އދ. ގެ ޓޯޗާ ސަބްކޮމިޓީގެ މެމްބަރަކަށް އަނެއްކާވެސް ފަނޑިޔާރު ޝުޖޫން އިންތިހާބުވެއްޖެ
އދ. ސަބްކޮމިޓީ އޮން ދަ ޕްރިވެންޝަން އޮފް ޓޯޗާ (އެސްޕީޓީ)ގެ މެމްބަރަކަށް އަނެއްކާވެސް ރާއްޖޭގެ ކެނޑިޑޭޓު އަދި ފަނޑިޔާރު އައިޝަތު ޝުޖޫން އިންތިހާބުވެއްޖެ އެވެ.
ސްވިޓްޒަލޭންޑްގެ ޖެނީވާގައި ބޭއްވުނު އިންތިހާބުގައި ޝުޖޫން މެމްބަރުކަމަށް ހޮވިވަޑައިގެންނެވީ ވާދަކުރި ހުރިހާ ކެނޑިޑޭޓުންގެ ތެރެއިން އެންމެ ގިނަ ވޯޓު ހޯއްދަވައިގެން ނެވެ.
މިއީ 2010 ވަނަ އަހަރު އެކަމަނާ އެސްޕީޓީ އަށް އެންމެ ފުރަތަމަ ހޮވިވަޑައިގެން ފަހުން އެ މަގާމު އަދާކުރައްވާނެ ހަތަރު ވަނަ ދައުރެވެ. އެގޮތުން އެކަމަނާ ވަނީ 2021 އިން 2024 އަށް އެސްޕީޓީގެ އެއް ދައުރު އަދި 2011 އާއި 2018 އާއި ދެމެދު ޖެހިޖެހިގެން 2 ދައުރު އަދާކުރައްވާފައިވެ އެވެ. އަދި މި މަގާމުގައި ހުންނެވި އިރު އެކަމަނާ ވަނީ ވައިސް-ޗެއަރ އޮފް ޖުރިސްޕްރޫޑެންސްގެ މަގާމުގެ އިތުރުން އެސްޕީޓީގެ ރެޕަޓުއަރކަންވެސް ކުރައްވާފައިވެ އެވެ.
އެ އިންތިހާބު ޝުޖޫން ކާމިޔާބު ކުރެއްވީ މި ކޮމިޓީގެ 12 ގޮނޑިއަށްކުރިމަތިލެއްވި 14 ކެންޑިޑޭޓުންނާ ވާދަކުރައްވައިގެންނެވެ. ފަނޑިޔާރު ޝުޖޫންއަކީ މަދަނީ ޖަމުއިއްޔާތަކުގައާއި ޝަރުއީ ދާއިރާގައި، ހާއްސަކޮށް އިންސާނީ ހައްގުތައް ހިމާޔަތްކުރުމުގައި ތަޖުރިބާކާރު ބޭފުޅެކެވެ.
އެސްޕީޓީއަކީ އ.ދ. ގެ އެންމެ ބޮޑު އެއް ހިއުމަން ރައިޓްސް ޓްރީޓީ ބޮޑީ އެވެ. އަދި މިއީ 25 އިންޑިޕެންޑެންޓް އެކްސްޕާޓުންނާއެކު އޮޕްކެޓް އިން އުފައްދާފައިވާ ބައިނަލްއަގުވާމީ ބޮޑީއެކެވެ.
