ވިޔަފާރިވެރިންގެ ކިބައިން ވަޖީހް އެދިވަޑައިގެންނެވީ މުދާ ކްލިއަ ކުރުމުގެ މަސައްކަތް އަވަސްކޮށްދޭން
މާލެ ވިޔަފާރި ބަނދަރަށް ކުރިމަތިވެފައި ޖާގައިގެ ދަތިކަމާ ހުރެ މުދާ ގެންނަ ފަރާތްތަކުން ބޯޓުން މުދާ ބޭލުމާ އެކު، މުދާ ކްލިއަ ކުރުމުގެ މަސައްކަތް އަވަހަށް ކޮށްދިނުމަށް ވިޔަފާރިވެރިންގެ ކިބައިން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ މުހައްމަދު ވަޖީހް އިބްރާހިމް އެދިވަޑައިގެންފި އެވެ.
މާލެ ވިޔަފާރި ބަނދަރަކީ މީގެ 39 އަހަރު ކުރިން ތަރައްގީ ކުރި ބަނދަރެެކެވެ. ވުމާ އެކު ބަނދަރަށް ކަނޑައެޅިފައިވާ ބިމަކީ ނިސްބަތުން ކުޑަ ބިމެކެވެ. ތަނުގެ ޖާގަ ހުރިގޮތުން އެއްފަހަރާ ބެހެއްޓެނީ 2،200 ކޮންޓެއިނަރެވެ. އެހެންނަމަވެސް މިހާރު އެއްފަހަރާ 3،000 އާއި 3،500 އާ ދެމެދުގެ އަދަދަކަށް ކޮންޓެއިނަރު ބަހައްޓަން ޖެހެ އެވެ.
"ދެން" ގެ "އެކްސްކްލޫސިވް" ގައި ވާހަކަ ދައްކަވަމުން ވަޖީހް ވިދާޅުވީ ބަނދަރުގެ ތެރޭގައި އެކި ގޮތްގޮތަށް ކޮންޓެއިނަރު ޖަހައިގެން ޖާގަ އިތުރުކުރެވޭތޯ ބަލާފައިވާ ކަމަށެވެ. އެގޮތަށް މަސައްކަތްކޮށްގެން ވެސް ތަނުގެ ޖާގަ ފުރިފައިވާ ކަމަށެވެ. މާލެ ބަނދަރުގެ އިތުރުން އެ ކުންފުނިން ހިންގަމުން އަންނަ ހުޅުމާލެ ބަނދަރުގެ ސަރަހައްދުގައި ކަމަށް ކަނޑައެޅިފައިވާ ޖާގަ ވެސް ފުރިފައިވާ ކަމަށެވެ.
ރާއްޖެ އަންނަ ބޯޓުތައް ބޮޑުވެ، ގެންނަ މުދާ އިތުރުވެފައިވާއިރު ދުނިޔޭގެ އެންމެ ބޮޑު ޝިޕިންލައިން، މެޑިޓެރޭނިއަން ޝިޕިން ކޮމްޕެނީ (އެމްއެސްސީ) އިން މިފަހުން މުދާ ގެންނަން ފެށުމާ އެކު އެ އަދަދު އެތައް ތަނަކުން އިތުރުވެފައިވާ ކަމަށެވެ. އެތެރެކުރެވޭ މުދާ ގިނަވުމާ އެކު މާލެ ވިޔަފާރި ބަނދަރު ތިލަފުއްޓަށް ބަދަލު ކުރުމުގެ މަސައްކަތް ކުރުމަށް އެމްޕީއެލްއަށް ދީފައިވާ ބިމުގައި ވަގުތީ ގޮތުން ކޮންޓެއިނަރު ބެހެއްޓޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުން އަންނަކަން ފާހަގަ ކުރެއްވި އެވެ.
"ކުރިއަށް އޮތް ދެތިން މަސް ދުވަހުގެ ތެރޭގައި ތިލަފުށީގައި ޕޯޓު އެޅުމަށް ގަނެފައި އޮތް ބިމުގައި ވަގުތީ ކީވޯލެއް ޖަހައިގެން އެ ތަނަށް ހުސް ކޮންޓެއިނަރުތައް ޓްރާންސްފާ ކުރާނަން. ކުރެވުނީމާ މި ތަނަށް އަނެއްކާވެސް ތަންކޮޅެއް ލުއި ލިބޭނެ. ލުއި ލިބުނީމާ އަޅުގަނޑުމެންގެ މަސައްކަތް އިތުރަށް އަވަސްވެގެންދާނެ،" ވަޖީހް ވިދާޅުވި އެވެ.
އެމްޕީއެލްގެ ސީއީއޯ ވިދާޅުވި ގޮތުގައި ވިޔަފާރި ބަނދަރު ފުރަތަމަ ތަރައްގީ ކުރެވުނުއިރު، ރާއްޖެއަށް މަހެއްގެ މައްޗަށް ގެނެވެމުން ދިޔައީ 1،000 ކޮންޓެއިނަރު ކަމުގަ އެވެ. އެ އަދަދު މިހާރު 6،000 އިން މައްޗަށް ގޮސްފައިވާ ކަމުގަ އެވެ. ކުރިމަތިވެފައި ޖާގައިގެ ދަތިކަމާ ހުރެ، މުދާ ގެންނަ ފަރާތްތަކުން ބޯޓުން އެ މުދަލެއް ބޭލުމާ އެކު ވީހާވެސް އަވަހަކަށް މުދާ ކްލިއަ ކުރެވޭނެ ގޮތަކަށް މަސައްކަތް ކޮށްދިނުމަށް އެދިވަޑައިގެންނެވި އެވެ.
އެމްޕީއެލުން ބޭނުން ކުރަމުންދާ އުޅަނދުތަކާއި ތަނުގެ ބިން އަޑިގުޑަންވުމާ އެފަދަ އިތުރު މައްސަލަތައް އެބަހުރި ކަމުގަ އެވެ. އެކަމަކު މި ކަންކަމަކީ ވާރުތަވީ ކަންތައްތައް ކަމަށާއި މަސައްކަތް ކުރަނީ ހުރި މައްސަލަތަކަށް ހައްލު ހޯދުމަށް ކަމުގަ އެވެ.
"އަޅުގަނޑުމެންގެ މި ދައުރުގައި އިއްޔެއަށް ވުރެ މިއަދު. މިއަދަށް ވުރެ މާދަމާ ކަންތައް ފަހިކޮށްދޭނަމޭ. އަޅުގަނޑު ޔަގީންކަން އަރުވަން ރާއްޖޭގެ ހުރިހާ ވިޔަފާރިވެރިންނަށް،" ވަޖީހް ފާހަގަކުރެއްވި އެވެ.
