ސްކޫލަކަށް ވަދެ ބިރު ދެއްކި މީހާއަށް ދައުވާ އުފުލައިފި 

މާލޭގެ ސްކޫލަކަށް ވަދެ، އަޑުގަދަކޮށް ބައެއް ޓީޗަރުންނަށް ބިރުދެއްކި ކަމުގެ ތުހުމަތުގައި ހައްޔަރުކުރި މީހާއަށް ދައުވާ އުފުލައިފި އެވެ.

Ads by MWSC

މިދިޔަ އޮގަސްޓް މަހު ހިނގި އެ ހާދިސާއާ ގުޅިގެން ހައްޔަރުކުރީ މއ. ކަނޑޫގެ, އަލީ އަހުމަދު (41އ) އެވެ.

އޭނާގެ މައްޗަށް ދައުވާކޮށް މިއަދު ޝަރީއަތުގެ އަޑުއެހުން ފެށުމަށް ތާވަލުކޮށްފައިވެ އެވެ.

އަލީ އަހުމަދުގެ މައްޗަށްކޮށްފައިވާ ދައުވާތައް:

• އެނގިހުރެ ހުއްދަ ނޫންތަނަކަށް ވަނުމުގެ ކުށުގެ ދެ ދައުވާ
• އާންމު ތަނެއްގައި ހުރި މީހަކު, އެ މީހެއްގެ އަމަލެއްގެ ސަބަބުން އެހެން މީހަކަށް ގޯނާވާނެކަން, ނުވަތަ އުނދަގޫވާނެކަން, ނުވަތަ ބިރު ހީވާނެކަން އެނގިހުރެ, މާރާމާރީ ހިންގައި, ތަޅާފޮޅައި, ހަރުކަށިކޮށް ނުވަތަ ބިރު އުފެދޭ ގޮތަށް އުޅުމުގެ ކުށުގެ ދައުވާ
• އާންމު ތަނެއްގައި ހުރި މީހަކު, އެ މީހެއްގެ އަމަލެއްގެ ސަބަބުން އެހެން މީހަކަށް ގޯނާވާނެކަން, ނުވަތަ އުނދަގޫވާނެކަން, ނުވަތަ ބިރު ހީވާނެކަން އެނގިހުރެ އެކަށީގެން ނުވާ ވަރަށް އަޑު ގަދަކުރުމުގެ ކުށުގެ ދައުވާ
• ގާނޫނު ހިންގުމަށް ހުރަސް އެޅުމުގެ ކުށުގެ ދައުވާ

އެ މީހާގެ ބަންދުގެ މުއްދަތު އެކި ފަހަރު މަތިން އިތުރުކުރުމަށްފަހު މި މަހު ވަނީ ބަންދުން ދޫކޮށްލި އެވެ.

ކޯޓު އަމުރުތަކުން އެނގޭ ގޮތުގައި އެކުށަށް އެ މީހާ އެއްބަސްވެފައިވާއިރު އެ ކަން ކުރެވުނީ ޖަޒުބާތުގައި ޖެހިގެން ކަމަށް އޭނާ ބުނެފައިވެ އެވެ. އަދި މައާފަށްވެސް އެދިފައިވާ ކަަމަށް އަމުރުގައި ބުނެފައިވެ އެވެ.

އެ މީހާ ޓީޗަރުންތަކަކަށް ބިރުދައްކާފައިވަނީ ސްކޫލުގައި ތިބި ދަރިވަރުންގެ ކުރިމަތީގަ އެވެ.