ރާއްޖެ އެތެރެކުރަން އުޅުނު 3.48 ކިލޯގެ ޑްރަގު އަތުލައިގަނެފި
ވައިގެ މަގުންނާއި ޕޯސްޓު މެދުވެރިކޮށް ރާއްޖެ އެތެރެ ކުރަން އުޅުނު 3.48 ކިލޯގެ މަސްތުވާތަކެތި އަތުލައިގެންފި އެވެ.
މޯލްޑިވްސް ކަސްޓަމްސް ސާވިސްއިން "އެކްސް" ގައި މިއަދު ކުރި ޕޯސްޓެއްގައި ބުނީ ރާއްޖެ އެތެރެކުރަން އުޅެނިކޮށް އަތުލައިގެން މަސްތުވާތަކެތީގެ ތެރޭގައި ހިމެނެނީ ކޮކެއިންއާއި ހެރޮއިން ކަމަށެވެ. އަދި އެތަކެތި އަތުލައިގެންފައިވަނީ މި މަހުގެ 5 ވަނަ ދުބަހާ 7 ވަނަ ދުވަހު ކަމަށް ވެސް ކަސްޓަމުން ބުންޏެވެ.
ކަސްޓަމުން ބުނީ މި މަހުގެ 5 ވަނަ ދުވަހު އަތުލައިގެން ކޮކެއިންގެ ބަރުދަނުގައި 2.440 ކިލޯ ހުރި ކަމަށެވެ. އަދި އެތަކެތި އަތުލައިގެންފައިވަނީ ވެލާނާ އިންޓަނޭޝަން އެއާޕޯޓުން ކަމަށެވެ.
މި މަހުގެ 7 ވަނަ ދުވަހު އަތުލައިގެން ހެރޮއިންގެ ބަރުދަނުގައި 1.040 ކިލޯ ހުރި ކަމަށާއި އެ ތަކެތި އަތުލައިގަތީ ޕޯސްޓް މެދުވެރިކޮށް ރާއްޖެ އެތެރެކުރަން އުޅެނިކޮށް ކަމަށް ކަސްޓަމުން ބުންޏެވެ.
މިދިޔަ މަހު ވެސް ރާއްޖެ އެތެރެކުރަން އުޅުނު 3.588 ކިލޯގެ މަސްތުވާކެތި ކަސްޓަމްސްއިން އަތުލައިގެންފައިވެ އެވެ. އެއީ ހެރޮއިންގެ 3058 ގުރާމާއި ސިންތެޓިކް ކެތިނޯންގެ 215 ގުރާމް އަދި މެތްއެމްފެޓަމިންގެ 315 ގުރާމެވެ.
