ސްޕޯޓްސް ކާރަކުން ޖެހި މީހަކު މަރުވި މައްސަލާގައި ދައުވާކުރަން ފޮނުވައިފި
މިދިޔަ ސެޕްޓެމްބަރު މަހު ހުޅުމާލޭ ސެންޓްރަލް ޕާކް ކައިރިން ބާރު ސްޕީޑުގައި ދުއްވާފައި ދިޔަ ސްޕޯޓްސް ކާރަކާއި ސައިކަލެއް ޖެހި ހިނގި އެކްސިޑެންޓުގައި މީހަކު މަރުވި ހާދިސާގައި ކާރު ދުއްވަން އިން މީހާގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލް އޮފީސް (ޕީޖީ) އަށް ފޮނުވައިފި އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ ކާރު ދުއްވަން އިން އައްޑޫ ސިޓީ ހިތަދޫ ވައިލެޓްފެހި، މުހައްމަދު ވިސާމް ސިއްދީގު (26އ) ގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ފޮނުވާފަައިވަނީ މިދިޔަ ހޮނިހިރު ދުވަހު ކަމަށެވެ.
ހުޅުމާލެ އެކްސިޑެންޓުގައި މަރުވީ މޯލްޑިވްސް ކަރެކްޝަނަލް ސާވީސްގެ އޮފިސަރެއްގެ ގޮތުގައި މަސައްކަތްކުރަމުން ދިޔަ ލ. އިސްދޫ ބީޗްހައުސް، ހަސަން ސަމާހް (23އ) އެވެ. އެ އެކްސިޑެންޓް ހިނގީ ސެޕްޓެމްބަރު މަހުގެ 6 ވަނަ ދުވަހުގެރޭ މެންދަމު 2:48 ހާއިރު އެވެ. ސަމާހު ހުޅުމާލޭ ހޮސްޕިޓަލަށް ގެންދިޔައިރުވެސް މަރުވެފައިވާ ކަމަށް ފުލުހުން ވަނީ މައުލޫމާތުދީފަ އެވެ.
އެ މައްސަލާގައި ހައްޔުކުރި ވިސާމް ހުރީ ޝަރީއަތް ނިމެންދެން ބަންދުކޮށްފަ އެވެ. ބަންދުކުރަން ހުޅުމާލޭ ކޯޓުން ނެރުނު އަމުރު ވިސާމްގެ ފަރާތުން އިސްތިއުނާފް ކުރި އެވެ. އެކަމަކު ހައި ކޯޓުން ވެސް ވަނީ ބަންދުކުރަން ނެރުނު އަމުރަށް ތާއީދުކޮށްފަ އެވެ.
ފުލުހުން ބުނެފައިވާ ގޮތުން ވިސާމް އަކީ ކާރު ދުއްވުމުގެ ލައިސެންސްވެސް ނެތް މީހެކެވެ.
Ads by STO
