މުރައިދޫގެ މުވައްޒަފުންގެ އަދަދާ ގުޅޭ މައްސަލައިގައި 241 ކޮމިޓީ ސިއްރުކޮށްފި

ރައްޔިތުންގެ މަޖިލިހުގެ ރައީސް ދިރިއުޅުއްވާ ރަސްމީ ގެކޮޅު، މ. މުރައިދޫގޭގެ މުވައްޒަފުންނާ ގުޅޭ މައުލޫމާތު ސާފުކުރުމަށް އެދި ހުށަހެޅި މައްސަލަ އާ ގުޅިގެން ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ސިއްރުކޮށްފި އެވެ.

Ads by Hajj Corporation

ހިނގަމުންދާ 20 ވަނަ ރައްޔިތުންގެ މަޖިލިހުގެ ރައީސް، އަބްދުއްރަހީމް އަބްދުﷲ މުރައިދޫގެއަށް ބަދަލުވެ ވަޑައިގެންނެވީ މިދިޔަ ޖުލައި މަހު އެވެ. ބަދަލުވުމުގެ ކުރިން ބައެއް މަރާމާތުތައް އެ ގެކޮޅަށް ގެނަ އެވެ.

މުރައިދޫގެ މަރާމާތު ކުރުމަށް ކުރި ހަރަދާއި އެ ގެކޮޅުގައި މަސައްކަތްކުރާ މުވައްޒަފުންގެ އަދަދާ އަދި އެ މީހުންނަށްދޭ މުސާރައިގެ ތަފުސީލު ހޯދުމަށް ނޫހަކުން ހުށަހެޅި އެވެ.

އެކަމާ ގުޅިގެން މަޖިލިހުގެ އިދާރާއިން ބުނެފައި ވަނީ މަޖިލިހުގެ އިމްތިޔާޒުތަކާއި ބާރުތަކުގެ ގާނޫނުގެ ދަށުން މަޖިލިހުގެ ރައީސަކީ ހިމާޔަތާއި ރައްކާތެރިކަންދޭ ބޭފުޅެއް ކަމަށެވެ. އެހެންވުމާ އެކު އެކަމާ ގުޅޭގޮތުން ގޮތެއް ނިންމާނީ 241 ކޮމިޓީން ކަމަށެވެ.

މައްސަލަ ދިރާސާ ކުރުމަށް އެ ކޮމިޓީން މިއަދު ބޭއްވި ބައްދަލުވުމުގައި ކޮމިޓީގެ މުގައްރިރު، އޭދަފުށި ދާއިރާގެ ކޮންގްރެސް ޕާޓީގެ މެމްބަރު އަހްމަދު ސަލީމް ވިދާޅުވީ މައްސަލައިގެ މުއްދަތު ހަމަވެ، އިތުރަށް 15 ދުވަސް ހޯދައިގެން ވެސް ސިޓީއަށް ޖަވާބު ނުދެވި އޮތީ މަޖިލިސް ޗުއްޓީގައި އޮތުމާ ގުޅިގެން ކަމަށެވެ.

"މަޖިލިހުގެ ރައީސް ހުންނަވާ ގެކޮޅުގައި ތިބޭ މުވައްޒަފުންގެ އަދަދާއި އެ މުވައްޒަފުންގެ މުސާރަތަކާ މި ތަފުސީލު ހޯދަން އެކިއެކި ފަރާތްތަކުން މި ލިޔާ ލިޔުންތަކާ މަޖިލިސް އިދާރާއިން މި ކޮމިޓީއަށް ފޮނުވާފައިވާ ސިޓީއެއް،" ސަލީމް ވިދާޅުވި އެވެ.

އެކަމާ ގުޅިގެން ކޮމިޓީގެ ބައްދަލުވުން ސިއްރު ކުރުމާ މެދު ގޮތެއް ނިންމުމަށް ހުޅުވާލުމަށް ސިއްރުކޮށްގެން ކުރިއަށް ގެންދިއުމަށް ހުށަހެޅުއްވީ އިނގުރައިދޫ ދާއިރާގެ މެމްބަރު އަދި ކޮންގްރެސް ޕާޓީގެ ޕީޖީ ލީޑަރު އިބްރާހީމް ފަލާހެވެ. އޭނާގެ އެ ހުށަހެޅުއްވުމަށް މާމިގިލި ދާއިރާގެ ޖުމްހޫރީ ޕާޓީގެ މެމްބަރު ގާސިމް އިބްރާހީމް ތާއީދު ކުރެއްވި އެވެ. ކޮމިޓީން ވަނީ އެ ހުށަހެޅުން ފާސްކޮށްފަ އެވެ.

މުރައިދޫގޭގެ ޗީފް އޮފް ސްޓާފް ކަމުގެ މަގާމަށް އައްޔަންކޮށްފައި ވަނީ ނޫސްވެރިޔާ މުންޑޫ އާދަމް ހަލީމެވެ. އަދި ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގަށް ވަނީ ޑިރެކްޓަ ޖެނެރަލްކަން ދީފަ އެވެ.