ގްރީންހައުސް ގޭހާ ގުޅޭ ޑޭޓާ އެއްކުރުމުގެ މަސައްކަތް ހަރުދަނާކުރަން އެމްއޯޔޫއެއްގައި ސޮއިކޮށްފި
ރާއްޖޭގައި ހަކަތަ އާއި ގުޅޭ ޑޭޓާ އެއްކުރުމުގެ މަސައްކަތް ހަރުދަނާކޮށް މޫސުމަށް އަންނަ ބަދަލުތަކާ ގުޅޭގޮތުން ހާމަކުރަން ޖެހޭ މައުލޫމާތު އިތުރަށް ފުރިހަމަ ކުރުމުގެ ގޮތުން ކަމާ ގުޅުންހުރި އިދާރާތަކުގެ މެދުގައި މެމޮރެންޑަމް އޮފް އަންޑަސްޓޭންޑިން (އެމްއޯޔޫ) އެއް ގައި އިއްޔެ ސޮއިކޮށްފި އެވެ.
އެމްއޯޔޫގައި ސޮއިކޮށްފައި ވަނީ ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ މިނިސްޓްރީ އާއި މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އަދި ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރްއޭ) އާ ދެމެދު އެވެ.
އެނާޖީ މިނިސްޓްރީ އާއި ޔޫއާރުއޭގެ ފަރާތުން އެމްއޯޔޫގައި ސޮއިކުރެއްވީ މިނިސްޓަރު ތޯރިގު އިބްރާހީމެވެ. އަދި އެމްބީއެސްގެ ފަރާތުން ސޮއިކުރައްވާފައި ވަނީ ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓަރު ޑރ. އަލީ ހައިދަރު އަހްމަދެވެ.
އެ އެމްއޯޔޫގެ މަގުސަދަކީ ރާއްޖޭގައި ހަކަތަ އާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާކޮށް، ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ޔޫއެންއެފްސީސީސީ) އާއި ޕެރިސް އެގްރިމެންޓްގެ ދަށުން މޫސުމަށް އަންނަ ބަދަލުތަކާ ގުޅޭގޮތުން ހާމަކުރަން ޖެހޭ މައުލޫމާތު ހާމަކުރުމުގައި ރާއްޖެއިން އަދާކުރަން ޖެހޭ ޒިންމާތައް އަދާކުރުމަށް އެހީތެރިވެދިނުމެވެ.
އެމްއޯޔޫގައި ސޮއިކުރެވިފައި ވަނީ ކެޕޭސިޓީ ސްޓްރެންތެނިން ފޯ އިމްޕްރޫވްޑް ޓްރާންސްޕޭރަންސީ އޮފް ކްލައިމެޓް ޗޭންޖް މިޓިގޭޝަން އެންޑް އެޑަޕްޓޭޝަން އެކްޝަންސް އިން ދަ މޯލްޑިވްސް (ސީބީއައިޓީ މޯލްޑިވްސް) ޕްރޮޖެކްޓްގެ ދަށުންނެވެ. އެ މަޝްރޫއަށް ފަންޑު ހަމަޖައްސައިދެނީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) އިންނެވެ. މަޝްރޫއު ތަންފީޒު ކުރުމުގައި ޔުނައިޓެޑް ނޭޝަންސް އެންވަޔަރަންމަންޓް ޕްރޮގްރާމް (ޔޫއެން އެންވަޔަރަންމަންޓް) އިން އެހީތެރިކަން ފޯރުކޮށްދޭނެ އެވެ.
އެނާޖީ މިނިސްޓްރީން ބުނީ އެ އެއްބަސްވުމުގެ ސަބަބުން ރާއްޖޭގައި ހަކަތަ އާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާވެ، މޫސުމަށް އަންނަ ބަދަލުތަކާ ގުޅޭގޮތުން ކުރިއަށް ގެންދާ ބައިނަލްއަގުވާމީ މުޖުތަމައަށް ހާމަކުރަން ޖެހޭ މައުލޫމާތު އިތުރަށް ފުރިހަމަވެގެންދާނެ ކަމަށް އުންމީދުކުރާ ކަމަށެވެ.
"މި އެއްބަސްވުމަކީ ރާއްޖޭގެ މޫސުމަށް އަންނަ ބަދަލުތަކާ ގުޅޭ މަސައްކަތްތައް އިތުރަށް ހަރުދަނާ ކުރުމަށް އެޅޭ މުހިންމު ފިޔަވަޅެއް. މި އާއެކު، އަޅުގަނޑުމެންނަށް ޖީއެޗްޖީ ރިޕޯޓިން އާ ގުޅޭ ޑޭޓާ އެއްކުރުމުގެ މަސައްކަތް އިތުރަށް ހަރުދަނާކޮށް، ބައިނަލްއަގުވާމީ މުޖުތަމައަށް ހާމަކުރަން ޖެހޭ މައުލޫމާތު އިތުރަށް ފުރިހަމަ ކުރެވޭނެ،" ތޯރިގު ވިދާޅުވި އެވެ.
ވިދާޅުވީ މޫސުމަށް އަންނަ ބަދަލުތަކާ ގުޅޭ ފިޔަވަޅުތައް އެޅުމަށް ރަނގަޅު މައުލޫމާތު ބޭނުންވާ ކަމަށެވެ. މި އެމްއޯޔޫއަކީ ޕެރިސް އެއްބަސްވުމުގެ އެންހޭންސްޑް ޓްރާންސްޕޭރަންސީ ފްރޭމްވޯކާ އެއްގޮތަށް ހާމަކަން ބޮޑު އަދި ޖަވާބުދާރީވާން ޖެހޭ ރިޕޯޓިން އޮނިގަނޑެއް އެކުލަވާލުމަށް އެޅޭ މުހިންމު ފިޔަވަޅެއް ކަމުގައި މިނިސްޓަރު ފާހަގަކުރެއްވި އެވެ.
"މި އެއްބަސްވުމުގެ ސަބަބުން އެމްބީއެސްއަށް ލިބޭ މައުލޫމާތުގެ ފުރިހަމަކަން އިތުރުވެ، ރާއްޖޭގެ ތަފާސް ހިސާބުތައް އިތުރަށް ފުރިހަމަވެގެންދާނެ. މިއީ ރާއްޖޭގެ ތަރައްގީއަށް ވަރަށް މުހިންމު ކަމެއް،" ހައިދަރު ވިދާޅުވި އެވެ.
އެ އެއްބަސްވުމުގެ ދަށުން ތިން އިދާރާގެ މެދުގައި މައުލޫމާތު ބަދަލު ކުރުމާއި ޑޭޓާ އެއްކުރުމުގެ މަސައްކަތްތައް ވިލަރެސްކުރުން ހަރުދަނާވާނެ ކަމަށް އެނާޖީ މިނިސްޓްރީން ބުނެ އެވެ. މިކަމުގެ ސަބަބުން ރާއްޖޭގެ ހަކަތައިގެ ދާއިރާ އާ ގުޅޭ ތަފާސް ހިސާބުތަކުގެ ފުރިހަމަކަން އިތުރުވެ، މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމަށް ބޭނުންވާ މައުލޫމާތު އިތުރަށް ފުރިހަމަވެގެންދާނެ ކަމަށް ލަފާކުރެވޭ ކަމަށެވެ.
އިއްޔެ ބޭއްވި ސޮއިކުރުމުގެ ރަސްމިއްޔާތުގައި ސްޕެޝަލް އެންވޯއީ ފޮ ކްލައިމެޓް ޗޭންޖް އަލީ ޝަރީފާއި އެނާޖީ މިނިސްޓްރީގެ ޑެޕިއުޓީ މިނިސްޓަރު ހުސައިން އަގީލު ނަސީރާއި އެ މިނިސްޓްރީގެ ޕާމަނަންޓް ސެކްރެޓަރީ އަޖުވަދު މުސްތޮފާ އާއި ހައުސިން މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހްމަދު ހަމީދާއި އެމްބީއެސްގެ ޗީފް ސްޓެޓިސްޓީޝަން އާއިޝަތު ހަސަން އަދި ޔަދި ޔޫއާރްއޭގެ ޑެޕިއުޓީ ޑިރެކްޓަ ޖެނެރަލް މުއާވިޔަތު ޝަރީފްގެ އިތުރުން އެނާޖީ މިނިސްޓްރީ، އެމްބީއެސް އަދި ޔޫއާރްއޭގެ އިސް ބޭފުޅުން ބައިވެރިވެ ވަޑައިގެންނެވި އެވެ.
އެނާޖީ މިނިސްޓްރީން ބުނި ގޮތުގައި މި އެމްއޯޔޫގެ ދަށުން އެ މިނިސްޓްރީ އާއި އެމްބީއެސް އަދި ޔޫއާރްއޭއިން ކުރިއަށްގެންދާ ފަތުރުވެރިކަމުގެ ތަފާސް ހިސާބުގެ ސާވޭ ހަރުދަނާކޮށް، ރާއްޖޭގެ ރިސޯޓުތަކުގެ ހަކަތައިގެ މުހިންމު މައުލޫމާތު ހިމެނުމަށް މަސައްކަތް ކުރާނެ ކަމުގަ އެވެ. އަދި ފަތުރުވެރިކަމުގެ ތަފާސް ހިސާބުގެ ސާވޭ ފޯމު އަޕްޑޭޓް ކުރުމަށް ޓެކްނިކަލް އެހީތެރިކަން ފޯރުކޮށްދީ، އަޕްޑޭޓް ކުރެވޭ ސާވޭ ތަންފީޒު ކުރުމަށް އެހީތެރިވާނެ ކަމުގަ އެވެ. އެ އިސްލާހުގެ ސަބަބުން މައުލޫމާތު އެއްކުރުމުގެ މަސައްކަތް ހަރުދަނާވެ، ތަކުރާރުވުން މަދުވެ، އަދި ގްރީންހައުސް ގޭސް އިންވެންޓްރީ އާއި ހަކަތައިގެ ދާއިރާގައި ސިޔާސަތުތައް އެކުލަވާލުމަށް ބޭނުންވާ ސައްހަ މައުލޫމާތު އެއްކުރެވޭނެކަން ކަށަވަރުވާނެ ކަމަށް ވެސް އެ މިނިސްޓްރީން ބުނެ އެވެ.
އަޕްޑޭޓްކުރެވޭ މި ސާވޭ މި އަހަރުގެ ނިޔަލަށް ތަންފީޒު ކުރެވި، މިދިޔަ އަހަރުގެ މައުލޫމާތު އެއްކުރަން ފަށާނެ އެވެ.
އެނާޖީ މިނިސްޓްރީން ބުނީ މި އެމްއޯޔޫއަކީ ރާއްޖޭގެ މޫސުމަށް އަންނަ ބަދަލުތަކާ ގުޅޭ މަސައްކަތްތަކަށް އެޅުނު މުހިންމު ފިޔަވަޅެއް ކަމަށެވެ. މިކަމުގެ ސަބަބުން ރާއްޖޭގެ ފަތުރުވެރިކަމުގެ ސިނާއަތުގެ ހަކަތައިގެ ބޭނުންކުރުމާ ގުޅޭ މައުލޫމާތު އެއްކުރުމުގެ މަސައްކަތް ހަރުދަނާވެ، މޫސުމަށް އަންނަ ބަދަލުތަކާ ގުޅޭ ސިޔާސަތުތައް އެކުލަވާލުމަށް ބޭނުންވާ މުހިންމު މައުލޫމާތު ލިބޭނެ މަގުފަހިވާނެ ކަމަށެވެ.
ތީހަމަ ކޮންމެވެސް ތަނަކުން ލާރިކޮޅެެއް ޖީބައް ވައްދަން ހެދި އެމްއޯޔޫ އެއް ކަން ޔަގީން. މީގެދެހަފުތާ ކުރިން ޖަޕާނުގެ އެކުސްޕާޓުން ރާއްޖޭގަ ސާވޭ އެއް ހަދައިގެން ތިކަމުގެ ހައްލު ހިފައިގެން ކަލޭމެން ގާތަށް އަހަރެން އެމީހުން ގޮވައިގެން ދިޔައިން.ކަލޭ މެން އެރިޕޯޓަށް ދިނީ ބީރުކަންފަތެއް. އިރާދަކުރެއްވީ ޔާދުނިޔޭގެ ހުރިހާ ޖަމުއިއްޔާ ޔަކަށް ކަލޭމެން ގެ ތި ޖާހިލު ރޭވުން ހާމަކޮށް ދޭނަން.