ގައުމީ ތަރައްގީގެ ޕްލޭނަށް ގާނޫނީ ބާރުވެރިކަން ދެނީ
"ދިވެހިރާއްޖޭގެ 20 އަހަރުގެ ގައުމީ ތަރައްގީ ޕްލޭން" އަށް ގާނޫނީ ބާރުވެރިކަން ދިނުމަށް ނިންމާފައިވާ ކަމަށް ހައުސިން، ލޭންޑް އެންޑް އާބަން މިނިސްޓަރު ޑރ. އަލީ ހައިދަރު އަހްމަދު ވިދާޅުވެއްޖެ އެވެ.
ގައުމީ ތަރައްގީގެ ޕްލޭން އާ ގުޅޭ މަޝްވަރާ އިފުތިތާހު ކުރުމަށް މިއަދު ހެނދުނު ޒުވާނުންގެ މަރުކަޒުގެ ހޯލުގައި ބޭއްވި ރަސްމިއްޔާތުގައި ވާހަކަ ދައްކަވަމުން ހައިދަރު ވިދާޅުވީ ރާއްޖޭގެ ތަރައްގީ އާއި ކުރިއެރުން ދެމެހެއްޓުމަށް ޕްލޭންގައި ކަނޑައަޅާ މުހިންމު ސިޔާސަތުތަކާއި އަމާޒުތަކާއި އިސްތިރާޖްތަކާ އަދި ލަނޑުދަނޑިތައް ހާސިލު ކުރުމަށް މަގުފަހިކުރުމުގެ ގޮތުން ޕްލޭނަށް ގާނޫނީ ބާރުވެރިކަންދޭން ހަމަޖެހިފައިވާ ކަމަށެވެ. އެގޮތުން ގައުމީ ތަރައްގީގެ ގާނޫނުގެ ގޮތުގައި ބިލެއް އެކުލަވާލައި ރައްޔިތުންގެ މަޖިލިހަށް ހުށަހަޅާނެ ކަމަށެވެ.
"މި ޕްލޭން ދެމެހެއްޓެނިވި ޕްލޭނެއް ގޮތުގައި ތަންފީޒު ކުރުމަށް ބޭނުންވާ އިތުރު ބާރުވެރިކަން ގެނައުމަށް ޓަކައި ގާނޫނު އަސާސީއަށް މާއްދާއެއް އިތުރު ކުރުމަށް ވެސް ވަނީ ނިންމާފައި"
މިނިސްޓަރު ވިދާޅުވީ ދިގު މުއްދަތުގެ މި ޕްލޭން ވެގެންދާނީ ދެމެހެއްޓެނިވި ގޮތެއްގައި ރާއްޖެ ތަރައްގީ ބައްޓަންކުރުމަށާއި ގައުމު ދަތުރު ކުރާނެ ފަހި މިސްރާބެއް ކަނޑައެޅުމަށް މުހިންމު މަގު ޗާޓަކަށް ކަމަށެވެ.
މި ޕްލޭން އެކުލަވާލުމުގައި ރާއްޖޭގެ އެކި ކަންކޮޅުތަކުގައި އޮތް ދިރިއުޅުމުގެ ހާލަތު ދެނެގަނެ، ދާއިރާތަކަށް ކުރިމަތިވެފައިވާ ގޮންޖެހުންތަކާއި ދަތިތައް ވަޒަންކޮށް، ހެއްކާއި މައުލޫމާތުގެ އަލީގައި ކަންކަން އިސްލާހުކޮށް، ކުރިއަރުވަން ކުރަން ޖެހޭ މަސައްކަތްތައް އިލްމީ ނަޒަރަކުން ދެނެގަނެވޭނެ ކަމަށް ފާހަގަކުރެއްވި އެވެ.
މީގެ އިތުރުން ހައިދަރު ވިދާޅުވީ މި ޕްލޭން ވެގެންދާނީ ގައުމުގެ ކުރިމަގު އުޖާލާކޮށް، އަންނަން އޮތް ޖީލުތަކަށް ތަނަވަސް ފުދުންތެރި އުފާވެރި ރާއްޖެއެއް ފޯރުކޮށްދިނުމަށް އެޅޭ މުހިންމު ފިޔަވަޅަކަށް ކަމަށެވެ.
"އެގޮތުން މި ޕްލޭން ބައްޓަން ކުރުމުގައި އިޖުތިމާއީ އަދި އިގުތިސޯދީ ތަރައްގީއަށާއި ތިމާވެށި ރައްކާތެރި ކުރުމަށާއި ދުނިޔޭގެ މޫސުމަށް އަންނަ ބަދަލުތަކުން ރާއްޖެއަށް ކުރާ ނޭދެވޭ އަސަރުތައް ކުޑަކުރުމަށް އަޅާނެ ފިޔަވަޅުތަކާއި ގާނޫނު ހިންގުމުގެ ދާއިރާ އިތުރަށް ހަރުދަނާ ކުރުމަށް ކުރަން ޖެހޭ މަސައްކަތްތަކާއި އަލަށް ކުރިމަތިވަމުން އަންނަ ގޮންޖެހުންތަކާއި މައްސަލަތަކަށް ރިއާޔަތް ކުރަން ޖެހޭ،"
މި ކަންކަން ކުރެވޭނީ ރައްޔިތުންގެ ފުރިހަމަ އެއްބާރުލުން ލިބިގެން ކަމަށް ހައުސިން މިނިސްޓަރު ވިދާޅުވި އެވެ. އަދި ރާއްޖޭގެ އެކި ކަންކޮޅުތަކުން މުޖުތަމައުގެ ހުރިހާ ފަރާތްތަކަށް ފުޅާ ދާއިރާއެއްގައި މިކަން ކުރުމުގެ މަޝްވަރާ ނުލިބި އެކުލަވާލާ ތަސައްވަރެއް ފުރިހަމަ ނުވާނެކަން ވެސް ފާހަގަކުރެއްވި އެވެ.
"މިއަދަކީ މި މުހިންމު ދަތުރުގެ ފެށުން، އަޅުގަނޑުމެން އެދެނީ ތިޔަބޭފުޅުންގެ ތެރެއިން ކޮންމެ ބޭފުޅަކު ވެސް އެ ބޭފުޅަކު އެ ބޭފުޅެއްގެ ހިޔާލާއި މަޝްވަރާ އަދި ލަފާ މިކަމުގައި އަޅުގަނޑުމެންނަށް ދެއްވުން،"
މިނިސްޓަރު ވިދާޅުވީ މި ޕްލޭން އެކުލަވާލުމަށް އަހަރެއްހާ ދުވަސް ލިބިފައިވާއިރު، އެކިއެކި ވަސީލަތްތައް ބޭނުންކޮށްގެން، ލަފަ އާއި އިރުޝާދާއި ހިޔާލު އަދި މަޝްވަރާ ހުށަހެޅުމުގެ ދޮރުތައް ހުޅުވާލާނެ ކަމަށެވެ.
މި މަސައްކަތަކީ ރައީސް ޑރ. މުހައްމަދު މުއިއްޒުގެ މުހިންމު ރިޔާސީ ވައުދަކަށް ވުމާ އެކު ރައީސްގެ ލަފާފުޅާ އެއްގޮތަށް ޕްލޭން އެކުލަވާލުމުގެ މަސައްކަތުގައި ކަމާ ބެހޭ ހުރިހާ ފަރާތްތަކާއި ރައްޔިތުންގެ ބައިވެރިވުމާ ހިޔާލާ މަޝްވަރާ ވީހާވެސް ފުޅާ ދާއިރާއެއްގައި ހޯދުމަށް ހަމަޖެހިފައިވާ ކަމަށެވެ.
މި ޕްލޭން އެކުލާވުލުމުގައި އެހީތެރިކަން ހޯދުމަށް އޮސްޓްރޭލިއާ ސަރުކާރާ އެކު ހައުސިން މިނިސްޓްރީން މިދިޔަ އޮކްޓޯބަރު މަހުގެ ކުރީކޮޅު އެއްބަސްވުމެއްގައި ވަނީ ސޮއިކޮށްފަ އެވެ. އެއްބަސްވުމުގައިވާ ގޮތުން އޮސްޓްރޭލިއާއިން ދޭނީ ކަމާ ގުޅުންހުރި ފަންނީ އިރުޝާދާއި އެކަމަށް ބޭނުންވާ އެހީތެރިކަން ކަމަށް މިނިސްޓްރީން ބުނެފައިވެ އެވެ.
