މަސްތުވެގެން މަގުމަތީގައި އުޅޭ މީހުންނާއި ސަލާން ޖަހާ މީހުން ރިމާންޑް ސެންޓަރުތަކަށް
މަސްތުވެގެން މަގުމަތީގައި އުޅޭ މީހުންނާއި ސަލާން ޖަހަން އުޅޭ މީހުން ރިމާންޑް ސެންޓަރުތަކަށް ގެންދަން ފަށައިފި އެވެ.
އެކަން ހާމަކުރީ މަސްތުވާތަކެއްޗާ ގުޅޭ ގޮތުން މިއަދު ބޭއްވި ނޫސްވެރިންގެ ބައްދަލުވުމެއްގައި ޑްރަގް އެންފޯސްމަންޓްގެ ހެޑު ނާހިދު ހުސެއިން އެވެ،
އޭނާ ވިދާޅުވީ މިއީ ނެޝަނަޑް ޑްރަގް އެޖެންސީއާއި ފުލުހުންގެ ޑްރަގް އެންފޯސްމަންޓް ގުޅިގެން ފެށި އޮޕަރޭޝަނެއް ކަމަށެވެ.
ނާހިދު ވިދާޅުވީ އެ އޮޕަރޭޝަން ކުރިއަށް ގެންދަނީ މަސްތުވާތަކެއްޗާ ބެހޭ ގާނޫނުގެ 103 ވަނަ މާއްދާގެ ދަށުން ކަމަށެވެ.
"އަޅުގަނޑުމެން މިކުރާ މަސައްކަތުގެ ތެރެއިން [ރިމާންޑް ސެންޓަރަށް ގެންދާ މީހުންގެ ތެރޭގައި] މަގުމަތީގައި ސަލާން ޖަހަން އުޅޭ މީހުންނާއި ވައްކަމާއި ފޭރުމުގައި އުޅޭ މަސްތުވާތަކެތި ބޭނުންކުރާ މީހުންނާއި މަގުމަތީގައި މަސްތުގެ ހާލުގައި ތިބޭ މީހުންނާއި އަދި މިސްކިތްތަކުގައި ނިދާ ހަދާ މަސްތުވާތަކެތި ބޭނުންކުރާ މީހުން ހިމެނޭ" އޭނާ ވިދާޅުވި އެވެ.
ނާހިދު ވިދާޅުވީ އެ މަަސައްކަތުގެ ތެރެއިން 9 އޮކްޓޫބަރު 2024 އިން ފެށިގެން މިހާތަނަށް 14 މީހުން މަސްތުވާތަކެއްޗާ ބެހޭ ގާނޫނުގެ 103 ވަނަ މާއްދާގެ ދަށުން ޑްރަގް އޮފެންޑާ ރިމާންޑް ސެންޓަރެއްގައި ބަންދު ކުރެވިފައިވާ ކަމަށެވެ. އަދި މަސްތުވާތަކެއްޗާ ބެހޭ ގާނޫނުގެ ދަށުން ބަންދުން ނުވީއްލި އެ ފަރާތްތަކުގެ ފަރުވާގެ ކަންކަން ކުރިއަށް ގެންދިއުމަށް ކަންކަން ކަމާގުޅޭ އިދާރާތަކާ އެކީގައި ކުރެވެމުންދާ ކަމަށެވެ.
"މި ފެށުނު މަސައްކަތުން ކުރިއަށް އޮތްތަނުގައި ރައްޔިތުންނަށް މަގުމަތިން ހެޔޮ ބަދަލުތަކެއް ފެނިގެން ދާނެކަން އެއީ އަޅުގަނޑު ޔަގީންކުރާ ކަމެއް،". އޭނާ ވިދާޅުވި އެވެ.
