މަސްވެރިންނަށް ހުރި ގޮންޖެހުންތައް ކުރިއަށް އޮތް ދެ އަހަރު ތެރޭގައި ހައްލު ކޮށްދޭނަން: ޝިޔާމް
މަސްވެރިކަމުގެ ސިނާއަތުގައި މަސްވެރިންނަށް ކުރިމަތިވަމުންދާ އުނދަގޫ ގޮންޖެހުންތައް ރައީސް ޑރ. މުހައްމަދު މުއިއްޒުގެ ވެރިކަމުގެ ފުރަތަމަ ތިން އަހަރު ދުވަހުގެ ތެރޭގައި ހައްލު ކޮށްދެއްވާނެ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ކޮންމެ އަތޮޅެއްގައި ތެޔޮ ރައްކާކުރެވޭނެ ނިޒާމު ގާއިމުކުރުމުގެ މަޝްރޫއު އިފުތިތާހުކުރުމަށް ރައީސް އޮފީހުގައި އިއްޔެ ވަނީ ހާއްސަ ރަސްމިއްޔާތެއް ބާއްވާފަ އެވެ. އެ ރަސްމިއްޔާތުގައި މަޝްރޫއު އިފުތިތާހުކޮށްދެއްވީ ރައީސް އެވެ.
ރަސްމިއްޔާތުގައި ވާހަކަ ދައްކަވަމުން ޝިޔާމް ވިދާޅުވީ މިހާތަނަށް މަސްވެރިކަމުގެ ސިނާއަތުގައި ހުރި ގޮންޖެހުންތަކަށް ހައްލެއް ހޯދިފައިނެތީ، މީގެ ކުރިން ކަންކަމަށް ވަގުތީ ހައްލު ހޯދާފައި ހުރުމުން ކަމަށެވެ.
"މިއަދު ވެސް އެންމެ ބޮޑު އެއް ގޮންޖެހުމެއް ހަގީގަތުގައި ތެލުގެ މި ގޮންޖެހުމަކީ. ތެޔޮ ފޯރުކޮށްދިނުމަށް އަދި އަގު ބޮޑުކޮށް އެކި ހިސާބުތަކުން މަސްވެރިންނަށް ތެޔޮ ލިބޭ ލިބުން،" މަސްވެރިންނަށް ދިމާވާ ގޮންޖެހުންތައް ފާހަގަކުރައްވާ ޝިޔާމް ވިދާޅުވި އެވެ.
މީގެކުރިން އަމަލުކޮށްފައިވާ ގޮތަކީ މަސްވެރިންނަށް ތެޔޮ ނުލިބިގެން އުޅޭނަމަ އެ ސަރަހައްދަކަށް ތެޔޮ ބޯޓެއް ފޮނުވައި، އެ ދުވަހަކަށް ފުދޭވަރު ކޮށްދިނުން ކަމަށެވެ. ހަމައެގޮތަށް މަސް ނުކިރިގެން އުޅޭ ނަމަ، އެ ސަރަހައްދަކަށް މަސް ބޯޓެއް ފޮނުވާ އެ ދުވަހަކަށް މަސް ކިރޭނެ ގޮތް ހަމަޖައްސައިދީފައި ހުރިކަން ވެސް ޝިޔާމް ފާހަގަކުރެއްވި އެވެ.
މިނިސްޓަރު ވިދާޅުވީ އެފަދަ ކަންކަމަށް ހައްލު ހޯދައިދިނުމަށް ކުރަމުންދާ މަސައްކަތުގެ ތެރެއިން މިހާރު ތިން ސަރަހައްދަކުން މަސްވެރިންނަށް ފަސޭހައިން ތެޔޮ ލިބޭނެ އިންތިޒާމް ހަމަޖައްސާފައިވާ ކަމަށެވެ. އަދި ޑިމާންޑް އޮތް ވަރަކުން ފެސިލިޓީތައް އިތުރު ކުރަމުންދާނެ ކަމަށެވެ.
ޝިޔާމްގެ ވާހަކައިގައި ވަނީ ތެލަކީ އަސާސީ ހިދުމަތެއްގެ ގޮތުގައި ކަނޑައަޅުއްވައި، މަދުވެގެން ކޮންމެ އަތޮޅެއްގެ އެއް ރަށުން ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ރޭޓުގައި ތެޔޮ ފޯރުކޮށްދޭ ނިޒާމެއް ގާއިމުކުރުމަކީ ރައީސްގެ ރިޔާސީ ވައުދެއްކަން ފާހަގަކުރައްވާފަ އެވެ.
އެސްޓީއޯއިން ކުރިއަށް ގެންދާ މަޝްރޫއުގެ ދަށުން އަންނަ އަހަރުގެ އޮކްޓޯބަރު މަހުގެ ނިޔަލަށް ހއ. އިހަވަންދޫ، ހދ. ހަނިމާދޫ، ފ. ނިލަންދޫ، ގދ. ފަރެސްމާތޮޑާ އަދި ފުވައްމުލައް ސިޓީގައި ސެޓަޕް ގާއިމު ކުރުމަށް ވަނީ ހަމަޖެހިފަ އެވެ. އަދި 2026 ވަނަ އަހަރުގެ ނިޔަލަށް ބާކީ 10 އަތޮޅުގައި އެ ހިދުމަތް ފެށުމަށް ވަނީ އަމާޒު ކަނޑައަޅާފަ އެވެ.
