ބަލިވީމާ އަބަދު ބޭސްކުރާ ނިޒާމެއްގައި ތިބެގެން އެދޭ މިސްރާބަށް ގައުމެއް ނުގެންދެވޭނެ: ނާޒިމް
ބަލިމަޑުކަމުގެ ފަހަތުން ދުވާ ސިއްހީ ނިޒާމެއްގައި ތިބެވެން ނެތް ކަމަށާއި ބަލިވުމުން އަބަދު ބޭސްކުރާ ސިއްހީ ނިޒާމެއްގައި ގައުމު ހިންގާ ނަމަ، ގެންދަން ބޭނުންވާ މިސްރާބަށް ގައުމު ނުގެންދެވިދާނެ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް ވިދާޅުވެއްޖެ އެވެ.
ހުޅުމާލެ ސެންޓްރަލް ޕާކުގައި ކުރިއަށްދާ "ހެލްތު އެކްސްޕޯ 2024" ފަށްޓަވައިދެއްވީ ނައިބު ރައީސް ހުސައިން މުހައްމަދު ލަތީފެވެ. ރޭ އިފުތިތާހުކުރި އެކްސްޕޯގައި ސަރުކާރަށް އެއް އަހަރު ފުރުމާ ދިމާކޮށް ސިއްހީ ދާއިރާއިން ކޮށްފައިވާ މަސައްކަތްތަކުގެ ވަނަވަރު ހިމެނޭހެން އެކުލަވާލާފައިވާ "ހަފްތާ52" ނެރެފަ އެވެ. ފޮތް އާންމުކޮށްދެއްވީ ނައިބު ރައީސް އެވެ.
ފުރިހަމަ ސިއްހަތަކަށް މުޅި ގައުމު އެކުގައި މި ޝިއާރާ އެކު ދެ ދުވަހުގެ މުއްދަތަށް ކުރިއަށް ގެންދާ ހެލްތު އެކްސްޕޯ ފެށުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަވަމުން ނާޒިމް ވިދާޅުވީ، އަމާޒަކީ ކޮންމެ އަހަރަކު ވެސް މި އެކްސްޕޯ ބާއްވައި، އަހަރުން އަހަރަށް އެކްސްޕޯ ފުޅާކޮށް ރާއްޖޭގެ އެކި ކަންކޮޅުތަކުގައި އެ ފިކުރު އާލާކުރުން ކަމަށެވެ.
ހެލްތު އެކްސްޕޯ 2024 ފެށުމުގެ ރަސްމިއްޔާތުގައި "ހަފްތާ52" އާންމުކޮށްދެއްވަނީ / ފޮޓޯ:ރައީސް އޮފީސް
ދުޅަހެޔޮ އާބާދީއަކަށް ވުރެ ބޮޑު އެސެޓެއް ގައުމެއްގައި ނޯންނާނެ ކަމަށެވެ. އެހެންކަމުން، ބަލިމަޑުކަމެއްގެ ފަހަތުން ދުވާ ސިއްހީ ނިޒާމެއްގައި ތިބެވެން ނެތް ކަމަށެވެ. ރައީސް ޑރ. މުހައްމަދު މުއިއްޒުގެ ސަރުކާރުގެ ސިޔާސަތުތައް އެކުލަވާލާފައި ވަނީ އެ ނިޒާމު ބަދަލުކޮށް ދެމެހެއްޓެނިވި ތަރައްގީ އާ ދިމާލަށް ކަމަށް މިނިސްޓަރު ވިދާޅުވި އެވެ.
"އަޅުގަނޑުމެން މި ސިޔާސަތަށް ބެލުމުން ފެންނަން އޮތް އެންމެ ބޮޑު ހަގީގަތަކީ، ބަލިމަޑުކަމުގެ ފަހަތުން ދުވާ ސިއްހީ ނިޒާމެއްގެ ތެރޭގައި އަޅުގަނޑުމެންނަށް ތިބެވެން ނެތްކަން. ދަންނަވަން މި އުޅެނީ ބަލިވީމަ އަބަދު ބޭސްކުރާ ނިޒާމެއްގެ ތެރޭގައި އުޅެގެން މި ގައުމު ގެންދަން ބޭނުންވާ މިސްރާބަށް ނުގެންދެވޭނެކަން،" ނާޒިމް ވިދާޅުވި އެވެ.
މިނިސްޓަރުގެ ވާހަކައިގައި ވަނީ ވޭތުވެދިޔަ އަހަރުގެ ތެރޭގައި ސިއްހީ ނިޒާމަށް އައި ހެޔޮ ބަދަލުތަކުގެ މައްޗަށް އަލިއަޅުއްވާލައްވާފަ އެވެ. އެގޮތުން ކާބޯތަކެތީގެ ރައްކާތެރިކަމާބެހޭ ގާނޫނަށް އަމަލުކުރަން ފަށާފައިވާ ކަމަށާއި ބަލިވުމުގެ ކުރިން ހިލޭ ބޭސްފަރުވާގެ ދަށުން މެޑިކަލް ޗެކްއަޕް ހެދެން ފެށިކަން ފާހަގަކުރެއްވި އެވެ. އަދި އެއާ އެމްބިއުލާންސްގެ ހިދުމަތް މިހާރު ރައްޔިތުންނަށް ލިބެމުންދާ ކަމަށް ވެސް ވިދާޅުވި އެވެ.
އޭގެ އިތުރުން ކޮލިޓީ ބޭސް ގެނައުމުގެ މަސައްކަތް ސަރުކާރުން ކުރަމުންދާކަން ނާޒިމް ފާހަގަކުރެއްވި އެވެ. ވިދާޅުވި ގޮތުގައި އެކި ދާއިރާތަކުން ސްޕެޝަލައިޒް ހޮސްޕިޓަލްތައް ގާއިމުކުރުމުގެ މަސައްކަތް ކުރެވެމުންދާ ކަމުގަ އެވެ.
އާސަންދަ ނިޒާމަށް ބަދަލު ގެނައުމުގެ މަސައްކަތް ކުރެވެމުންދިޔަ ނަމަވެސް، ނިޒާމަށް އަންނަ ބަދަލަކާ ގުޅިގެން ރައްޔިތުން ކަންބޮޑުވާން ނުޖެހޭނެ ކަމުގެ ޔަގީންކަން ވެސް ނާޒިމްގެ ވާހަކައިގައި ދެއްވި އެވެ. ވިދާޅުވީ އެ ނިޒާމަށް ގެނެވޭ ބަދަލަކީ އިންޝުއަރެންސް ސްކީމްގެ ތެރޭގައި ހުރި ލޫޕްހޯލްސް ބަންދު ކުރެވި، ރައްޔިތުންގެ ފައިސާއިން އެންމެ ރަނގަޅު ގޮތުގައި ހަރަދު ކުރެވޭ ނިޒާމަކަށް ހެދުން ކަމަށެވެ.
ނައިބު ރައީސް ވަނީ ހެލްތު އެކްސްޕޯ 2024 ގައި އާންމުންނަށް މައުލޫމާތު ފޯރުކޮށްދިނުމަށް ތައްޔާރުކޮށްފައިވާ ސްޓޯލްތަކަށް ޒިޔާރަތް ކުރައްވައި، އެ ސްޓޯލްތައް ބައްލަވާލައްވާފަ އެވެ. އެކްސްޕޯގައި މާލެ ސަރަހައްދުގެ ހޮސްޕިޓަލްތަކާއި ކްލިނިކްތަކާ އަދި ޖަމިއްޔާ ޖަމާއަތްތަކުން ގާއިމުކޮށްފައިވާ 50 ސްޓޯލަކުން، އާންމުންނަށް މައުލޫމާތު ލިބޭނެ އިންތިޒާމު ހެލްތު މިނިސްޓްރީން ވަނީ ހަމަޖައްސާފަ އެވެ.
