ވިލާމާޓުން 3 އެކްސްއެލް ވަގަށް ނެގި މީހަކު ހައްޔަރުކޮށްފި
ވިލާމާޓުން އެކްސްއެލް 3 ދަޅު ވަގަށް ނެގި މައްސަލާގައި މީހަކު ހައްޔަރުކޮށްފި އެވެ.
އެ މައްސަލާގައި ހައްޔަރުކޮށްފައިވަނީ ޏ. ފުވައްމުލައް, މާލެގަން, ހުރުއަޑި، އުމުރުން 37 އަހަރުގެ މުހައްމަދު ރަޝީދެވެ.
އޭނާގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރުކުރުމުން 15 ދުވަހަށް ބަންދުކުރުމަށް އަމުރުކޮށްފައިވެ އެވެ.
ކޯޓު އަމުރުގައި ބުނީ ކުށްކުރިކަމަށް ތުހުމަތުކުރެވޭ ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި އޭގެ ތެރޭގައި ސީނަށް ދިޔަ ފުލުހުންގެ ހާދިސާ ރިޕޯޓް އަދި ކުށުގެ ރެކޯޑް ހިމެނޭ ކަމަށެވެ.
ބަންދުގައި ބަހައްޓަން ޖެހޭ ހާލަތެއްކަމަށް އަމުރުގައި ބުނެފައިވަނީ އޭނާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެކަމަށްޓަކައި ކަމަށެވެ.
ރަޝީދަކީ ކުށުގެ ތުހުމަތުގައި މީގެ ކުރިން 53 ފަހަރު ހައްޔަރުކޮށްފައިވާ މީގެ ކަމަށާއި އޭގެ ތެރެއިން 9 ފަހަރު ބަންދަށް ބަދަލުކޮށްފައިވާ ކަން އޭނާގެ ހައްޔަރު އަދި ބަންދު ލޮގަށް ބެލުމުން އެނގޭ ކަމަށް އަމުރުގައި ބުނެފައިވެ އެވެ.
އަމުުރުގައި ބުނެފައިވަނީ ވިލާމާޓް ފިހާރައިން ވައްކަން ކޮށްފައިވާ ކަމަށް މައުލޫމާތު ލިބުމުން ފުލުހުން ސީނަށް ހާޒިރުވެ މުހައްމަދު ރަޝީދުއާ ސުވާލުކުރުމުން 3 އެކްސްއެލް ދަޅު ނެގި ކަމަށް ބުނެފައިވާ ކަމަށެވެ.
މުހައްމަދު ރަޝީދު 3 އެކްސްއެލް ދަޅު ނެގިކަން ފާހަގަވީ ސީސީޓީވީއިން ފެނުމުން ކަމަށާއި ސެކިއުރިޓީ ގާޑުންނާ ސުވާލުކުރުމުން އޭނާ ހިފަހައްޓާފައިވަނީ ފަރީދީމަގު, ރެޑްސްޓާ ދޮރުމަތިން ކަމަށް ކޯޓު އަމުރުގައި ބުންޏެވެ.
