ސީއެޗްއެސްއީ-މާލެ ރަސްމީކޮށް ހުޅުވައިފި
އޭލަވަލްއަށް ކިޔަވައިދޭ ސެންޓަ ފޯ ހަޔާ ސެކެންޑްރީ އެޑިއުކޭޝަން(ސީއެޗްއެސްއީ)-މާލެ ރަސްމީކޮށް ހުޅުވައިފި އެވެ.
މިރޭ ބޭއްވި ހާއްސަ ރަސްމިއްޔާތެއްގައި ސީއެޗްއެސްއީ-މާލެ ރަސްމީކޮށް ހުޅުވައިދެއްވީ ރައީސް ޑރ. މުހައްމަދު މުއިއްޒު އެވެ.
އަމީނިއްޔާ ސްކޫލް ކައިރީގައި ހުންނަ ސީއެޗްއެސްއީ ބިލްޑިން އަކީ އެންމެ ކުރިއްސުރެެވެސް މާލޭގައި އޭލަވަލްއެއް ކިޔަވައިދިން އިމާރާތެވެެ.
އެހެން ނަމަވެސް ހުޅުމާލޭގައި ސީއެޗްއެސްގެ އާ އިމާރާތް 2022 ގައި ހުޅުވުމާ ގުޅިގެން މާލޭގައި ހުރި އިމާރާތުގައި ކިޔަވައިދިނުން އޮތީ ހުއްޓާލައިފަ އެވެ.
އެކަމަކު މި ސަރުކާރުން ވެރިކަމަށް އައިސް ބޮޑު މަރާމާތުތަކެއް ކުރުމަށް ފަހު މިދިޔަ ސެޕްޓެމްބަރު މަހު ވަނީ މާލޭގެ އިމާރާތުގައި އަލުން ކިޔަވައިދޭން ފަށައިފަ އެވެ.
އެއާއެކު ދެން މާލެ އަދި ހުޅުމާލޭގެ ސީއެޗްއެސްއީގައި ވެސް އޭލަވަލްއަށް ކިޔަވައިދޭނެ އެވެ.
ސީއެޗްއެސްއީ-މާލެ މިރޭ އަލުން ހުޅުވިއިރު އެ ސްކޫލުގައި މިހާރު 424 ދަރިވަރުން ދަނީ ތައުލީމު ހާސިލުކުރަމުންނެވެ.
ސީއެޗްއެސްސީގެ ޕްރިންސިޕަލަކީ ދަރުމަވަންތަ ސްކޫލުގެ ކުރީގެ ޕްރިންސިޕަލް އަބްދުﷲ ދީދީ (ޑީޑީ) އެވެ.
ޑެޕިއުޓީ ޕްރިންސިޕަލުންނަކީ އައިޝަތު އަބީރާ އާއި އަހުމަދު މުޖާހިދެވެ.
Ads by STO
