ނުހައްގު މުއްސަނދިކަން ހުއްޓުވަން ގާނޫނަށް އިސްލާހު ގެންނަނީ
ނުހައްގު މުއްސަނދިކަން ހުއްޓުވަން ގާނޫނުލް އުގޫބާތަށް އިސްލާހު ގެންނަން ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރައްވައިފި އެވެ.
ރައީސް ޑރ. މުހައްމަދު މުއިއްޒު މިއަދު އެކްސްގައި ވިދާޅުވީ ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަދިކަން ހޯދުމުގެ މައްސަލަތައް ތަހުގީގުކޮށް ދައުވާކުރުމަށް ހުރި ގޮންޖެހުންތައް ނައްތާލުމަށް މަސައްކަތްކުރައްވާނެ ކަމަށެވެ.
އަދި އެކަމަށްޓަކައި ރާއްޖޭގެ ގާނޫނުލް އުގޫބާތަށް ގެންނަންޖެހޭ އިސްލާހުތައް މިފެށޭ ހަފްތާގައި ސަރުކާރުގެ ފަރާތުން މަޖިލީހަށް ހުށަހެޅުމަށްވާނީ ނިންމާފައިވާ ކަމަށް އެމަނިކުފާނު ވިދާޅުވި އެވެ.
އެގޮތުން، ގާނޫނުލްއުގޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަގާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްގު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެ ކަމަށް ވެސް އެމަނިކުފާނު ވިދާޅުވި އެވެ.
ނަހަމަ ގޮތުގައި ދައުލަތުން ހޯދާފައިވާ ފައިސާ އާއި ރާއްޖެއިން ބޭރުގައި ރައްކާކޮށްފައި ހުރި ވަގު ފައިސާ ހޯދަން "އެސެޓް ރިކަވަރީ" ގާނޫނެއް ހައްދަވާނެ ކަމަށް ރައީސް ޑރ މުހައްމަދު މުއިއްޒު މިދިޔަ ޖުލައި މަހު އޮތީ ވިދާޅުވެފަ އެވެ.
ދައުލަތަށް ނުލިިބި ގެއްލިފައިވާ ފައިސާ ހޯދަން ނިމިގެން ދިޔަ ރައީސް އިބްރާހިމް މުހައްމަދު ސޯލިހުގެ ސަރުކާރުގައި "އެސްޓް ރިކަވަރީ" ކޮމިޝަނެއް ހަދައިގެން މަސައްކަތްކުރި ނަމަވެސް ގެއްލުނު ފައިސާއެއް ހޯދިފައިނުވާއިރު އެ ކޮމިޝަނަށް ގިނަ އަދަދެއްގެ ފައިސާ ހަރަދުވެފައިވާތީ އާންމުންގެ ފާޑުކިއުން އޮތީ ވަރަށް ބޮޑަށް އަމާޒުވެފަ އެވެ.
އެހެން ނަމަވެސް އެ ގާނޫނު އެކުލަވާލާނީ ބައިނަލްއަގްވާމީ މިންގަނޑަށް ފެތޭ ގޮތަށް ރާއްޖެއިން ބޭރުގައި ރައްކާކޮށްފައި ހުރި ރައްޔިތުންގެ ފައިސާވެސް ހޯދޭ ގޮތަށް ކަމަށް ރައީސް މުއިއްޒު އޮތީ ވިދާޅުވެފަ އެވެ.
