ވައްކަންކުރަން އުޅުނިކޮށް ހައްޔަރުކުރުމުން ބުނީ ޖެހިގެން ހުރި ގޭ ފުރާޅު ޓިނު ރަނގަޅުކުރަން ކަމަށް!
ވައްކަމުގެ މައްސަލައެއްގައި ހައްޔަރުކުރި މީހަކު، ދިފާއުގައި ޖެހިގެން ހުރި ގޭގެ ފުރާޅުން ޓިނު ރަނގަޅުކުރަން ކަމަށް ކޯޓުގައި ބުނެފި އެވެ.
ވައްކަމުގެ މައްސަލާގައި ހައްޔަރުކޮށްފައިވަނީ ހއ. ހޯރަފުށި, ބަގީޗާގެ, އަލީ ވިސާމް (39އ). އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހަށް ބަންދުކުރަން އަމުރުކޮށްފައިވެ އެވެ.
ކޯޓު އަމުރުގައި ބުނެފައިވަނީ ކުށްކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި އޭގެ ތެރޭގައި ސީނަށް ދިޔަ ފުލުހުންގެ ހާދިސާ ރިޕޯޓް އަދި ރެކޯޑް ހިމެނޭ ކަމަށެވެ.
ބަންދުގައި ބަހައްޓަން ޖެހޭ ހާލަތެއް ކަމަށް އެ އަމުރުގައި ބުނެފައިވަނީ ވިސާމް ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށްޓަކަ އެވެ.
ކޯޓު އަމުރުގައި ބުނީ ވިސާމަކީ ކުށުގެ ރެކޯޑް އޮތް މީހެއް ކަމަށާއި ކުށުގެ ތުހުމަތުގައި މީގެ ކުރިން 24 ފަހަރު ހައްޔަރުކޮށްފައިވާ ކަމަށެވެ. އަދި އޭގެ ތެރެއިން 15 ފަހަރު ބަންދަށް ބަދަލުކޮށްފައިވާކަން އޭޭނާގެ ހައްޔަރު އަދި ބަންދުލޮގަށް ބެލުމުން އެނގޭ ކަމަށް ކޯޓު އަމުރުގައި ބުނެފައިވެ އެވެ.
ވައްކަންކުރަން ވަތް މީހަކު ހިފަހައްޓައިގެން އުޅޭކަން ޓޯކީން ގޮވައި މައުލޫމާތު ދިނުމުން ސީނަށް ގޮސް މައުލޫމާތު ސާފުކުރުމުން އެތަނުގައި ތިބި މީހުން އަލީ ވިސާމްއާ ސުވާލުުކުރުމުން ކައިރި ޖެހިގެންއިން ގޭގެ ފުރާޅު ޓިނު ރަނގަޅު ކުރަން އުޅުނު ކަމަށް އޭނާ ބުނި ކަމަށް ކޯޓު އަމުރުގައި ބުންޏެވެ.
ކޯޓު އަމުރުގައި އިތުރަށް ބުނެފައިވަނީ ފުލުހުން ވިސާމް އާ ސުވާލުކުރުމުން ވިސާމްގެ ފޯނު ފުރާޅު މައްޗަށް ވެއްޓިގެން އެރީ ކަމަށް ބުނި ކަމަށެވެ.
