ވަގަށް ސިނގިރޭޓް އެތެރެކުރި މައްސަލާގައި މުވައްޒަފުންނަށް ފިޔަވަޅު އަޅައިފިން: ހޯކްސް
ވަގަށް ސިނގިރޭޓް އެތެރެކުރި މައްސަލާގައި ތުހުމަތުކުރެވޭ މުވައްޒަފުން މަސައްކަތުން އެކަހެރިކޮށްފައިވާ ކަމަށް ދަ ހޯކްސް ޕްރައިވެޓް ލިމިޓެޑް (ދަ ހޯކްސް) އިން ބުނެފި އެވެ.
ރާއްޖެއަށް ސިއްރުން އެތެރެކުރަން އުޅުނު 1.695 މިލިއަން ސިނގިރޭޓު ސްޓިކްސް މޯލްޑިވްސް ކަސްޓަމްސް ސާވިސްއިން އަތުލައިގެންފައިވާއިރު އެތަކެތި ރާއްޖެ ގެނެސްފައިވަނީމިދިޔަ ބުރާސްފަތި ދުވަހު ރާއްޖެއައި "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުންނެވެ.
އެ ބޯޓުން ހޯކްސް ޕްރައިވެޓް ލިމިޓެޑްގެ ދޯންޏެއް ކަމަށްވާ "ހޯކްސް ރޯދި" އަށް އެތަކެތި އަރުވައިގެން ކ. ތިލަފުއްޓަށް ގެންދިޔަ ކަމަށްވާއިރު އެތަކެތި އަތުލައިގެންފައިވަނީ ތިލަފުށިންނެވެ.
އެކަމާ ގުޅިގެން ހޯކްސްއިން މިއަދު ނެރުނު ބަޔާނުގައި ބުނީ ހުއްދަނެތި ރާއްޖެއަށް ސިނގިރޭޓް އެތެރެކުރި ހާދިސާގައި ދަ ހޯކްސް ޕްރައިވެޓް ލިމިޓެޑް (ދަ ހޯކްސް) ގެ ބައިވެރިވުންވާކަމަށް ފެތުރެމުންދާ ރަނގަޅު ނޫން ދޮގު ވާގަކަތަކެއް ކަމަށެވެ.
ހޯކްސްއިން ބުނީ ފުލުހުން އެ ދޯންޏަށް އަރާ ބަލާ ފާސްކޮށްފައިވަނީ ބަލާ ފާސްކުރުމުގެ އަމުރެއް ނުވަތަ ކޯޓު އަމުރެއް ނެތި ކަމަށެވެ.
ފުލުހުންނަށް ދޭން ޖެހޭ ހުރިހާ އެއްބާރުލުމެއްދީ, ގާނޫނާއި ހިލާފު އަމަލުތަކުގައި ބައިވެރިވެ އެ އަމަލުތައް ހިންގާ ފަރާތްތައް ދެނެގަނެ ހައްޔަރުކުރުމަށް ކުރަން ޖެހޭ މަސައްކަތް ކުރުމަށް ފުރިހަމަ އެއްބާރުލުން ދީފައިވާނެ ކަމަށް ހޯކްސްއިން ބުނެ އެވެ.
ހޯކްސްއިން ބުނީ އެ ކުންފުނިން އިދާރީ ގޮތުން ތަހުގީގުތައް ކުރަމުންދާ ކަމަށެވެ. އަދި ކެމެރާ ފުޓޭޖްތައް ބެލިބެލުމުން މިހާތަނަށް ކުންފުނީގެ މުވައްޒަފުންތަކެއްގެ މައްޗަށް ޣައިރު ގާނޫނީ ހަރަކާތްތަކަކަށް ކުންފުނީގެ ރިސޯސަސް ބޭނުންކޮށް އަމިއްލަ މަންފާނަގަން މަސައްކަތްކޮށްފައިވާކަމުގެ ތުހުމަތުކުރެވިފައިވާ ކަމަށް ހޯކްސްއިން ބުނެ އެވެ.
އެ ކުންފުނިން ބުނީ ތުހުމަތު ކުރެވުނު މުވައްޒަފުންތައް ވަގުތުން މަސައްކަތުން އެކަހެރިކޮށް, ކަމާ ބެހޭ ތަހުގީގީ އިދާރާތަކަށް އެކަން ރިޕޯޓްކޮށްފައިވާ ކަމަށެވެ.
ހޯކްސްއަކީ ތެޔޮ އެތެރެކޮސް ވިޔަފާރިކުރަމަށް މަޝްހޫރު ކުންފުންޏަކަށްވާއިރު ދުންފަތުގެ އިސްތިއުމާލު ކުރުމަށް ބޭނުންކުރާ އެއްވެސް ބާވަތެއް އެތެރެކުރުމުގެ އެއްވެސް ވިޔަފާރިއެއް ބައިވެރިވުމެއް އަދި އެފަދަ އެއްވެސް ޝައުގުވެރިކަމެއް ނެތް ކަމަށް އެ ކުންފުނިން ބުނެ އެވެ.
ތީކީ އަލައް ކުރާ ކަމެއް ނޫން، ވަރަށް ދުވަސް ތިކަން ހިނގާތާ، ހޯކްސް އަސްލު ވަރަށް މަތީގަ އުޅޭ ބަޔެއްތީ