މެރާކީ ބިއްލޫރި ގަނޑު ތަޅާލި ދެމީހުން 15,800 އިން ޖޫރިމަނާކޮށް, ހުކުމްކޮށްފި
މެރާކީ ކޮފީ ރޯސްޓާސް ކެފޭގެ ބިއްލޫރި ގަނޑު ތަޅާލި ދެމީހުން 15,800 އިން ޖޫރިމަނާކޮށް, ހުކުމްކޮށްފި އެވެ.
އެ މައްސަލާގައި މިދިޔަ ބުރާސްފަތި ދުވަހު ހުކުމްކޮށްފައިވަނީ މއ. ޝިރުމީނާއާބާދު, ތަސްލީމް އާދަމްއާއި މއ. ނަހީދީމަންޒިލް, ސިބާހް ޝަރީފްގެ މައްޗަށެވެ.
އެ މައްސަލައަކީ 23 ނޮވެންބަރު 2019 ދުވަހުގެ ރޭ 11:15 ހާއިރު, މެރާކީ ކެފޭއަށް ވަންނަ ދޮރުގެ ބިއްލޫރިގަނޑުގައި ނޫކުލައިގެ ދެލިހުރި ގަލަކަމުން, "އަންހެން އާލާތުން ފިރިހެން ނުވައްޗޭ! ފިރިހެނުން އަންހެން ނުވައްޗޭ!" މިހެން ލިޔެފައި އޮތް ފިޔާތޮށިކުލައިގެ ސްޓިކީނޯޓެއް ތަތްކުރުމަށްފަހު, ޕޭވްމަންޓް ގަލަކުން ޖަހައި އެ ކެފޭގެ ވާތް ފަޅީ ބިއްލޫރިގަނޑު ތަޅާލި މައްސަލަ އެވެ.
އެ މައްސަލާގައި އެ ދެމީހުންގެ މައްޗަށް މުދަލަށް ގެއްލުން ދިނުމުގެ ކުށުގެ ދައުވާ އުފުލި ނަމަވެސް އެ ދައުވާއަށް ދެ މީހުންވެސް އިންކާރުކުރި އެވެ.
ދައުވާ ސާބިތުކުރަން ދައުލަތުން ދެ މީހުންނަށް ވަކި ވަކިން 10 ހެކި ހުށަހެޅި އެވެ.
ސީސީޓީވީ ފުޓޭޖާ ހަވާލާދީ ޝަރީއަތުގައި ފާހަގަކޮށްފައިވަނީ އެ ދެމީހުން ސައިކަލުގައި އެމްޓިސީސީ ޓަވަރު ކައިރީގައި, ބޮޑުތަކުރުފާނު މަގުގައި ހުންނަ މަނީ އެކްސްޗޭޖް ތަނަކަށް ވަންނަ ތަން ފެންނަ ކަމަށެވެ. އަދި އެތަނުގެ ކައުންޓަރުގައިއިން މީހެއްގެ އަތުން ފިޔާތޮށި ކުލައިގެ ސްޓިކީ ނޯޓް ނަގައިގެން ޝިބާހް ލިޔާ މަންޒަރު ފެންނަން ކަމަށް ބުނެފައިވެ އެވެ.
ހުކުމުގައި ބުނެފައިވަނީ އެއީ ވަކި މީހަކަށް އަމާޒުކޮށް ދިން ހަމަލާއެއް ކަމަށް ގަބޫލުކުރެވޭ ކަމަށާއި ސަބަބަކީ އެ ދުވަސްވަރަކީ އެތަނުގައި މަސައްކަތްކުރާ ފަރާތެއް ހެދުން އެޅުމާ ގުޅިގެން މީޑިއާގައި ވާހަކަ ދެކެވެމުން ދިޔަ ދުވަސްވަރެއް ކަމަށް ވާތީ ކަމަށެވެ.
އެ ކުށުގެ އަސާސީ އަދަބަކީ 2 މަހާއި 12 ދުވަހަށް ޖަލަށްލުން ނަމަވެސް ނިޔަތުގެ މިންވަރަށް ބަލާ 1 ދަރަޖަ މަތިކުރަން ޖެހޭ ކަމަށް ފެންނާތީ އެ އަދަބު 3 މަހަށް ބަދަލުކުރި އެވެ. އަދި އެ ކުށުގެ ބަންދުގައި ހޭދަކުރި 11 ދުވަސް އުނިކޮށް އެ ދެމީހުން ތަންފީޒުކުރަން ޖެހޭ އަދަބަކީ 2 މަހާއި 19 ދުވަސް ކަމަށް ކަނޑައެޅި އެވެ.
އެ ދެމީހުން ކުޑަ އަދަބަކަށް އެދިފައިވާތީ ޖޫރިމަނާގެ އަދަބަކަށް ބަދަލުކުރަން ނިންމާ, އެ ފައިސާ 12 މަސް ދުވަހުގެ ތެރޭގައި މީރާއަށް ދައްކަން މައްސަލަ ބެއްލެވި ގާޒީ އާދަމް މުހައްމަދު ހުކުމްކުރެއްވި އެވެ.
