ދައުލަތުގެ ބަޖެޓު ހުށަހަޅަން ބުރާސްފަތި ދުވަހު މަޖިލީހުގެ ޖަލްސާ އެއް
އަންނަ އަަހަރަށް ލަފާކުރާ ދައުލަތުގެ ބަޖެޓު އަންނަ ބުރާސްފަތި ދުވަހު ހުށަހަޅަން ނިންމަވާފައިވާ ކަމަށް ރައްޔިތުންގެ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހްމަދު ނާޒިމް ވިދާޅުވެއްޖެ އެވެ.
މާލިއްޔަތު ކޮމިޓީ އާއި އިގުތިސޯދީ ކޮމިޓީގެ ޖޮއިންޓް ކޮމިޓީގެ މިއަދުގެ ބައްދަލުވުމުގައި ވާހަކަ ދައްކަވަމުން ވެރިކަން ކުރާ މައި ޕާޓީ، ކޮންގްރެސް ޕާޓީއަށް ނިސްބަތްވެ ވަޑައިގަންނަވާ ނާޒިމް ވިދާޅުވީ މިހާރު ހުށަހެޅިފައިވާ ކަންކަން ނިންމުމެއް ޓައިމްލައިނެއް ކަނޑައަޅަން ޖެހިފައިވާ ކަމަށެވެ. އަންނަ އަހަރަށް އެކުލަވާލާ ދައުލަތުގެ ބަޖެޓުގެ މަސައްކަތް ކުރިއަށް އޮތް ދެ ދުވަހުގެ ތެރޭގައި ނިމޭނެ ކަމަށް ބެލެވޭ ކަމަށެވެ.
"އެހެންކަމަށް ވެއްޖިއްޔާ ގާނޫނުގައި ބުނާ ބަޖެޓު ހުށަހެޅުމުގެ ޖަލްސާ ބުރާސްފަތި ދުވަހު ބާއްވާ ގޮތަށް މަޖިލިސް ރައީސް ނިންމަވާފައި ވަނީ،" ނާޒިމް ވިދާޅުވި އެވެ.
އެގޮތަށް އެކަން ނިންމަވާފައިވާ ކަމަށް މަޖިލިހުގެ އަމީން އާންމު ރޭގައި މައުލޫމާތު ދެއްވާފައިވާ ކަމަށެވެ. މިހާރު ހުށަހަޅާފައިވާ ބިލުތަކަކީ ދައުލަތަށް ލިބެންވާ އާމްދަނީ ކަނޑައަޅާ ބިލުތަކެއް ކަމަށެވެ. މައި ބަޖެޓަށް އާމްދަނީ ވެއްދެން އޮތީ ބިލުތައް ނިމިގެން ކަމަށެެވެ. އެހެންކަމުން ބިލުތަކުގެ މަސައްކަތް މާދަމާގެ ނިޔަލަށް ނިންމުމަށް ނާޒިމް ހުށަހެޅުއްވި އެވެ.
"އަޅުގަނޑު މިހެން ދަންނަވާއިރު ވެސް އެނގޭ މިއަދާ މާދަމައަކީ ވަރަށް ކުރު މުއްދަތެއްކަން މިކަން ކުރަން. އެހެންނަމަވެސް އަޅުގަނޑު ގަބޫލުކުރާ ގޮތުގައި އަޅުގަނޑުމެން މާގިނަ ބަޔަކު މި ކޮމިޓީއަށް ހާޒިރުކުރުމުގެ މާނައެއް ވެސް،" ނާޒިމް ވިދާޅުވި އެވެ.
އެހެންނަމަވެސް ކަންކަމާ ގުޅިގެން ލަފާ ދެއްވަން ބޭނުންވާ ފަރާތްތަކަށް އެ ފުރުސަތު ދެވިދާނެކަން ފާހަގަކުރެއްވި އެވެ.
