ނޫސްވެރިކަމުގެ އިނާމު ހަފްލާގައި "ސްކީލާން" ދެއްކި މައްސަލަ ޕީއެސްއެމްއިން ކުށްވެރިކޮށްފި
މޯލްޑިވްސް މީޑިއާ ކައުންސިލްއިން ރޭ ބޭއްވި ނޫސްވެރިކަމިގެ އިނާމު ދިނުމުގެ ހަފްލާގައި "ސްކީލާން" ޑޮކިއުމަންޓްރީގެ ކްލިޕެއް ދެއްކި މައްސަލަ ދައުލަތުގެ މީޑިއާ ޕީއެސްއެމްއިން ކުށްވެރިކޮށްފި އެވެ.
"ސްކީލާން" ޑޮކިއުމަންޓްރީއަކީ "އަދަދު" ނޫހުން، ރައީސް ޑރ. މުހައްމަދު މުއިއްޒުގެ އާއިލާއާ ގުޅޭ ގޮތުން ގެެނެސްދިން ޑޮކިއުމެންޓްރީ އެވެ.
ރޭ ބޭއްވި ހަފްލާގައި އެ ޑޮކިއުމަންޓްރީއަށް ތަހުގީގީ ނޫސްވެރިކަމުގެ އެވޯޑް ވަނީ ލިބިފަ އެވެ. އެ ޑޮކިއުމަންޓްރީގެ ކުޑަ ކްލިޕްކޮޅެއް ދެއްވީ އެވޯޑް ލިބޭކަން ހާމަކުރުމުގެ ގޮތުން ނެވެ.
ނަމަވެސް ޕީއެސްއެމްއިން މިރޭ ނެރުނު ނޫސް ބަޔާނުގައި ބުނީ "ސްކީލާން" ޑޮކިއުމަންޓްރީގެ ވީޑިއޯ ކްލިޕްއަކީ ޕީއެސްއެމްގެ އެޑިޓޯރިއަލް ކޮންޓެންޓާ ހިލާފު އަދި ނޫސްވެރިކަމުގެ އާންމު މިންގަނޑުތަކާ ހިލާފު ވީޑިއޯއެއް ކަމަށެވެ.
ޕީއެސްއެމްއިން ބުނީ ޕީއެސްއެމްއިން ލައިވް ކަވަރޭޖް ހަދާ ހަފްލާތަކުގައި ދައްކާ ވީޑިއޯ ފުޓޭޖްތަކަކީ ޕީއެސްއެމްގެ އެޑިޓޯރިއަލްއަށް ފެތޭ ކޮންޓެންޓަށް ވާން ޖެހޭނެ ކަމަށެވެ، އެހެން ނަމަވެސް ރޭ މީޑިއާ ކައުންސިލްއިން އެ ވީޑިއޯ ދެއްކީ ގަސްދުގައި ދުރާލާ ރާވައިގެން އެޑިޓޯރިއަލް އުސޫލާ ހިލާފު ކޮންޓެންޓް ގެނެސްދިނުމަށް ކަމަށެވެ.
އެހެންވެ އެކަން ހަރުކަށި އިބާރާތުން ޕީއެސްއެމްއިން ވަނީ ކުށްވެރިކޮށްފަ އެވެ.
"ޕަބްލިކް ސާވިސް މީޑިއާގެ ތަސައްވުރު ރައްޔިތުން ކުރިމަތީގައި ގެއްލޭފަދަ އަމަލެއް މޯލްޑިވްސް މީޑިއާ ކައުންސިލުން ހިންގާފައިވާތީ އެމައްސަލަ ބައްލަވައިދެއްވުން އެދި މި ކުންފުނީގެ ފަރާތުން މިހާރު ވާނީ ރައްޔިތުން މަޖިލީހަށް ހުށަހަޅާފައެވެ." ޕީއެސްއެމްއިން ނެރުނު ބަޔާނުގައި ބުނެފައިވެ އެވެ.
