ކޫއްޑޫގެ ކޯލްޑް ސްޓޯރޭޖަށް 4،000 ޓަނު އިތުރުކުރަން ހަވާލުކޮށްފި
ގއ. ކޫއްޑޫގައި އިތުރު 4،000 ޓަނުގެ ކޯލްޑް ސްޓޯރެޖަކާއި ޕަވާ ސިސްޓަމެއް ތަރައްގީ ކުރުމުގެ މަޝްރޫއުގެ އެއްބަސްވުމުގައި ސޮއިކޮށްފި އެވެ.
ކޫއްޑޫ ކޯލްޑް ސްޓޯރޭޖް އެކްސްޕެންޝަން ޕްރޮޖެކްޓުގެ އެއްބަސްވުމުގައި ސޮއިކޮށްފައި ވަނީ އެކަމަށާ އަދި އާރުއެސްޑަބްލިޔު ފައިނޭންސިން ފެސިލިޓީގެ ސްޓޭކްހޯލްޑަރުންނާއި ބައްދަލުކުރުމަށް މިއަދު މެންދުރު ރައީސް އޮފީހުގައި ބޭއްވި ހާއްސަ ރަސްމިއްޔާތެއްގަ އެވެ.
ކޫއްޑޫ ކޯލްޑް ސްޓޯރޭޖް އެކްސްޕެންޝަން ޕްރޮޖެކްޓުގެ މަސައްކަތް ހަވާލުކުރީ ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓެޑް އާ އެވެ. މަޝްރޫއުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމެވެ. ލަކީ ގްލޯބަލްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އާޝިޝް އޮބެރޯއީ އެވެ.
ސައުދީ ފަންޑް ފޯ ޑިވެލޮޕްމަންޓުގެ ދަށުން ކުރިއަށް ގެންދާ މި މަޝްރޫއުގެ މަސައްކަތް ލަކީ ގްލޯބަލް ޕްރޮޖެކްޓްސް އާ ހަވާލުކޮށްފައި ވަނީ އެއް އަހަރު ދުވަހުގެ ތެރޭގައި މަސައްކަތް ނިންމާ ގޮތަށެވެ. މިއީ 6.6 މިލިއަން ރުފިޔާގެ މަޝްރޫއެކެވެ.
މި ރަސްމިއްޔާތުގައި މުރާބަހާ އާރުއެސްޑަބްލިޔު ފައިނޭންސިން ފެސިލިޓީގެ ދަށުން ފައިނޭންސިން ލިބިފައިވާ ފަރާތްތަކަށް އެވޯޑު ލެޓާ ހަވާލުކުރުން ވެސް ކުރިއަށް ގެންދިޔަ އެވެ. އެވޯޑު ލެޓާ ހަވާލުކޮށްދެއްވީ ރައީސް ޑރ. މުހައްމަދު މުއިއްޒެވެ.
މަސްވެރިން ބާނާ މަހަށް ބޭރު މާކެޓްތަކުގައި ލިބޭ އަގު ބިނާ ވަނީ މަހުގެ ތާޒާކަމާ މަހުގެ ކޮލިޓީއަށެވެ. އެހެންކަމުން މަހުގެ ކޮލިޓީ ދެމެހެއްޓުމަށްއ މަސްވެރިން ބާނާ މަސް ކިރުވެންދެން ތާޒާކޮށް ބެހެއްޓުމަށް ދޯނިތަކުގައި މަސް ފިނިކުރެވޭނެ ނިޒާމް، ރެފްރިޖިރޭޓެޑް ސީވޯޓަ ސިސްޓަމްތައް ގާއިމުކުރުމަށް ފިޝަރީޒް މިނިސްޓްރީން ދަނީ މަސައްކަތްތަކެއް ކުރަަމުންނެވެ. އެގޮތުގެ މަތިން މަސްކިރާ ބަނދަރަށް ތާޒާކޮށް ގެންނަ މަސް ފިނިކޮށް ރައްކާކުރާނޭ ކޯލް ސްޓޯރޭޖްތައް އިތުރުކުރުމަކީ ސަރުކާރުގެ އަމާޒެކެވެ. އަދި މަސްވެރި ސިނާއަތުގައި އިގުތިސޯދީ ނަފާ އިތުރު ކުރުމަކީ ރައީސްގެ ވަރަށް މުހިންމު ސިޔާސަތެކެވެ.
އާރުއެސްޑަބްލިޔު ފައިނޭންސިން ފެސިލިޓީގެ ދަށުން ފައިނޭންސިން ލިބުނު ފަރާތަކަށް އެވޯޑު ލެޓާ ހަވާލުކޮށްދެއްވަނީ / ފޮޓޯ:ރައީސް އޮފީސް
އިސްލާމިކް ޑިވެލޮޕްމަންޓް ބޭންކްގެ "ސަޕޯޓް ޕީޕަލްސް ލައިވްލިހޫޑް އިން ފިޝަރީޒް ސެކްޓަ އިން މޯލްޑިވްސް ތްރޫ ސަސްޓެއިނަބަލް އެނަޖީ މަޝްރޫއު" ގެ ދަށުން މަދުވެގެން 100 އެއްހާ ދޯނީގައި އާރުއެސްޑަބްލިޔު ސިސްޓަމްތައް އެޅުމަށް އިސްލާމިކް ފައިނޭންސްއިން ވަނީ ފެސިލިޓީއެއް ހަމަޖެހިފަ އެވެ. މި މަޝްރޫއު ހުޅުވާލީ ރައީސްގެ އިސްނެންގެވުމާއެކީ، މަސްވެރިންގެ ބޭނުންތަކަށް ރިއާޔަތްކުރެވި މަސްވެރިންނަށް ދަތިވެފައިވާ ކަންކަން ހައްލުކުރުމަށް ހާއްސަ އިސްކަމެއް ދީގެންނެވެ. އެގޮތުން މި ފެސިލިޓީގެ ދަށުން ނަގާ ތަކެތީގެ އަގުގެ 35 އިންސައްތަ ސަރުކާރުން ދައްކައިދޭ ގޮތަށް ވަނީ ނިންމާފަ އެވެ.
މި ފެސިލިޓީގެ ދަށުން ރަހުނަކާ ނުލައި އެއްލައްކަ ރުފިޔާއިން ފެށިގެން ދެ މިލިއަން ރުފިޔާ އާ ހަމައަށް އާރުއެސްޑަބްލިޔު ސިސްޓަމަކާއި ޖަނޭޓަރަކާ އަދި ސޯލާ ޕެނަލް ގަތުމަށް ފައިސާ ލިބޭނެ އެވެ. އަދި އެސްޑީއެފްސީގައި ރަޖިސްޓްރީކޮށްފައިވާ ވެންޑަރެއް މެދުވެރިކޮށް އޮޑިވެރިން އަމިއްލައަށް ތަކެތި ގަތުމުގެ އިހުތިޔާރު ވަނީ ފަހިކޮށްދީފަ އެވެ.
އާރުއެސްޑަބްލިޔު ބޭނުންކުރަން ފެށުމުން މަސްވެރިން އައިސް ގަންނަން ކުރާ ދަތުރު ހަރަދު ވަރަށް ބޮޑަށް ކުޑަވެގެންދާނެ އެވެ. އަދި އޮޑީގެ ހަރަދު ކުޑަވެ ސީދާ މަސްވެރިޔާގެ ޖީބަށް ވަންނަ ފައިސާ އިތުރު ވެގެންދާނެ އެވެ.
މީގެއިތުރުން ރާއްޖޭގައި މިވަގުތު ހުރި 8،500 ޓަނުގެ ކޯލްޑް ސްޓޯރޭޖް ކެޕޭސިޓީ ދެ ގުނަ ކުރުމަކީ ރައީސްގެ ރިޔާސީ ވައުދުފުޅެކެވެ. ސަރުކާރުން މިހާރު އަމާޒު ހިފާފައި ވަނީ މިހާރު ހުރި ކެޕޭސިޓީ ތިން ގުނަ އިތުރުކޮށް 25 ހާސް ޓަނަށް އިތުރު ކުރުމަށެވެ.
މިއަދުގެ ރަސްމިއްޔާތުގައި ރައީސްގެ ނައިބު ހުސައިން މުހައްމަދު ލަތީފާއި ސަރުކާރުގެ އިސްވެރިން ބައިވެރިވެ ވަޑައިގެންނެވި އެވެ.
