުން - 27،757،058 ރުފިޔާ
- ހުޅުމީދޫ އަވަށުގައި ގޭދޮށު މަސް ޕްލާންޓް ގާއިމުކުރުން - 12،613،714 ރުފިޔާ
- ހިތަދޫ އަވަށުގައި ޓޫރިޒަމް ޒޯނުގެ ލޭންޑް ސްކޭޕިން މަސައްކަތް - 6،579،002 ރުފިޔާ
- ފޭދޫ އަވަށުގައި ޓޫރިޒަމް ޒޯނުގެ ލޭންޑް ސްކޭޕިން މަސައްކަތް - 6،550،062 ރުފިޔާ
ރިޕޯޓުގައި އިތުރަށް ފާހަގަކޮށްފައިވާ ކަންކަމުގެ ތެރޭގައި:
- ލިކުއިޑޭޓެޑް ޑެމޭޖަސްގެ ގޮތުގައި އުނިކުރަން ޖެހޭ ފައިސާ އުނިކޮށްފައި ނުވުން
- ދައުލަތުގެ އާމްދަނީ ފައިސާގެ ގޮތުގައި ބަލައިގެންފައިވާ ފައިސާ ޕަބްލިކް ބޭންކް އެކައުންޓަށް ޖަމާކުރަމުން ގެންގޮސްފައި ނުވުން
- އައްޑޫ ސިޓީގެ އަވަށްތަކުގެ ބިމާއި ސިޓީ ކައުންސިލްގެ ސަރަހައްދުގެ ތެރޭގައި ހިމެނޭ ރަށްރަށުގެ ބިން ބޭނުންކުރުމާ ބެހޭ ޕްލޭނެއް އެކުލަވާލާފައި ނުވުން
- ވިޔަފާރީގެ ބޭނުންތަކަށް ކުއްޔަށް ބިން ދޫކުރުމުގައި ގަވާއިދުގައި ބަޔާންކޮށްފައިވާ ރޭޓަށް ވުރެ ކުޑަ ރޭޓެއްގައި ބިން ކުއްޔަށް ދޫކޮށްފައިވުން





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.