ފަތުރުވެރިކަމުގެ މަހާސިންތާ ފަށައިފި
ފަތުރުވެރިކަމާ ބެހޭ މަހާސިންތާ މިއަދު ފަށައިފި އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އާއި ފަތުރުވެރިކަމާ ބެހޭ މިނިސްޓްރީ ގުޅިގެން އިންތިޒާމުކޮށްގެން ބާއްވާ މި މަހާސިންތާ ކުރިއަށްދަނީ ކްރޮސްރޯޑްގަ އެވެ.
މަހާސިންތާގައި ފަތުރުވެރިކަމާ ބެހޭ އެކި ދާއިރާތަކުން 150 އަށް ވުރެ ގިނަ މީހުން ބައިވެރިވެ އެވެ. އެއީ ރިސޯޓްތަކާއި ގެސްޓްހައުސް، ލިވާބޯޑް އަދި ލޯކަލް ޓުއަރިޒަމްގައި ހަރަކާތްތެރިވާ ފަރާތްތަކާއި ޓްރެވަލް އެޖެންޓުން އަދި ފަތުރުވެރިކަމާ ބެހޭ ޖަމިއްޔާތަކާއި، ޓްރެވަލް މީޑިއާތަކެވެ.
މި މަހާސިންތާގައި ފަތުރުވެރިކަމަށް އާ ސެގްމަންޓްތައް ތައާރަފު ކުރުމަށް މަޝްވަރާ ކުރުމަށް ވަނީ ނިންމާފަ އެވެ. އަދި ޕެނަލް ޑިސްކަޝަންއަކާއި ގްރޫޕް ޑިސްކަޝަންތައްވެސް ކުރިޔަށް ގެންދިއުމަށް ވަނީ ނިންމާފަ އެވެ.
އެމްއެމްޕީއާރްސީ އިން ބުނީ އެ މަހާސިންތާގެ މަގްސަދަކީ ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ކުރެވިދާނެ ކަންތައްތަކާ ބެހޭގޮތުން ދާއިރާގެ ފަރާތްތަކާއި މަޝްވަރާކޮށް، އާ ހިޔާލުތަކާއި ވިސްނުންތައް ދެނެގަތުން ކަމަށެވެ.
މަހާސިންތާގައި ޓޫރިޒަމް މިނިސްޓަރު އިބްރާހިމް ފައިސަލް އަދި އެމްއެމްޕީއާރްސީގެ މެނޭޖިންގް ޑިރެކްޓަރު ޝިއުރީ އިބްރާހިމް އާއި އެމްއެމްޕީއާރްސީގެ ޗެއާޕާސަން އަބްދުﷲ ގިޔާސް ބައިވެރިވެ ވަޑައިގަންނަވަ އެވެ.
