ސަރުކާރު ކުންފުނިތައް ބޮއްސުންލިއިރު ކަންކަން ބެލޭނެ ގޮތް އޮތީ ނުވެ: އުޝާމް
ސަރުކާރު ކުންފުނިތަކުގެ ކަންކަން ބޮއްސުންލައިގެން ދިޔައިރު އެ ކަންކަން ބެލޭނެ ގޮތް މިހާތަނަށް އޮތީ ނުވެ ކަމަށް ބަންޑާރަނައިބު އަހްމަދު އުޝާމް ވިދާޅުވެއްޖެ އެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އުޝާމް ވިދާޅުވީ މުއައްސަސާތައް ހަދަމުން ގޮސް، ކަންކަމުގައި ޒިންމާވާން ޖެހޭ ފަރާތްތައް ނޭނގޭ ވަރަށް މުއައްސަސާތައް އުފެދިފައިވާ ކަމަށެވެ. ސަރުކާރު ކުންފުންޏެއްގެ ކަންކަމުގައި ސަރުކާރަށް ބަސްނުބުނެވޭހާ ހިސާބަށް ކަންކަން ގޮސްފައިވާ ކަމަށް ވިދާޅުވި އެވެ.
"މުއައްސަސާތަކާއި މިނިވަން އިދާރާތަކާ ތަންތަން ހަދަމުން ހަދަމުން ގޮސް ކުންފުނީގެ ކަންކަމުގައި ބަސް ބުނާނީ މިނިސްޓްރީތޯ، ސަރުކާރުތޯ، ޕީސީބީތޯ ނޭނގޭ ހިސާބަށް ކަންކަން ގޮއްސި،" އުޝާމް ވިދާޅުވި އެވެ.
ގާނޫނުތައް އުފެދުމުގެ މަގުސަދުތައް ހާސިލުނުވާ މިންވަރަށް ކަންތައްތައް ގޮސްފައިވާ ކަމުގައި ފާހަގަކުރެއްވި އެވެ. ކުންފުނިތައް ރަނގަޅަށް ނުހިންގިގެން އުޅެނީ އެ ތަންތަނުގެ ކަންތައްތައް ބަލަހައްޓާނީ ކޮން ބައެއްކަން ނޭނގޭ ހިސާބަށް ކަންކަން ގޮސްފައިވާތީ ކަމަށެވެ.
"ޕީސީބީން ބަލާނެ ކަމަށް އެއްބަޔަކު ތިބެނީ. މިނިސްޓްރީން ބަލާނެ ކަމަށް އަނެއް ބަޔަކު ތިބެނީ. ކުންފުނިތަކުގެ ކޮރަޕްޝަނާއި ކަންތައްތައް ވޭތުވެދިޔަ އަހަރުތަކުގައި އިންތިހާއަށް މައްޗަށް ދިޔައިރުގައި އެ ކަންކަން ބެލޭނެ ގޮތެއް ވެސް ނެތް،" އުޝާމް ވިދާޅުވި އެވެ.
ބަންޑާރަނައިބު ވިދާޅުވި ގޮތުގައި އެފަދަ ތަންތަން ބެހެއްޓުމަކީ ކޮންމެހެން ކުރަން ޖެހޭ ކަމެއްތޯ ބަލަމުންދާ ކަމުގަ އެވެ. އެގޮތުން ކުންފުނިތައް ބެލެހެއްޓުމަށް ވަކިން ތަނެއް ހެދުމާ މެދު ސަރުކާރުން ވިސްނަމުންދާ ކަމުގަ އެވެ. މީގެކުރިން ކުންފުނިތައް ބަލަހައްޓަމުން އައީ ފިނޭންސް މިނިސްޓްރީގެ ދަށުން ކަމަށާއި އޭރު އެކަން ރަނގަޅަށް ކުރެވުނު ކަމަށް ގަބޫލުކުރެއްވޭ ކަމަށް އޭނާ ވިދާޅުވި އެވެ.
ދިމާވެފައިވާ މައްސަލައަށް ހައްލު ހޯދުމަށް ގާނޫނަށް އިސްލާހު ގެންނަން ޖެހޭ ނަމަ އެކަން ކުރުމާ މެދު ވިސްނަމުންދާ ކަމުގައި އުޝާމްގެ ވާހަަކައިގައި ފާހަގަކުރެއްވި އެވެ.
