ޕޮލިސް ޔުނިޓުތަކާ ގުޅޭ ތުހުމަތުތައް ތަހުގީގުކޮށްދޭން ފައްޔާޒު ހުށަހަޅައިފި
ނިމިދިޔަ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ސަރުކާރުން ޕޮލިސް ޔުނިޓުތައް އެޅުމާ ގުޅުންހުރި ޕްރޮޖެކްޓަކާ ގުޅޭގޮތުން އޭނާއަށް ތުހުމަތުކޮށް ދައްކަމުން އަންނަ ވާހަކަތައް ތަހުގީގު ކޮށްދިނުމަށް އެދި އެ ޕާޓީގެ ޗެއާޕާސަން ފައްޔާޒު އިސްމާއިލް ކަމާ ބެހޭ އިދާރާތަކަށް މައްސަލަ ހުށަހަޅުއްވައިފި އެވެ.
ރައްޔިތުންގެ މަޖިލިހުގެ އިއްޔެގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހޯމްލޭންޑް, ސެކިއުރިޓީ އެންޑް ޓެކްނޮލޮޖީ މިނިސްޓަރު އަލީ އިހުސާން ވިދާޅުވީ 2021 ވަނަ އަހަރު ސޮއިކުރި 60 ޕޮލިސް ސްޓޭޝަން އެޅުމުގެ މަޝްރޫއަކީ ގާތްގަނޑަކަށް 60 މިލިއަން ޑޮލަރު ހޭދަކުރަން ނިންމާފައި އޮތް މަޝްރޫއެއް ކަމަށެވެ. މަޝްރޫއަށް އިންޑިއާގެ އެގްޒިމް ބޭންކުން "ފައިނޭންސް" ކޮށްދޭ ގޮތަށް ސޮއިކޮށްފައިވާ ކަަމަށެވެ.
މަޝްރޫއު ފެށުމަށް މަސައްކަތް ކޮށްފައިވާކަން ލިޔެކިޔުންތަކުން އެނގެން ހުރި ނަމަވެސް އަމަލީ ގޮތުން އެއްވެސް މަސައްކަތެއް ހިނގާފައި ނުވާ ކަމަށެވެ. އެހެންނަމަވެސް ލޯނުގެ 15 އިންސައްތަ ދިނުމަށް އެ ކުންފުނިން ދިވެހި ސަރުކާރުގައި އެދުނު ކަމަށެވެ. އަދި މިދިޔަ ސަރުކާރުން 3.6 މިލިއަން ޑޮލަރު އެ ކުންފުންޏަށް ދިން ކަމަށެވެ. އެ ފައިސާއަށް ކުރި ކަމެއްގެ ތަފްސީލު ދީފައި ނުވާ ކަމަށާއި އެއް ބައްދަލުވުމުގައި އެ ފައިސާ ހުރި ކަމަށް ބުނެފައިވާ ކަމަށެވެ.
"އަޅުގަނޑުމެން ދެން ކޮންކަމެއްތޯ އެ ކުންފުނިން ރާއްޖޭގައި ކުރަނީ ބަލާލިއިރުގައި އަޅުގަނޑުމެންނަށް ފާހަގަކުރެވިފައި އެބައޮތް ބިގް ނަމަކަށް ކިޔާ ކުންފުނީގެ ޝެއާ އެ ކުންފުނިން ގަނެގެން މިހާރު މޫނިމާގެ ކިޔާ ގެއެއްގެ އިމާރާތް، އެ ތަނުން ވަރަށް ބާރަށް ކުރިއަށް ގޮސް ނިމެމުންދާކަން،" މިނިސްޓަރު ވިދާޅުވި އެވެ.
ކަމާ ގުޅިގެން "އެކްސް" ގައި މިއަދު ކުރި ޕޯސްޓެއްގައި ފައްޔާޒު ވިދާޅުވި ގޮތުގައި މިނިސްޓަރު އިހުސާން ވަނީ "ކުރީ ސަރުކާރުން" ޕޮލިސް ޔުނިޓުތަކެއް އެޅުމާ ގުޅޭ ޕްރޮޖެކްޓަކާ ގުޅިގެން އެކި ޕްލެޓްފޯމުތަކުގައި ދޮގު މައުލޫމާތު ދެއްވާފައި ކަމުގަ އެވެ. އޭނާގެ ފަރާތުން ދޭން ޖެހޭ ޖަވާބުތައް އެކި ޕްލެޓްފޯމުތަކުގައި ދެވިފައިވާ ކަމުގަ އެވެ.
"ތަހުގީގީ އިދާރާތަކުގެ ބެލެނިވެރި ވަޒީރަކަށް އިހުސާން ހުންނަވާތާ އަހަރެއް ވަނީ. އެ މުއްދަތުގައި އެއްވެސް ތަހުގީގެއް ނުކޮށް، ދައުވާއެއް ނުއުފުލައި މިފަދަ ތުހުމަތުތަކެއް ކުރަމުން ދިޔުމަކީ ޒިންމާދާރުކަން ކުޑަ އަމަލެއް،" ފައްޔާޒު ވިދާޅުވި އެވެ.
ކުރީގެ އިކޮނޮމިކް މިނިސްޓަރު ކުރެއްވި ޕޯސްޓުގައި މައްސަލަ ތަހުގީގުކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އާއި ދިވެހި ފުލުހުންގެ ހިދުމަތަށް ފޮނުވި ސިޓީތައް ވަނީ ހިއްސާކުރައްވާފަ އެވެ. ފާހަގަކުރައްވާފައި ވަނީ މަޖިލިހާއި އެހެނިހެން ތަންތަނުގައި އެ މަޝްރޫއާ ގުޅޭގޮތުން ސަރުކާރުގެ ވެރިންނާއި މިނިސްޓަރު ވާހަކަ ދައްކަވަމުން ގެންދަނީ ސިޔާސީ ބޭނުމުގައި ކަމުގެ ހަގީގަތް އޮޅުވާލައިގެން ކަމުގަ އެވެ.
"މިކަމުގައި ރަސްމީކޮށް ޖަވާބުދާރީވުމުގެ މަގު ތަނަވަސް ކުރުމުގެ ގޮތުން މި މައްސަލަ ތަހުގީގު ކޮށްދިނުމަށް އެދި އޭސީސީ އަދި ފުލުހުންނަށް މިއަދު ހުށަހަޅައިފިން. މި ވާހަކަ އިހުސާން ދެން ދައްކަވަން ވާނީ ރައްޔިތުންގެ ފަރާތުން ހަވާލުކޮށްފައިވާ ޒިންމާ އަދާކުރެއްވުމަށް ފަހު،" ފައްޔާޒު ވިދާޅުވި އެވެ.
ކަމާ ގުޅިގެން ތަހުގީގެއް ކުރަމުންދާ ނަމަ ވީއެންމެ އަވަހަކަށް ތަހުގީގު ނިންމައި އޭނާއަށް ޖަވާބުދާރީ ވެވޭނެ ފުރުސަތު ފަހިކޮށްދިނުމަށާއި ތަހުގީގެއް ކުރަމުން ނުދާ ނަމަ މިނިސްޓަރު ކުރައްވާފައިވާ ތުހުމަތުތަކުގެ އެންމެ ފުނަށް ވާސިލުވެ، ކަމުގެ ހަގީގަތް ހާމަކޮށްދިނުމަށް ވަނީ އެދިވަޑައިގެންފަ އެވެ. އަދި ތަހުގީގެއް ހިންގާ ނަމަ އެ ތަހުގީގަކަށް ފުރިހަމައަށް އެއްބާރުލުން ދޭން ތައްޔާރަށް ހުރި ކަމުގެ ޔަގީންކަން ފައްޔާޒު ވަނީ ދެއްވާފަ އެވެ.
