ވަގަށް ނަގާފައިވާ 67 ކާޓަން ސިނގިރޭޓާއެކު މީހަކު ހައްޔަރުކޮށްފި
ވަގަށް ނަގާފައިވާ 67 ކާޓަން ސިނގިރޭޓާއެކު މީހަކު ހައްޔަރުކޮށްފި އެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ އިއްޔެ ފަތިހު 5:40 ހާއިރު ފުލުހުން ޕެޓްރޯލް ކުރަމުން ދިޔައިރު އޮލިމްޕަސް ކައިރިން ދިޔަ މީހަކާމެދު ތުހުމަތު ކުރެވިގެން ހުއްޓުވައި, އޭނާ ގެންގުޅުނު ދަބަސްތަކަކާއި ކޮތަޅުތަކެއް ބަލައި ފާސްކުރިއިރު އެ ސިނގިރޭޓު ކާޓަންތައް ފެނުނު ކަމަށެވެ.
އެތަކެއްޗަކީ އޯޝަން ނޮޓިކަލް ޕްރައިވެޓް ލިމިޑެޓުން އޭނާ ވަގަށް ނަގާފައިވާ ތަކެތިކަން މިހާތަނަށް ބެލިބެލުމުން އެނގިފައިވާ ކަމަށް ފުލުހުން ބުނެ އެވެ.
އެ މައްސަލައާ ގުޅިގެން ހައްޔަރުކޮށްފައިވަނީ ށ. ފޭދޫ, ހިރުނުމާގެ, މުހައްމަދު ލުޖައިން (24އ) އެވެ.
އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން 5 ދުވަހުގެ މުއްދަތެއް ދީފައިވާއިރު އަމުރުން އެނގޭ ގޮތުގައި ކުރު މުއްދަތެއް ދީފައިވަނީ ވަކީލެއްގެ ފުރުސަތަކަށް އެދިފައިވާތީ އެކަން ފަހިކޮށް ދިނުމުގެ ގޮތުންނެވެ.
ކޯޓު އަމުުރުގައި ބުނެފައިވަނީ ތުހުމަތުކުރެވޭ ކޮންމެވެސް މިންވަރަކަށް ހެކި ގަރީނާ ހުށަހަޅާފައިވާ ކަމަށެވެ. އޭގެ ތެރޭގައި ފުލުހުންގެ ހާދިސާ ރިޕޯޓާއި އޭނާގެ ހައްޔަރާއި ބަންދު ލޮގު ހިމެނޭ ކަމަށް ބުނެފައިވެ އެވެ.
އެ މީހާއަކީ މި ބާވަތުގެ ހައްޔަރާއި ބަންދު ލޮގް އޮތް ފަރާތެއް އަދި ބަންދުން ދޫކޮށްލައިފިނަމަ ކުށް ތަކުރާރުވުމުގެ އިހުތިމާލު އޮތް ކަމަށް ބެލެވޭ ކަމަށް ވެސް އަމުރުގައި ބުނެފައިވެ އެވެ.
ފުލުހުން އިތުރަށް ބުނީ އެ މައްސަލަ ތަހުގީގުކުރަމުންދާ ކަަމަށެވެ.
