ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު ޑރ ޒާހިރަށް އަރުވަނީ
ދިވެހިރާއްޖޭގެ ތައުލީމަށް ހިދުމަތްކުރުމުގެ އެންމެ މަތިވެރި ޝަރަފު، ނިޝާން އިއްޒުއްދީނުގެ އިއްޒަތުގެވެރިޔާ އަދި ރާއްޖޭގެ އިސްލާމީ ޔުނިވާސިޓީގެ ޗާންސެލާ ޑރ. މުހައްމަދު ޒާހިރު ހުސައިން އަށް އެރުވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަނޑައަޅުއްވައިފި އެވެ.
ރައީސް އެ ނިންމެވުން ނިންމާފައިވަނީ ރާއްޖޭގެ ތައުލީމީ ތަރައްގީއަށާއި، ރާއްޖޭގައި ތައުލީމު ފުޅާކުރުމުގައިއާއި، ތައުލީމީ ރޮނގުން ރާއްޖޭގެ ރައްޔިތުން ހޭލުންތެރިކުރުމަށް، ގިނަގުނަ ހިދުމަތްތަކެއް ކޮށްދެއްވާފައިވާތީ، އެކަމުގެ އަގު ވަޒަންކުރުމުގެ ގޮތުންނެވެ.
ޑރ. ޒާހިރުއަށް މި ޝަރަފު އެރުއްވުން އޮންނާނީ، ޖުމްހޫރީ ދުވަހުގެ މުނާސަބަތުގައި މާދަމާރޭ 8:15 ގައި ދަރުބާރުގޭގައި ބާއްވާ ރަސްމީ ޖަލްސާގަ އެވެ.
އެ ޖަލްސާގައި، މަތީ ދަރަޖަ ހޯދާ ފަރާތްތަކަށް ރައީސް ދެއްވާ ހާއްސަ އިނާމު ލިބިވަޑައިގަންނަވާ 40 ބޭފުޅުންނަށް އެ ހަވާލުކުރެއްވުން އޮވެ އެވެ. އަދި އިނާމަށް ބޭފުޅުން ހޮއްވުމުގެ މަސައްކަތް ކުރިއަށް ގެންދިޔާއީ، ހާއްސަ އިނާމާބެހޭ ކޮމިޓީންނެވެ.
މީގެއިތުރުން، ދައުލަތަށް ހިދުމަތްކުރުމުގެ އިނާމުވެސް މި ޖަލްސާގައި، 53 ބޭފުޅަކަށް ދިނުމަށް ހަމަޖެހިފައި ވެއެވެ. އަދި ދައުލަތަށް ހިދުމަތްކުރުމުގެ އިނާމަށް ބޭފުޅުން ހޮއްވުމުގެ މަސައްކަތް ކުރިއަށް ގެންދިއައީ ޤައުމީ އިނާމާބެހޭ ކޮމިޓީންނެވެ.
