އަހަރު ދުވަހުގެ މުއްދަތަށް މުސާރައިގެ 10 އިންސައްތަ ނުނަގަން ފަލާހު ނިންމަވައިފި
ކުރިއަށް އޮތް އަހަރު ދުވަހުގެ މުއްދަތަށް ރައްޔިތުންގެ މަޖިލިހުގެ މެމްބަރެއްގެ ހައިސިއްޔަތުން އޭނާއަށް ލިބިވަޑައިގަންނަވާ މުސާރައިގެ 10 އިންސައްތަ ނުނަންގަވާ ގޮތަށް އިނގުރައިދޫ ދާއިރާގެ މެމްބަރު އަދި ކޮންގްރެސް ޕާޓީގެ ޕީޖީ ލީޑަރު އިބްރާހިމް ފަލާހް ނިންމަވައިފި އެވެ.
ޝަރުއީ ދާއިރާގެ އިސްވެރިންނާއި މަޖިލިހުގެ މެމްބަރުންނާއި މިނިވަން މުއައްސަސާތަކާއި ސަރުކާރު ހިއްސާވާ ކުންފުނިތަކުގެ އިސްވެރިންގެ އިތުރުން ސިޔާސީ މުވައްޒަފުންގެ މުސާރައިން 10 އިންސައްތަ ދެ އަހަރު ދުވަހުގެ މުއްދަތަށް އުނިކުރަން ނިންމަވާފައިވާކަން ރައީސް ޑރ. މުހައްމަދު މުއިއްޒު އިއުލާނުކުރައްވާފައި ވަނީ މިދިޔަ ބުދަ ދުވަހު އެވެ.
"އެކްސް" ގައި ރޭ ކުރެއްވި ޕޯސްޓެއްގައި ފަލާހް ވިދާޅުވީ ރައީސް ގައުމުގެ އިގުތިސޯދީ ހާލަތު ރަނގަޅުކޮށް، އާމްދަނީ އިތުރު ކުރުމަށާއި ހަރަދުތައް ކުޑަކުުރުމަށް އަޅުއްވަމުން ގެންދަވާ ފިޔަވަޅުތަކަށް އެއްބާރުލުން ދެއްވުމަށް ނިންމަވާފައިވާ ކަމަށެވެ.
"އަޅުގަނޑުގެ މަޖިލިސް މުސާރައިން ނޮވެމްބަރު އެކަކުން ފެށިގެން އެއް އަހަރު ދުވަހަށް 10 އިންސައްތަ އުނިކުރަން ނިންމައިފިން،" ރައީސްގެ ނިންމެވުމަށް އިޝާރަތް ކުރައްވާ ފަލާހް ވިދާޅުވި އެވެ.
މަޖިލިހުގެ މެމްބަރުންނަށް މުސާރަ އާއި އިނާޔަތުގެ ގޮތުގައި މަހަކު 82،500 ރުފިޔާ ލިބެ އެވެ. އެއީ އަސާސީ މުސާރައިގެ ގޮތުގައި ދެވޭ 42،500 ރުފިޔާ އާއި ލިވިން އެލަވަންސްގެ 20،000 ރުފިޔާގެ އިތުރުން ވަކި އަދަދަކަށް ކޮމިޓީތަަކަށް ހާޒިރުވުމުން ލިބޭ 20،000 ރުފިޔާ އެވެ.
ވިހިވަނަ މަޖިލިހުގައި ތިއްބަވާ 93 މެމްބަރުންގެ މުސާރައަށް މަހަކު 7.67 މިލިއަން ރުފިޔާ އަންނަނީ ހޭދަކުރަމުންނެވެ.
ރައީސްގެ ފިޔަވަޅުތަކަށް ތާއީދުކުރެއްވުމުގެ ގޮތުން ރައްޔިތުންގެ މަޖިލިހުގެ ރައީސް، އަބްދުއްރަހީމް އަބްދުﷲ ވެސް ވަނީ އޭނާއަށް ލިބިވަޑައިގަންނަވާ މުސާރައިގެ 50 އިންސައްތަ ނުނެންގެވުމަށް ނިންމަވާފަ އެވެ. މަޖިލިހުގެ ރައީސްއަށް މުސާރައިގެ ގޮތުގައި 73،125 ރުފިޔާ ލިބޭއިރު، އޭނާ ދެން ނަންގަވާނީ 36،562 ރުފިޔާ އެވެ.
އިގުތިސޯދީ އިސްލާހީ އެޖެންޑާގެ ދަށުން ގިނަ ފިޔަވަޅުތަކެއް އަޅުއްވަން ނިންމާފައިވާކަން ހާމަކުރެއްވިއިރު، އެމަނިކުފާނު ވަނީ ލިބިވަޑައިގަންނަވާ މުސާރައިން 50 އިންސައްތަ އުނިކުރެއްވުމަށް ނިންމަވާފަ އެވެ.
ރައީސް ވިދާޅުވެފައިވާ ގޮތުގައި އަންނަ އަހަރަށް ދައުލަތުގެ ބަޖެޓު ހުށަހަޅާއިރު، މި ނޫނަސް ދައުލަތުގެ ހަރަދު ކުޑަކުރުމުގެ މަގުސަދުގައި ގިނަ ފިޔަވަޅުތަކެއް އަޅުއްވާނެ ކަމުގަ އެވެ. އެގޮތުން ބޭންކުތައް ފިޔަވައި ސަރުކާރު ކުންފުނިތަކުގެ މުވައްޒަފުންގެ މުސާރައިން 10 އިންސައްތަ އުނިކުރާނެ ކަމަށާއި ކުންފުނިތަކުގެ ވެރިންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމުގައި ކަނޑައަޅުއްވާނެ ކަމުގަ އެވެ.
އިސްލާހީ ފިޔަވަޅުތައް އެޅުމުގައި 12،000 ރުފިޔާއަށް ވުރެ މަދުން މުސާރަ ލިބޭ މުވައްޒަފުން އިސްތިސްނާ ކުރާނެ ކަމުގައި ވެސް ރައީސް ފާހަގަކުރެއްވި އެވެ.
