ވާނުވާ ބަންދު ހައްލުކުރަން މަޖިލީހަށް ބިލެއް ހުށަހަޅައިފި
އެކި މައްސަލަތަކުގައި ތަހުގީގަށް ހައްޔަރުކޮށް ވާނުވާ ބަންދުގައި ތިބޭ މީހުންގެ މައްސަލަ ހައްލުކުރަން ރައްޔިތުންގެ މަޖިލީހަށް ބިލެއް ހުށަހަޅައިފައިވާ ކަމަށް ބަންޑާރަ ނައިބު (އޭޖީ) އަހުމަދު އުޝާމް މިއަދު ވިދާޅުވެއްޖެ އެވެ.
ރައީސް އޮފީހުގައި މިއަދު ކުރިއަށްދިޔަ ނޫސްވެރިންގެ ބައްދަލުވުމެއްގައި އޭޖީ އުޝާމް ވިދާޅުވީ ވާނުވާ ބަންދުގެ މައްސަލައަށް ހައްލެއް ހޯދުމަށްޓަކައި 'ބެއިލް'ގެ ނިޒާމް މިހާރަށްވުރެ ފުރިހަމަކުރުމަށް ގާނޫނަށް އިސްލާހުތަކެއް ހުށަހަޅާފައިވާނެ ކަމަށެވެ. އަދި އެ އިސްލާހުތައް ފާސްކުރުމުން އެ މައްސަލައަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަށް ގަބޫލުކުރައްވާ ކަމަށް އުޝާމް ވިދާޅުވި އެވެ.
އޭޖީ ވިދާޅުވީ ވާނުވާ ޖަހާފައި ތިބި ގިނަ މީހުންނަކީ ކުޑަކުދިންނަށް ޖިންސީ ގޯނާކުރުމާއި، ޓެރަރިޒަމް އާއި ބޮޑެތި މާރާމާރީގެ އަދި މީހުން މެރުމުގެ އިތުރުން މަސްތުވާތަކެތި އެތެރެކުރުމުގެ ކުށުގެ ތުހުމަތު ކުރެވޭ މީހުން ކަމަށެވެ. ފުލުހުންނާއި ޕީޖީއާއެކު ކުރެވުނު މަސައްކަތުން އެކަންކަން ފާހަގަވެފައިވާ ކަމަށް ވިދާޅުވި އެވެ.
އެ ޕްރެސްގައި ކޯޓުގެ ޖާގައާއި ހެދި ޝަރީއަތްތައް ލަސްވާ މައްސަލަ އަށް އިޝާރާތް ކުރައްވާ އުޝާމް ވިދާޅުވީ ހުޅުމާލޭގައި އިމާރާތްކުރަމުންދާ ކްރިމިނަލް ކޯޓުގެ އިމާރާތް އަންނަ އަހަރުގެ ކުރީކޮޅު ނިމޭނެ ކަމަށް އުންމީދުކުރައްވާ ކަމަށެވެ. އެ އިމާރާތް ނިމުމުން ޖާގައިގެ ދަތިކަމަށް އެކަށީގެންވާ ހައްލެއް ލިބިގެންދާނެ ކަމަށް އޭނާ ވިދާޅުވި އެވެ.
ގާނޫނަށް ގާތްގަނޑަކަށް 40 އިސްލާހު މަޖިލީހަށް މިހާރު ހުށަހަޅާފައިވާކަން ފާހަގަކުރައްވަމުން އުޝާމް ވިދާޅުވީ 3 ފޭސް އަކަށް ބަހާލައިގެން އިސްލާހުތައް ހުށަހަޅަން ނިންމާފައިވާ ކަމަށެވެ. އަދި އެންމެ ފުރަތަމަ ގެންނަން ބޭނުންވާ އިސްލާހުތައް މި ދައުރުގައި ހުށަހެޅުމުގެ މަސައްކަތް ކުރަމުންދާ ކަމަށް އުޝާމް ވިދާޅުވި އެވެ.
މަސްތުވާތެކެތީގެ ގާނޫނަށް ގެންނަން ޖެހޭ އިސްލާހު ގެނައުމުގެ މަސައްކަތް ކުރަމުންދާ ކަމަށާއި ގޭންގް ކުށްތައް ހުއްޓުވުމުގެ ހޯމްލޭންޑުން ހުށަހެޅި ބިލު ރިވިއު ކުރަމުންދާ ކަމަށް ވިދާޅުވި އެވެ. އަދި މަސްތުވާތަކެތީގެ ގާނޫނުގެ އިސްލާހުތައް މި ދައުރުގެ ތެރޭގައި މަޖިލީހަށް ހުށަހެޅޭނެ ކަމަށް ލަފާކުރެވޭ ކަމަށް އުޝާމް ވިދާޅުވި އެވެ.
އޭޖީ އިތުރަށް ވިދާޅުވީ ގޭންގްގެ ބިލު ތިން ހަފްތާ އެއް ތެރޭގައި މަޖިލީހަށް ހުށަހެޅުމުގެ މަސައްކަތް ކުރަމުންދާ ކަމަށެވެ.
Ads by STO
